នៅថ្ងៃព្រហស្បតិ៍ ទី ២២ មីនា ២០១២ បន្ទាប់ពីឡោមព័ទ្ធផ្ទះជនល្មើស នៅខេត្តToulouse ភាគខាងត្បូងប្រទេសបារាំង អស់ជាង៣០ម៉ោង ប៉ូលិសពិសេសបារាំងបានសម្រុកចូលទៅក្នុងផ្ទះជនសង្ស័យ ។ ប៉ូលិសបានបញ្ជាក់ថា បានជនសង្ស័យ Mohamed Merahបានស្លាប់ នៅក្នុងប្រតិបត្តិការសម្រុកចូលរបស់ប៉ូលិស។ ប្រធានាធិបតីបារាំង នីកូឡា សាកូហ្សីបានស្វាគមជ័យជំនះរបស់ប៉ូលិស ក្នុងប្រតិបត្តិការណ៍ចាប់ជនសង្ស័យ ដែលបានបាញ់សម្លាប់មនុស្ស៧នាក់ ដែលក្នុងនោះមានទាហាន និងគ្រូ និងសិស្សសាលាជ្វីវ កាលពីសប្តាហ៍មុន។
រដ្ឋមន្រ្តីក្រសួងមហាផ្ទៃបានបញ្ជាក់ថា ជនសង្ស័យបានលោតសម្លាប់ខ្លួនតាមបង្អួចពីលើផ្ទះរបស់ខ្លួន បន្ទាប់ពី បានប្រើអាវុធស្វ័យប្រវត្តិបាញ់រះទៅលើក្រុមប៉ូលិសដែលបានសម្រុកចូល ទៅក្នុងផ្ទះរបស់ជនសង្ស័យ។ លោកClaude Guéant បាននិយាយប្រាប់អ្នកយកព័ត៌មានថា ជនសង្ស័យបានលាក់ខ្លួន នៅក្នុងបន្ទប់ទឹក និងបានចេញមកបាញ់រះធ្វើឲ្យប៉ូលិសបីនាក់របួស ដែលមា្នក់ក្នុងស្ថានភាពធ្ងន់ធ្ងរ។ អាជ្ញាធរបារាំងនិយាយថា ជនសង្ស័យស្លាប់នៅក្នុងការវាយសម្រុកចូលរបស់ប៉ូលិស។ តើជនសង្ស័យស្លាប់ដោយលោតពីផ្ទះ ឬត្រូវគ្រាប់ប៉ូលិសមុននឹងធ្លាក់ស្លាប់មកលើដី?
តាំងពីព្រឹកថ្ងៃព្រហស្បតិ៍ គឺឈានចូលដល់ថ្ងៃទី ពីរនៃប្រតិបត្តិការចាប់ជនសង្ស័យ នៅខេត្តToulouse មានការបារម្ភដែលថា ជនសង្ស័យ អាចបាញ់សម្លាប់ខ្លួនឯង ព្រោះថា តាំងពីព្រឹកព្រលឹម ជនសង្ស័យបាននិយាយថា គេចង់បាញ់សម្លាប់ខ្លួនដោយអាវុធ។ នៅពេលប៉ូលិសប្រើគ្រឿងបំផ្ទុះទ្វារបង្អួចផ្ទះ នៅម៉ោង៥ព្រឹក គេឮសំឡេងបាញ់កាំភ្លើងពីរគ្រាប់ ប៉ុន្តែ គេមិនដឹងច្បាស់ថា ហេតុអ្វី បានជាជនល្មើសបាញ់នោះទេ។ គឺចាប់ពីម៉ោងនោះ ដែលគេលែងឃើញមានប្រតិកម្មតបពីជនសង្ស័យទៀត។ ដោយគ្មានឃើញសំឡេងតបតអ្វី ពីជនសង្ស័យ និងដោយបានទទួលព័ត៌មានពីគ្រោះថ្នាក់ខ្លាំងរបស់ជនល្មើស ប៉ូលិសក៏បានទទួលបញ្ជារឲ្យសម្រុកចូលទៅក្នុងផ្ទះ តែមិននឹកស្មានថា ជនសង្ស័យរូបនេះមានល្បិចកល និងសាហាវខ្លាំងបែបនេះទេ។
នេះរឹតតែបង្ហាញថា ជនសង្ស័យមានហិង្សាពេញខ្លួន មិនព្រមចុះចាញ់ដោយងាយៗឡើយ។ មុននឹងសម្រេចលោតសម្លាប់ខ្លួន គេនៅបានបាញ់រះទៅលើប៉ូលិស ដោយសង្ឃឹមថា នឹងធ្វើឲ្យមានអ្នកស្លាប់ច្រើននាក់ ដោយស្នាដៃខ្លួន។
គួរបញ្ជាក់ថា ក្នុងពេលចរចាជាមួយប៉ូលិស ជនសង្ស័យ Mohamed Merahបាននិយាយថា ខ្លួនគេធ្លាប់ទទួលការបណ្តុះបណ្តាលពីក្រុមជីហាតដែលជាបណ្តាញរបស់ ក្រុមអាល់កៃដា។ គេបាញ់សម្លាប់កុមារជ្វីវដើម្បីសងសឹកឲ្យកុមារប៉ាឡេស្ទីន ចំណែកទាហានបារាំងដែលគេបាញ់សម្លាប់ គឺដើម្បីសងសឹកបារាំងដែលបើកប្រតិបត្តិការយោធានៅប្រទេស អាហ្វហ្គានីស្ថាន
ដោយពិតទៅ ប៉ូលិសបារាំងបានចំណាយពេលចរចាជាងមួយថ្ងៃ និងមិនចង់សម្រុកចូលទាំងកំរោល ទៅក្នុងផ្ទះរបស់ជនសង្ស័យ ព្រោះតែគេចង់ចាប់ជនសង្ស័យទាំងរស់ ដោយឲ្យជនសង្ស័យចុះចាញ់ទម្លាក់អាវុធ។ នេះជាជម្រើសនយោបាយ និងផ្នែកយុត្តិធម៌ ដែលលោកប្រធានាធិបតីបារាំងចង់បាន។ គឺគេចង់ចាប់ជនសង្ស័យទាំងរស់យកមកកាត់ទោសនៅតុលាការ។ ម្យ៉ាងទៀត ក៏នៅចង់ដឹងថា តើជនសង្ស័យ Mohamed Merah សម្លាប់មនុស្សដោយចិត្តឯង ឬក៏ទទួលបញ្ជាពីក្រុមភេរវជនណាមួយ។
Mohamed Merahនេះជាមនុស្សស្ងៀមស្ងាត់ និងចិត្តល្អជាមួយអ្នកជិតខាងMohamed Merah អាយុ ២៣ឆ្នាំ ជាជនជាតិបារាំង ដើមកំណើតអាល់ហ្សេរី។ គេកើត និងធំដឹងក្តីនៅសង្កាត់មួយដែលសម្បូរដោយសកម្មភាពជួញដូរថ្នាំញៀន។ ដោយមានពិន្ទុមិនសូវល្អក្នុងថ្នាក់ Mohamed Merahបានបែរមកចាប់អារម្មណ៍ចុះឈ្មោះនៅសាលាទាហានជើងគោកបារាំង ប៉ុន្តែ Mohamed Merahត្រូវគេទម្លាក់មិនរើសចូលដោយសារតែប្រវត្តិថ្កោលទោសនៅតុលាការ។ យុវជនរូបនេះធ្លាប់ប៉ូលិសចាប់បានជាញយដងដោយបទល្មើស លួចទ្រព្យសម្បត្តិគេ និងប្រើបណ្ណបើកបរក្លែងក្លាយ។
គេជឿថា នៅក្នុងពេលជាប់គុក Mohamed Merahជួបពួកអ៊ីស្លាមជ្រុលនិយម។ នៅក្រោយពេលចេញពីគុក គឺនៅឆ្នាំ២០១០ យុវជនរូបនេះបានចំណាយលុយផ្ទាល់ខ្លួន ធ្វើដំណើរទៅប្រទេសអាហ្វហ្គានីស្ថាន និងប៉ាគីស្ថាន។
Mohamed Merahបាននិយាយប្រាប់ប៉ូលិសថា គេបានទទួលការហ្វឹកហាត់ពីក្រុមជីហាតរបស់បណ្តាញអាល់កៃដា នៅតំបន់មួយក្នុងទឹកដីអាហ្វហ្គានីស្ថាន។ គឺទាហានអាមេរិកាំងដែលចាប់បញ្ជូន Mohamed Merahមកបារាំងវិញ បន្ទាប់ប៉ូលិសអាហ្វហ្គានីស្ថានចាប់ឃាត់ខ្លួនគេពីបទប្រើប័ណ្ណបើកបរ ខុសច្បាប់។ នៅចុងឆ្នាំមុននេះ គេបានទៅប៉ាគីស្ថានម្តងទៀត ប៉ុន្តែ ត្រូវបញ្ជូនមកវិញដោយសារមានជម្ងឺថ្លើម។ តាំងពីពេលនោះមក Mohamed Merahត្រូវចុះក្នុងបញ្ជីខ្មៅរបស់ភ្នាក់ងារស៊ើបការសម្ងាត់បារាំង។ លើកនេះ ដើម្បីតាមរកឲ្យឃើញ Mohamed Merah ថាមាន ជាប់ពាក់ព័ន្ធនឹងករណីបាញ់សម្លាប់ ទាហាន និងគ្រូ និងសិស្សសាលាជ្វីវ ប៉ូលិសបានប្រើព័ត៌មានរបស់ក្រុមភ្នាក់ងារស៊ើបការសម្ងាត់ រួមជាមួយនឹងទិន្ន័យនៅអិនធ័រណេត ដែលជនល្មើសបានប្រើដើម្បីរកទិញម៉ូតូ ប្រើប្រាស់ក្នុងការបាញ់សម្លាប់ទាហាន។
មិត្តភក្តិ និងអ្នកជិតខាងរបស់ Mohamed Merahនិយាយថា ជនសង្ស័យរូបនេះ មានចរិតស្ងៀមស្ងាត់ រាក់ទាក់ និងមិនចាប់អារម្មណ៍ពីរឿងនយោបាយ ឬសាសនាអ្វីទេ។ គេធ្លាប់ធ្វើការនៅក្រុមហ៊ុនជួសជុលរថយន្តមួយ និងទទួលបានប្រាក់ខែតិចតួចប៉ុណ្ណោះ។
ក្នុងរឿងនេះ បងប្អូនប្រុសពីរនាក់របស់ Mohamed Merahដែលប៉ូលិសរកឃើញថា គំនិតអ៊ីស្លាមជ្រុលនិយម និងចូលដៃជាមួយ Mohamed Merahត្រូវប៉ូលិសឃុំដើម្បីស៊ើបអង្កេត៕ RFI
0 មតិ:
Post a Comment