ប្រធានាធិបតីចិនលោក ហ៊ូ ជិនតាវ បានយល់ព្រមលើកយកបញ្ហាសមុទ្រចិនប៉ែកខាងត្បូងមកដោះស្រាយនៅក្នុង ក្របខ័ណ្ឌអាស៊ាន និងចិន។ ការយល់ព្រមបែបនេះត្រូវបានប្រកាសឡើង បន្ទាប់ពីជំនួបពិភាក្សាទ្វេភាគីរវាងលោក ហ៊ូ ជីនតាវ និងលោកនាយករដ្ឋមន្ត្រី ហ៊ុន សែន នៅព្រឹកថ្ងៃសៅរ៍នេះ នៅឯវិមានសន្តិភាព ទីស្តីការគណៈរដ្ឋមន្ត្រី។ យ៉ាងណាក៏ដោយ មេដឹកនាំចិនមិនឲ្យលើកយកបញ្ហានេះទៅជជែកក្នុងក្របខណ្ឌអន្តរជាតិផ្សេង ក្រៅពីអាស៊ាន និងចិនឡើយ។
បញ្ហាសមុទ្រចិនខាងត្បូងហាក់បានវិវឌ្ឍទៅមុខមួយជំហានទៀត នៅថ្ងៃនេះ បន្ទាប់ពីជំនួបពិភាក្សាទ្វេភាគីរវាងប្រធានាធិបតីចិន លោក ហ៊ូ ជិនតាវ ជាមួយលោកនាយករដ្ឋមន្ត្រី ហ៊ុន សែននៅទីក្រុងភ្នំពេញនៅព្រឹកថ្ងៃសៅរ៍នេះ។ ទីបំផុតទៅ ចិនបានយល់ព្រមឲ្យលើកយកបញ្ហាសមុទ្រចិនប៉ែកខាងត្បូងមកពិភាក្សា និងដោះស្រាយនៅក្នុងក្របខ័ណ្ឌអាស៊ាន និងចិន។ នេះបើយោងតាមលោក ស្រ៊ី ថាមរុង្គ ទីប្រឹក្សាលោកនាយករដ្ឋមន្ត្រី ហ៊ុន សែន ដែលបាននាំពាក្យស្តីពីលទ្ធផលនៃកិច្ចពិភាក្សាមកប្រាប់អ្នកកាសែត បន្ទាប់ពីជំនួបរយៈពេលជាងមួយម៉ោង។ យ៉ាងណាក៏ដោយ លោក ហ៊ូ ជិនតាវ បានបញ្ជាក់ប្រាប់លោកនាយករដ្ឋមន្ត្រី ហ៊ុន សែនថា បញ្ហានេះត្រូវដោះស្រាយតែក្នុងក្របខ័ណ្ឌអាស៊ានប៉ុណ្ណោះ តែមិនមែនក្របខណ្ឌអន្តរជាតិដទៃទៀតទេ។
គួរបញ្ជាក់ថា ប្រទេសសមាជិកអាស៊ានចំនួន៤គឺ វៀតណាម ម៉ាឡេស៊ី ប៊្រុយណេ និងហ្វីលីពីន សុទ្ធតែមានទំនាស់ជាមួយចិនស្តីពីការដណ្តើមកាន់កាប់ប្រជុំកោះ Paracels និង Spratleys នៅក្នុងដែនសមុទ្រចិនខាងត្បូង។ រហូតមកទល់នឹងពេលថ្មីៗនេះ ចិនបានបង្ហាញជំហរយ៉ាងម៉ឺងម៉ាត់ថា បញ្ហានេះត្រូវតែដោះស្រាយជាទ្វេភាគីរវាងចិន និងគូទំនាស់នីមួយៗ។ ទីក្រុងប៉េកាំងបានបដិសេធយ៉ាងដាច់ខាតមិនឲ្យជម្លោះនេះក្លាយជា បញ្ហាអន្តរជាតិដូចការទាមទាររបស់សហរដ្ឋអាមេរិកនិងប្រទេសដែលស្និទ្ធ នឹងអាមេរិកឡើយ សូម្បីតែក្នុងក្របខ័ណ្ឌអាស៊ានក៏ដោយ។
កាលពីប៉ុន្មានថ្ងៃមុននេះ រដ្ឋមន្ត្រីការបរទេសកម្ពុជា លោក ហោ ណាំហុង ក៏បានបញ្ជាក់ដែរថា គេមិនគួរធ្វើឲ្យបញ្ហាសមុទ្រចិនខាងត្បូងក្លាយជាបញ្ហាអន្តរជាតិ ឡើយ។ ប៉ុន្តែពេលនេះ ចិនបានផ្លាស់ប្តូរជំហរវិញ ដោយសុខចិត្តឲ្យលើកយកបញ្ហានេះមកសម្របសម្រួល និងដោះស្រាយក្នុងក្របខ័ណ្ឌអាស៊ាន និងចិន។ យ៉ាងណាក៏ដោយ ទីក្រុងប៉េកាំងនៅតែរក្សាជំហរដាច់ខាតថា នឹងមិនឲ្យមានយន្តការអន្តរជាតិណាផ្សេងក្រៅពីអាស៊ានមកលូកដៃក្នុង រឿងនេះឡើយ។ នៅក្នុងជំនួបកាលពីព្រឹកមិញនេះដែរ ចិនបានសម្រេចផ្តល់ «កាដូ» ដល់កម្ពុជាជាទឹកប្រាក់ចំនួន ៤៥០លានយន់ ក្នុងនោះ ២៥០លានយ័នជាជំនួយឥតសំណង និង២០០លានយ័នទៀតជាប្រាក់កម្ចីសម្បទានសម្រាប់អភិវឌ្ឍន៍។
លោក ហ៊ូ ជីនតាវ បានមកដល់ភ្នំពេញកាលពីរសៀលថ្ងៃសុក្រម្សិលមិញ ក្នុងដំណើរបំពេញទស្សនកិច្ចរយៈពេល៤ថ្ងៃនៅកម្ពុជា។ ដំណើរមកដល់របស់មេដឹកនាំកំពូលទីក្រុងប៉េកាំងបានកើតឡើង ចំពេលដែលកិច្ចប្រជុំកំពូលអាស៊ានកំពុងតែប្រព្រឹត្តទៅនៅទីក្រុង ភ្នំពេញដែលកម្ពុជាធ្វើជាម្ចាស់ផ្ទះ។ បញ្ហាសមុទ្រចិនខាងត្បូងគឺជារឿងក្តៅមួយនៅក្នុងជំនួបកំពូលនេះ៕ RFI
0 មតិ:
Post a Comment