ក្រុម Tottenham Hotspur បានចុះហត្ថលេខាទិញខ្សែការពារជម្រើសជាតិប្រេស៊ីលយុវជនអាយុក្រោម ២០ឆ្នាំ Bruno Uvini ពីក្លិប São Paulo ក្នុងតម្លៃ៣,១លានផោន ដើម្បីមកលេងនៅអង់គ្លេសនៅរដូវក្ដៅខាងមុខ បើទោះបីជាទីផ្សារដោះដូរកីឡាករនៅអង់គ្លេសបិទហើយក៏ដោយ។
Sportsmail ធ្លាប់បានប្រកាសខែមុនថា Spur ចាប់អារម្មណ៍ចង់បានខ្សែការពារកណ្ដាលអាយុ២០ ប៉ុន្តែត្រូវប្រឈមនឹងការបំពេញសំណុំបែបបទឲ្យទាន់ពេលវេលា។ ទោះជាយ៉ាងណាក៏ដោយ ក្រុម Spur ព្រមព្រៀងជាមួយ Sao Paulo ក្នុងការនាំយក Uvini មក White Hart Lane ក្នុងលក្ខណៈខ្ចីជើងជាមុនសិន មុននឹងផ្ទេរជាអចិន្ត្រៃយ៍នៅរដូវក្ដៅខាងមុខក្នុងតម្លៃប្រមាណ៣,១ លានផោន ឬប្រមាណ៥លានដុល្លារអាមេរិក។
Uvini ដែលក្រុម Arsenal និង Genoa ធ្លាប់តាមប្រមាញ់ដែរនោះ ថ្លែងនៅក្រោយកិច្ចព្រមព្រៀងជាមួយក្លិបមាន់ខ្នាយមាសថា <<នេះជាឱកាសដ៏អស្ចារ្យសម្រាប់ខ្ញុំ ហើយខ្ញុំមិនអាចបណ្ដោយឲ្យឱកាសបែបនេះរំលងផុតពីដៃរបស់ខ្ញុំទេ។ Tottenham ជាក្រុមធំជាមួយនឹងកិត្តិសព្ទល្បីល្បាញជុំវិញពិភពលោក>>។
ខ្សែការពារដែលបង្ហាញខ្លួនលេងឲ្យជម្រើសជាតិប្រេស៊ីលអាយុក្រោម ២០ឆ្នាំបាន១៣លើកដដែលនេះបន្ថែមថាគេមានពេលតែជាង៣ខែប៉ុណ្ណោះ ដើម្បីធ្វើឲ្យស៊ាំនឹងបាល់ទាត់អង់គ្លេស ក្លិបក៏ដូចជាវប្បធម៌អង់គ្លេសផងដែរ។ គេជឿជាក់ថាជីវិតរបស់គេនឹងរីកចម្រើនច្រើននៅទីនេះ៕
0 មតិ:
Post a Comment