ថ្ងៃទី៨ មេសា ២០១២
ភ្នំពេញ: ប្រសិនអ្នកមានបំណងបញ្ចុះទម្ងន់ ដើម្បីឱ្យខ្លួនឯងមើលទៅមានរាងសមសួនជាងនោះ កុំភ្លេចបំពេញបន្ថែមទឹកជាប្រចាំឱ្យសរីរាង្គ។
ផឹកទឹកធ្វើឱ្យអ្នកភ្លេចឃ្លាន
គេបានបញ្ជាក់បានថា អ្នកដែលផឹកទឹកច្រើនជាងនោះ ពុំសូវមានអារម្មណ៍ឃ្លានជាង ព្រោះទឹកអាចកម្ចាត់ចោលអារម្មណ៍ឃ្លានយ៉ាងមានប្រសិទ្ធភាព។
ទឹកជួយបញ្ចុះកូឡេស្តេរ៉ូល
ទឹកមានឥទ្ធិពលខ្លាំងទៅដល់កូឡេស្តេរ៉ូល ហើយនឹងធ្វើឱ្យថយចុះបរិមាណកូឡេស្តេរ៉ូលក្នុងសរីរាង្គ អាចជួយឱ្យអ្នកប្រែជាមានរាងរៀវស្តើងជាង។
ទឹកជួយធ្វើឱ្យសាច់ដុំហាប់ណែន
ប្រសិនសាច់ដុំរបស់អ្នកត្រូវបាត់បង់ទឹក នោះនឹងគ្មានភាពហាប់ណែនបន្តិចណាឡើយ ទោះបីអ្នកអំណត់ហ្វឹកហាត់ដល់កម្រិត។ ដូច្នេះកុំភ្លេចបំពេញទឹកឱ្យបានច្រើន អ្នកនឹងអាចបានឃើញការប្រែប្រួល។
ទឹកចាំបាច់សម្រាប់ការរំលាយអាហារ
ប្រព័ន្ធរំលាយអាហារទាមទារទឹកយ៉ាងច្រើនក្នុងមួយថ្ងៃៗដើម្បីធ្វើការ។ ប្រសិនអ្នកមិនផ្គត់ផ្គង់ទឹកគ្រប់គ្រាន់ អ្នកនឹងមានអារម្មណ៍ថាខ្លួនឯងហើមលឹប និងអស់កម្លាំង។
ទឹកជួយឱ្យថ្លើមធ្វើសកម្មភាពល្អ
ថ្លើមទទួលភារៈបំប្លែងសារជាតិខ្លាញ់ នេះជារឿងសំខាន់អស្ចារ្យ ប្រសិនអ្នកកំពុងចង់បញ្ចុះទម្ងន់។ ប៉ុន្តែថ្លើមទាមទារបរិមាណទឹកដ៏ធំមួយដើម្បីអនុវត្តន៍ជោគជ័យភារកិច្ចនេះ។ ប្រសិនអ្នកមិនផឹកទឹកគ្រប់គ្រាន់ ថ្លើមនឹងសន្សំស្តុកបរិមាណជាតិខ្លាញ់ បង្កការលំបាកដល់ដំណើរការបញ្ចុះទម្ងន់។
ទឹកអាចធ្វើឱ្យធូរស្រាលបញ្ហាផ្លូវរំលាយអាហារ
ប្រសិនអ្នកកំពុងជួបបញ្ហាអំពីរំលាយអាហារ ចូរសាកផឹកទឹកប៉ុន្មានកែវ។ វិធីនេះនឹងជួយប្រព័ន្ធរំលាយអាហារចាប់ផ្តើមសកម្មភាពឡើងវិញ ព្រោះខ្វះទឹក នឹងបណ្តាលឱ្យដំណើរការរំលាយអាហារទាំងមូលត្រូវអាក់ខាន។
បរិមាណទឹកល្មមគ្រប់គ្រាន់ជួយឱ្យសរីរាង្គមិនត្រូវដក់ទឹក
ប្រសិនអ្នកផឹកទឹកមិនគ្រប់ជាប្រចាំ សរីរាង្គអ្នកនឹងសន្សំស្តុកទឹកដើម្បីបំពេញទៅក្នុងបរិមាណទឹកខ្វះ។ ការសន្សំស្តុកនេះ អាចធ្វើឱ្យអ្នកឡើងថែមប៉ុន្មានគីឡូ និងមើលទៅហើមលឹបគ្រប់ពេល។
ទឹកជួយឱ្យអ្នកមិនច្រឡំរវាងភាពឃ្លាន និងស្រេក
អ្នកនឹងងាយច្រឡំថាខ្លួនឃ្លាន ក្នុងពេលការពិតនោះគឺអ្នកកំពុងស្រេក។ ដូច្នេះចូរផឹកទឹកដើម្បីពិនិត្យបញ្ជាក់រឿងនេះមុនពេលទទួលទានបន្ថែមរបស់អ្វី។
ទឹករក្សាសំណើមស្បែក និងជួយឱ្យស្បែកទន់ភ្លឺថ្លា
ពួកតារាបង្ហាញម៉ូត សុទ្ធតែផឹកទឹកប្រមាណពីរលីត្រក្នុងមួយថ្ងៃ ដើម្បីធានាឱ្យស្បែកជានិច្ចកាលរក្សាបានសំណើម និងមើលទៅស្អាតភ្លឺរលោង ។ ពេលបញ្ចុះទម្ងន់ ស្បែកអ្នកក៏ត្រូវឆ្លងកាត់ការប្រែប្រួលជាច្រើន ហើយប្រាកដណាស់ថាវានឹងត្រូវការទឹកយ៉ាងច្រើនដើម្បីរក្សាតុល្យភាព។
ទឹកកម្ចាត់ជាតិពុលចេញពីសរីរាង្គ
ប្រការសំខាន់ពេលបញ្ចុះទម្ងន់ គឺអ្នកត្រូវរក្សាបានសុខភាពល្អ ហើយវិធីសាមញ្ញនិងមានប្រសិទ្ធភាពបំផុត គឺផឹកទឹកច្រើន។ ទឹកនឹងជួយលាងជម្រះសារជាតិពុលចេញពីសរីរាង្គ ជួយឱ្យសរីរាង្គអ្នកស្អាតជាងនិងរឹងមាំជាង។
អ្នកជំនាញការទូន្មានថា គួរផឹកទឹក ២,២ លីត្រក្នុងមួយថ្ងៃ ចំពោះស្ត្រីដែលមិនសូវមានសកម្មភាព៕
0 មតិ:
Post a Comment