ព្រំ សំណាង អ្នកប្រដាល់ក្លិបកងពលទ័ពឆ័ត្រយោង៩១១ នឹងជួបសាកកណ្ដាប់ដៃជាមួយជើងចាស់ខុនរាជ ខុន រិទ្ធ អ្នកប្រដាល់ក្លិបកងពលធំអន្តរាគមន៍លេខ៣ នាល្ងាចថ្ងៃសៅរ៍ ទី១៧ ខែមិនា ឆ្នាំ២០១២ នៅលើសង្វៀនTV5 ។
អ្នកប្រដាល់ទាំងពីរនាក់នេះ ពុំធ្លាប់ដែលប៉ះគ្នាទេកន្លងមក ដោយសារតែព្រំ សំណាង ជាអ្នកប្រដាល់ស្រករក្រោយ ឯខុនរាជ ជាអ្នកប្រដាល់ជើងចាស់និងធ្លាប់មានឈ្មោះបោះសម្លេងគ្រាន់បើដែរ ។
ខុន រាជ អ្នកណាក៏ស្គាល់គេច្បាស់ដែរ តែមួយរយៈពេលចុងក្រោយនេះ គេបាត់មុខពីសង្វៀន បន្ទាប់ពីគេប្រកួតចាញ់ទូច រាជសីហ៍ អ្នកប្រដាល់ក្លិបរស្មីកុមារកំព្រាក្នុងទឹកទី៣លើសង្វៀនTV5នេះ កាលពីថ្ងៃទី២២មករា២០១២កន្លងមកនោះ ។ អ្នកលេងស្នៀតជង្គង់រូបនេះ បើកាលពីមុន គេវ៉ៃល្អណាស់ ប៉ុន្តែចាប់ពីអាក់ខានឡើងប្រកួតមួយរយៈមកនេះ គេរាងធ្លាក់ចុះអន់ ខ្សោយមែនទែន ។
ព្រំ សំណាង ថ្វីត្បិតតែជាអ្នកប្រដាល់ស្រករក្រោយ និងមានស្នៀតប្រដាល់មិនអស្ចារ្យក៏ពិតមែន ប៉ុន្តែគេប្រកួតកម្រចាញ់ណាស់ ។ សំណាង មានកាយសម្បទាល្អ ខ្ពស់ ដៃ ជើងវែង ដែលជាការអំណោយផលដល់ការប្រកួតរបស់គេ ។ គេគ្រាន់តែលើកជើងធាក់ ក៏គូប្រកួតពិបាកទប់ជាមួយនឹងគេដែរ ។ ជាមួយនេះ សំណាងដាល់ត្រង់ៗនិងអាចប្រើកែងវាយទៅលើគូប្រកួត ដែលប្រកបដោយគ្រោះថ្នាក់បំផុត ។ ប្រកួតចុងក្រោយ ព្រំ សំណាង វាយឈ្នះវ៉ោយសុធន អ្នកប្រដាល់ក្លិបរាជសីហ៍ខេត្តបន្ទាយមានជ័យដោយពិន្ទុ ។
ការជួបគ្នារវាងព្រំ សំណាង និង ខុន រាជ នេះ បើតាមក្រុមអ្នកវិភាគប្រដាល់ក្នុងស្រុកអះអាងនោះ ខុន រាជមានសង្ឃឹមតិចតួចណាស់ ក្នុងការឈ្នះលើព្រំ សំណាង ។ សំណាង អន់ទិចនិចប្រកួតមែន តែកម្លាំងចិត្តនិងកម្លាំងកាយរបស់គេ ខ្លាំងនិងល្អជាងខុនរាជ ។ ចាំមើល តើអ្នកណាឈ្នះពីរនាក់នេះ ? ។
ខុម ពិសិដ្ឋ អ្នកប្រដាល់ក្លិបអូដឹមកីឡា នឹងឡើងទូទាត់បំណុលជាមួយ វៀត ប៊ុនឌឿន អ្នកប្រដាល់សមាគមកីឡាក្រសួងការពារជាតិ ។ ខុម ពិសិដ្ឋ ធ្លាប់វាយចាញ់ប៊ុនឌឿន ពីរដងហើយកាលពីពេលកន្លងមក ។
ជួបប្រកួតជាមួយវៀត ប៊ុនឌឿន លើកនេះ មិនដឹងថាខុម ពិសិដ្ឋអាចសងសឹកយកឈ្នះលើប៊ុនឌឿនបានឬអត់នោះទេ ? ។ តែទោះជាយ៉ាងណា គេបារម្ភចំពោះពិសិដ្ឋតែមួយមុខគត់ គឺបញ្ហាកម្លាំងស៊ុហ្វ ព្រោះពិសិដ្ឋរាងចាស់ជាងប៊ុនឌឿន ។ តែបើនិយាយពីកម្លាំងចិត្ត គេមិនចាញ់ឡើយ ។ ភាគច្រើនក្នុងការប្រកួតរបស់គេ គឺផ្តួលគូប្រកួតដោយសារស្នៀតជង្គង់ ។ ប្រកួតចុងក្រោយ ពិសិដ្ឋវាយឈ្នះទី ពន្លែត អ្នកប្រដាល់ក្លិបសឹករងខេត្តសៀមរាបក្នុងទឹកទី៣ ។ តែសំរាប់ការជួបជាមួយវៀតប៊ុនឌឿន គឺខុសពីទីពន្លែត ។
វៀត ប៊ុនឌឿន ជាអ្នកប្រដាល់វ័យក្មេង មានស្នៀតប្រដាល់ល្អ កម្លាំងស៊ុហ្វរឹងមាំ ។ស្នៀតជើងរបស់ប៊ុនឌឿន គឺទាត់ខ្លាំងហើយមួយជើងៗមានទម្ងន់ធ្ងន់ណាស់ ។ ប៉ុន្តែមួយរយៈកន្លងមកនេះ គេមិនសូវឃើញឡើងប្រកួតទេ ។ គេប្រកួតចុងក្រោយ វាយចាញ់ផល សោភ័ណ្ឌ អ្នកប្រដាល់ក្លិបតាឡីដំរីមានរិទ្ធក្នុងទឹកទី៤ ។
ឆាំ រ៉ែម អ្នកប្រដាល់ក្លិបសឹង្ហៈកីឡា នឹងជួបប្រកួតជាមួយ ម៉ន វិរៈ អ្នកប្រដាល់ក្លិបព្រែកឯងកីឡា ។ពួកគេទាំងពីរនាក់នេះ មិនធ្លាប់ដែលជួបគ្នាឡើយ ។
ម៉ន វិរៈ ជាអ្នកប្រដាល់វ័យក្មេង ដែលមានចិត្តធំ ស្នៀតប្រដាល់ល្អនិងខ្លាំង វ៉ៃមិនដកដៃទេ ។ ជាទម្លាប់របស់គេ កាលណាគេត្រូវគូប្រកួតវ៉ៃត្រូវឈឺសាច់នោះ វិរៈចូលវ៉ៃប្ដូរវិញហើយ ទោះឈ្នះឬចាញ់គេមិនគិតទេ ធ្វើយ៉ាងណាសងសឹកគូប្រកួតភ្លាមៗតែម្តង ។គេមិនដែលប៉ះជើងចាស់ដូចឆាំរ៉ែមនេះទេ តែបើអ្នកប្រដាល់ស្រករគ្នាវិរៈវ៉ៃមិនដែលចាញ់ឡើយ ។ ប្រកួតចុងក្រោយ ម៉ន វិរៈ វាយឈ្នះថៃ ណារិន អ្នកប្រដាល់ក្លិបក្រុងប៉ោយប៉ែតក្នុងទឹកទី៤ ។
ឆាំ រ៉ែម មួយរយៈពេលចុងក្រោយនេះ ក៏មានការរីកចំរើនច្រើនដែរក្នុងការប្រកួត ។ អ្នកប្រដាល់រូបនេះ មានស្នៀតកណ្តាប់ដៃល្អ ជើងទាត់ ជង្គង់កែង ក៏គួរសមដែរ ។ ប្រកួតចុងក្រោយ គេវាយឈ្នះ រាជសីហ៍ ចាន់ឌី អ្នកប្រដាល់ក្លិបសំរែករាជសីហ៍បង្ក្រាបគ្រឿងញៀនដោយពិន្ទុ ។ ឆាំ រ៉ែម ជួបម៉ន វិរៈលើកនេះ ក៏ពិបាកដែរ ។ បើឈ្នះវិរៈ ក៏ឈ្នះទាំងវេទនាដែរ ។ប៉ុន្តែយ៉ាងណាមិនទាន់អាចសន្និដ្ឋានមុនបានទេអំពីរឿងឈ្នះចាញ់នេះ ។
ចាន់ ពៅ អ្នកប្រដាល់ក្លិបខេមរៈខ្លាហោះ នឹងជួបជាមួយ អ៊ុំ ចន្នី អ្នកប្រដាល់ក្លិបរស្មីកុមារកំព្រា ។ ពួកគេជាអ្នកប្រដាល់ថ្មីដូចគ្នា ហើយប្រកួតគ្នាក្នុងប្រភេទទម្ងន់៦៣,៥០០គ.ក្រ ។ អ្នកណាឈ្នះ អ្នកណាចាញ់នោះ មិនអាចទាយមុនបានឡើយ ៕
0 មតិ:
Post a Comment