បន្ទាប់ពីមានការបិណ្ឌបាតរបស់សម្ដេចព្រះសង្ឃរាជ្យ និងសេចក្ដីជូនដំណឹងរបស់រដ្ឋាភិបាល ហាមប្រាមការដាក់តាំងគោដុត មិនបានជោគជ័យទាំងស្រុង ប្រមុខរដ្ឋាភិបាលកម្ពុជា បានចេញមុខធ្វើអន្តរាគមន៍។
ហ៊ុន សែន៖ «បើមិនដាក់អ៊ីចឹងគេថាលក់មិនដាច់។ ឥឡូវដើម្បីឆ្លើយតបទៅនឹងការបិណ្ឌបាត្ររបស់ព្រះសង្ឃ ខ្ញុំសូមអំពាវនាវឲ្យគ្រប់ភោជនីយដ្ឋានដែលធ្លាប់ដុតគោយកមកដាក់ អ៊ីចឹង វាឃើញទិដ្ឋភាពសាហាវឃោរឃៅពេក! របៀបដូចជានៅទីផ្សារមួយចំនួន គេយកស្វាមកទាំងរស់ ហើយចោះក្បាលនោះ កោតតែស៊ីកើត! សូមឲ្យយកចិត្តទុកដាក់គ្រប់ទីកន្លែងទាំងអស់។ រឿងនេះជាបែបហិង្សាមួយមិនត្រូវនឹងធម៌ព្រះពុទ្ធទេ។ យើងដាក់ទៅស្លាក "គោដុតឆ្ងុយឆ្ងាញ់" កុំយកគោទៅដាក់នៅហ្នឹង...»។
លោកនាយករដ្ឋមន្ត្រីបានប្រកាសបង្គាប់អោយមន្ត្រីអនុវត្តច្បាប់ចាត់វិធានការអោយបានម៉ឺងម៉ាត់៖ «អ៊ីចឹង ត្រូវតាមដានត្រួតពិនិត្យអាហ្នឹងផង ដើម្បីចៀសវាងនូវការដែលយើងបានដាក់ចេញ ព្រះសង្ឃបិណ្ឌបាត្រ រាជរដ្ឋាភិបាលបានឯកភាពហើយបែរជាមិនអនុវត្ត។ ហើយបើសិនជាភោជនីយដ្ឋានណាដែលគាត់មិនធ្វើតាម បិទភោជនីយដ្ឋានហ្នឹងចោលទៅ...។ កន្លងទៅខ្ញុំដឹងថានៅមាននៅឡើយទេ»។
កន្លងមកបញ្ហាមួយចំនួនដែលបានកើតឡើង គេសង្កេតឃើញថា មន្ត្រីដែលមានតួនាទីអនុវត្តច្បាប់មិនបានចាត់ការតាមផ្លូវច្បាប់ ទេ ប៉ុន្តែរង់ចាំរហូតដល់មានបញ្ជាប្រកាសផ្ទាល់មាត់ពីលោក នាយករដ្ឋមន្ត្រី ហ៊ុន សែន ទើបមានការអនុវត្ត។ ឧទាហរណ៍ដូចជាបញ្ហាកុងត្រូលជជុះ និងពេលថ្មីៗនេះ ការចាប់ខ្លួនសន្តិសុខការពារក្រុមហ៊ុនធីធីវ៉ាយ (TTY) ពីរនាក់ ដែលបានបាញ់ពលរដ្ឋ ៤នាក់ ឲ្យរងរបួសធ្ងន់នៅឃុំ២ធ្នូ ស្រុកស្នួល ខេត្តក្រចេះ ជាដើម។
ដូច្នេះការអនុវត្តច្បាប់ល្អនាំអោយមានការពង្រឹងនីតិរដ្ឋ ឬការយកច្បាប់ជាធំដែលនាំអោយមានស្ថិរភាពសង្គមដែលផ្ទុយទៅនឹង ការយកបុគ្គលជាធំ៕
0 មតិ:
Post a Comment