ក្រចេះ : សន្តិសុខក្រុមហ៊ុន TTY ពីរនាក់ ក្នុងចំណោម ៣ នាក់ ដែលបានបាញ់កាំភ្លើង មកលើប្រជាជនតវ៉ា រឿងដីធ្លីកន្លងមក ត្រូវបានសាលាដំបូង ខេត្តក្រចេះ សាកសួរ កាលពីថ្ងៃម្សិលមិញ ទាក់ទងនឹងការប្រើប្រាស់ អាវុធខុសច្បាប់ និង ការប្រព្រឹត្តអំពើហិង្សា ដោយចេតនា។ នេះបើយោងតាមមន្ត្រីតុលាការ និងអាជ្ញាធរខេត្ត។
លោក ហាក់ ហ៊ន ព្រះរាជអាជ្ញារង បានឲ្យដឹងថា នគរបាល បានចាប់ខ្លួនអ្នកទាំងពីរ កាលពីថ្ងៃសៅរ៍ ហើយ តុលាការបានធ្វើការសាកសួរ អ្នកទាំងពីរនោះ កាលពីថ្ងៃអាទិត្យម្សិលមិញ។ លោក មានប្រសាសន៍ថា៖ «ឥឡូវនេះ ពួកគេកំពុងត្រូវបានសាកសួរដោយចៅក្រមស៊ើបសួរ»។
លោក ថា ពួកគេ ត្រូវបានចោទប្រកាន់ពីបទ ប្រើអាវុធខុសច្បាប់ តាមមាត្រា ២០ នៃច្បាប់គ្រប់គ្រងអាវុធ និងអំពើហិង្សាដោយចេតនាតាមមាត្រា ២១៨ នៃក្រមព្រហ្មទណ្ឌ។
លោក ហាក់ ហ៊ន បានបន្ថែមទៀតថា៖ «ផ្អែកតាមរូបភាព មានម្នាក់ឈរកាន់កាំភ្លើង ម្នាក់កាន់អាយកូម ដូច្នេះយើងមិនដឹងច្បាស់ទេថាតើពួកគេនឹងនិយាយអ្វីនៅតុលាការនោះ ទេ»។
កាលពីសប្តាហ៍មុន លោកនាយករដ្ឋមន្រ្តី ហ៊ុន សែន បានបញ្ជាឲ្យឧកញ៉ា ណា ម៉ារឌី ម្ចាស់ក្រុមហ៊ុន ប្រគល់អ្នកបាញ់មកឲ្យអាជ្ញាធរដើម្បីចាត់ការតាមនីតិវិធីច្បាប់។
លោក ម៉ៅ រ៉ាន់នី មេបញ្ជាការរងនៃកងរាជអាវុធហត្ថខេត្តក្រចេះ បានថ្លែងថា សន្តិសុខទាំងពីរនាក់នោះ ត្រូវបានចាប់ខ្លួន នៅថ្ងៃទី ៤ ខែកុម្ភៈ នៅការិយាល័យក្រុមហ៊ុន TTY ក្នុងរាជធានី ភ្នំពេញ ដែលមានឈ្មោះ កែ សុវណ្ណា និងយ៉ុន ឆៃណា។ លោកបានបន្តទៀតថា៖ «ក្រុមហ៊ុនបានសហការជាមួយនឹងអាជ្ញាធរ ហើយប្រើល្បិចបោកអ្នកទាំងពីរ ដោយហៅពួកគេមកការិយាល័យ ហើយបន្ទាប់មកចាប់ខ្លួនពួកគេបញ្ជូនមកអាជ្ញាធរ»។
លោក គៀត ច័ន្ទថារិទ្ធ អ្នកនាំពាក្យនគរបាលជាតិ បានថ្លែងថា សន្តិសុខក្រុមហ៊ុន ២ នាក់ ត្រូវបានចាប់ខ្លួននៅវេលាម៉ោង ១០ ព្រឹក ថ្ងៃទី៤ ខែកុម្ភៈ ហើយត្រូវបាននាំខ្លួនទៅខេត្តក្រចេះ ដើម្បីចាត់ការតាមនីតិវិធី បន្ទាប់ពីក្រុមហ៊ុននាំអ្នកទាំងពីរមកឲ្យនគរបាលនៅក្រសួងមហា ផ្ទៃ។ លោក បានបន្ថែមថា៖ «ក្នុងរូបភាព មានមនុស្សម្នាក់ឈរបាញ់ប្រជាជន និងម្នាក់ទៀតកាន់អាយកូម ដូច្នេះ ខ្ញុំមិនដឹងថា យើងមានមនុស្សទី៣ ឬយ៉ាងណានោះទេ»។
លោក ហេង សារ៉ាត អគ្គនាយករងនៃក្រុមហ៊ុន TTY បានបញ្ជាក់ថា៖ «យើងទូរស័ព្ទហៅពួកគេមកពីស្រុកកំណើតក្នុងខេត្តព្រះវិហារ និងខេត្តបាត់ដំបង ឲ្យមកការិយាល័យនៅភ្នំពេញ ហើយបន្ទាប់មកយើងបានចាប់ខ្លួនពួកគេ ដើម្បីប្រគល់ឲ្យនគរបាល»។
លោក បានបន្ថែមថា បុរសដែលឈរកាន់កាំភ្លើងបាញ់លើប្រជាជនមានឈ្មោះ កែ សុវណ្ណា អាយុ ៤១ ឆ្នាំ ហើយបុរសដែលកាន់អាយកូមឈ្មោះ យ៉ុន ឆៃណា អាយុ ២៦ ឆ្នាំ។ អ្នកទាំងពីរមិនធ្លាប់ធ្វើជាទាហាន ឬនគរបាលនោះទេ ពួកគេគ្រាន់តែធ្វើជាសន្តិសុខឲ្យក្រុមហ៊ុនប៉ុណ្ណោះ។ លោក បានបញ្ជាក់ថា៖ «យើងសួរពួកគេថា ពួកគេបានកាំភ្លើងមកពីណា គេឆ្លើយថា គេបានមកពីព្រៃ»។
លោក បានបន្ថែមថា មូលហេតុដែលគាត់ចាប់អ្នកទាំងពីរឲ្យនគរបាល ព្រោះក្នុងរូបភាព មានតែអ្នកទាំងពីរ ហើយលោកមិនច្បាស់ទេថាតើមានមនុស្សទី ៣ ឬអត់ហើយលោកនឹងរកមេធាវីម្នាក់ឲ្យពួកគេ។ លោក បានបន្តថា៖ «សម្តេចនាយករដ្ឋមន្រ្តី ហ៊ុនសែន អំពាវនាវឲ្យប្រគល់អ្នកបាញ់លើប្រជាជនទៅឲ្យអាជ្ញាធរ ដូច្នេះ យើងប្រគល់អ្នកទាំងពីរនោះទៅឲ្យនគរបាលរួចហើយ»។
កាលពីថ្ងៃទី១៨ ខែមករា ប្រជាជន ៤ នាក់បានរងរបួសធ្ងន់ធ្ងរ ដោយសារសន្តិសុខក្រុមហ៊ុនបាញ់កាំភ្លើងមកលើពួកគេ ពេល កំពុងតវ៉ាមិនឲ្យក្រុមហ៊ុនធ្វើការឈូសឆាយដើមដំឡូងមីរបស់ពួកគេ ហើយកាលពីថ្ងៃទី ៣១ ខែមករា ក្នុងពិធីសម្ពោធបើកផ្លូវជាតិលេខ ៧៦ លោកនាយករដ្ឋមន្រ្តី ហ៊ុន សែន បានបញ្ជាក់ក្រុមហ៊ុន TTY ដែលលោកឧកញ៉ា ណា ម៉ារឌី ជាអគ្គនាយក នាំខ្លួនអ្នកដែលបានបាញ់មកលើប្រជាជន ប្រគល់ឲ្យអាជ្ញាធរ ហើយបានព្រមានដកអាជ្ញាប័ណ្ណក្រុមហ៊ុន ដែលទទួលដីសម្បទានសេដ្ឋកិច្ច ប្រសិនបើគេប្រើអំពើហិង្សាលើប្រជាជន។
អ្នកស្រី នេត រតនា ដែលទទួលរងរបួស ពេលសន្តិសុខបាញ់កាំភ្លើងនោះ បានថ្លែងថា អ្នកស្រីសប្បាយចិត្ត ពេលអ្នកស្រីទទួលបានដំណឹងថា សន្តិសុខក្រុមហ៊ុន ដែលបាញ់អ្នកស្រីនិងអ្នកភូមិដទៃទៀត ត្រូវបានចាប់ខ្លួននោះ។ អ្នកស្រី បានបន្ថែមថា៖ «ខ្ញុំលែងបារម្ភទៀតថាសន្តិសុខក្រុមហ៊ុននឹងមករំលោភបំពានលើ ប្រជាជននិងខ្ញុំទៀតហើយ។ ខ្ញុំគ្រាន់តែចង់ឲ្យតុលាការដាក់ទោសគេតាមច្បាប់ ដើម្បីរកយុតិ្តធម៌ឲ្យពួកយើង»។
អ្នកស្រី បានបន្ថែមថា ប្រសិនបើគ្មានលោកនាយករដ្ឋមន្រ្តីចាត់វិធានការរឹងមាំលើក្រុមហ៊ុន និងអាជ្ញាធរទេ ប្រហែលនៅពេលនេះ នគរបាលនៅតែកំពុងស្វែងរកអ្នកទាំងនោះនៅឡើយទេ។ អ្នកស្រីថា ៖ «ខ្ញុំពិតជាជឿជាក់លើការសន្យារបស់សម្តេចនាយករដ្ឋមន្រ្តី។ សម្តេចធ្វើតាមពាក្យសន្យា»។
លោក ចាន់ សុវេត អ្នកស៊ើបអង្កេតជាន់ខ្ពស់នៅអង្គការសិទ្ធិមនុស្សអាដហុក បានថ្លែងថា វាជាការល្អដែលអាជ្ញាធរព្យាយាមចាប់ខ្លួនអ្នកដែលបាញ់ប្រជាជន ប្រសិនបើករណីដទៃទៀតចាត់វិធានការរឹងមាំដូចករណីនេះ វាល្អប្រសើរណាស់សម្រាប់ប្រជាជនកម្ពុជា។ លោក បានបន្ថែមថា៖«ប្រសិនបើគ្មានបញ្ជាលោកនាយករដ្ឋមន្រ្តី ខ្ញុំគិតថា នគរបាលមិនចាត់វិធានការលឿនបែបនេះនោះទេ»៕
ប្រភព៖
0 មតិ:
Post a Comment