រាជធានីភ្នំពេញ ៖ ផាវ ភឿត មកពីក្លឹបកងពលធំអន្តរាគមន៍លេខ៣ព្រះវិហារ បានយកឈ្នះសរ សី មកពីក្លឹបកីឡាប្រដាល់ក្រសួងការពារជាតិ ដោយពិន្ទុ ប្រកួតនៅលើសង្វៀន CTN ថ្ងៃអាទិត្យទី៤ មីនា ខណៈ សុខ ចិន្តា មកពីក្លឹបឃ្លាំងមឿងកីឡាយកឈ្នះគិន សម្បូរមកពីក្លឹបរកាខ្លុរគុនខ្មែរដោយពិន្ទុដូចគ្នា។ ផាវ ភឿតនិងសរ សី ធ្លាប់ជួបគ្នាជាច្រើនលើកច្រើនសារួចមកហើយ និងធ្លាប់ចាញ់-ឈ្នះទៅវិញទៅមកជាធម្មតា ប៉ុន្តែផាវ ភឿតធ្លាប់ឈ្នះច្រើនជាង ។
ការជួបគ្នាលើកនេះ សរ សី ហាក់ដូចជាច្រឡោតបន្តិច គ្រាន់តែចាប់ផ្តើម ភ្លាម សរ សីបញ្ចេញស្នៀតកណ្តាប់ដៃនិងកែងវាយសន្ធាប់ទៅលើផាវ ភឿតតែម្តង ប៉ុន្តែត្រូវផាវ ភឿតទាត់សងមកវិញយ៉ាងរហ័ស ។ សរ សី វាយតាមរបៀបកំរោល ជួនពេលបានលោតពុះកែងសំដៅលើក្បាលរបស់ផាវ ភឿតតែត្រូវអាជ្ញាកណ្តាលព្រមានជាប់រហូត ។ ចូលដល់ទឹកទី៣និងទី៤ សរ សី នៅតែវាយសំរុកទៅលើផាវ ភឿត ប៉ុន្តែមិនសូវជាបានផលប៉ុន្មានទេ ។ ចូលដល់ទឹកទី៥ កម្លាំងសរ សី ចាប់ផ្តើមស្រុតចុះធ្វើឱ្យផាវ ភឿតមានឱកាសវាយតាមចិត្ត យកឈ្នះពិន្ទុតែម្តង ។
គិន សម្បូរ និងសុខ ចិន្តា ចាញ់-ឈ្នះគ្នាខាងកម្ពស់ឆ្ងាយណាស់ ។ សម្បូរ ដែលមានប្រៀបកម្ពស់ជាងនោះ បានបញ្ជូនស្នៀតជង្គង់វាយទៅលើពោះទឹក សុខ ចិន្តាយ៉ាងសាហាវ ។ តែទម្ងន់នៃការបុកជង្គង់របស់គេមិនសូវជាធ្ងន់ប៉ុន្មានឡើយ ជាពិសេស នៅទឹកទី១និងទី២ ដែលសម្បូរចាប់ផ្តើមវាយសង្រ្គប់មកលើ ចិន្តា ។ រីឯស្នៀតកណ្តាប់ដៃរបស់សម្បូរវាយចេញមិនបានចំ គោលដៅល្អឡើយ ។ ទឹកទី៣និងទី៤ ចិន្តាបានព្យាយាមចូលកៀកបញ្ជូនកណ្តាប់ដៃវាយមកលើផ្ទៃមុខសម្បូរ ពេញៗធ្វើឱ្យសម្បូរចាប់ផ្តើមស្រុតចុះកម្លាំងយ៉ាងខ្លាំងនៅទឹកទី៤និងទី៥ ។ សុខ ចិន្តាដែលមានជំហរទាបជាងនោះ បានវាយចំៗគោលដៅទីបំផុត ចិន្តាអាចយកឈ្នះពិន្ទុសម្បូរ ។
ជ័យ ស៊ីនេត មកពីក្លឹបឃ្លាំងមឿងកីឡាបានយកឈ្នះ ធិន សុវណ្ណ មកពីក្លឹបកងពលតូចលេខ៧០ ដោយពិន្ទុ ។ ទឹកទី១ដល់ទឹកទី៣ ស៊ីនេត ប្រៀបបាននឹងដំរីចុះប្រេង គេបានដេញវាយសុវណ្ណឱ្យរត់ពេញផ្ទៃសង្វៀន ប៉ុន្តែចូលដល់ទឹកទី៤និងទី៥ ស៊ីនេតស្រុតចុះកម្លាំងបន្តិចតែទោះជាយ៉ាងណាក៏គេនៅតែអាចយកឈ្នះពិន្ទុសុវណ្ណបានដដែល ។ ម៉ន វិរៈ មកពីក្លឹបព្រែកឯងកីឡាវាយផ្តួលថៃ ណារិន មកពីក្លឹបក្រុងប៉ោយប៉ែត ឱ្យចុះចាញ់នៅត្រឹមទឹកទី៤ ៕
0 មតិ:
Post a Comment