ថ្ងៃទី ២៧ ខែមីនា ម៉ោង១០:៥៥
ភ្នំពេញ :នៅពេលដែលថ្ងៃកំណត់ចួករោងការរបស់តារាក្រមិចក្រមើម ខាត់ សុឃីម កាន់តែខិតចូលមកដល់អ្នកនាងកាន់តែជឿលើអបិ្បយជំនឿលើជីវិតគុររបស់នាង៖ «គ្រូទាយ១០ ថា ផាណូ ជាគូរបស់ខ្ញុំមួយជីវិត»។
ថ្ងៃទី១២ ខែធ្នូ ឆ្នាំ២០១២ ត្រូវបានតារាសម្បូរវោហារ ខាត់ សុឃីម និងគូដណ្តឹង អ៊ិន សុបញ្ញា ហៅ ផាណូ ចាត់ទុកថាជាថ្ងៃហុងស៊ុយ ដើម្បីដឹកដៃគ្នាចូលរោងការតាមប្រពៃណី។
តារាចម្រៀងពហុទេពកោសល្យអ្នកនាង ខាត់ សុឃីម បានភ្ជាប់ពាក្យជាមួយតារាសម្តែងវ័យក្មេងក្រោមនាង៧ឆ្នាំកាល ពីថ្ងៃទី២៣ខែកុម្ភៈឆ្នាំ២០១១ នៅគេហដ្ឋានអ្នកនាងផ្ទាល់ក្នុងបុរីជ័យជម្នះ នៅម្តុំបឹងក្រពើ ដោយមានធ្វើពិធីហែជំនូនផ្លែឈើយ៉ាងគគ្រឹកគគ្រេងប្រៀបបាននឹងពិធី រៀបអាពាហ៍ពិពាហ៍ធំមួយ ព្រមទាំងមានភ្ញៀវជាសាច់ញាតិទាំងសងខាងរួមជាមួយនឹងសិល្បករ សិល្បការិនីចូលរូមអបអរសាទរជិត២០០នាក់ឯណោះ។
ជាងមួយឆ្នាំមកនេះ បើទោះជាគូស្នេហ៍មួយគូស្ថិតក្នុងភាពយល់ចិត្តគ្នាចាក់ទឹកមិនលិច ក៏ដោយ តែពួកគេនៅតែទទួលរងការវាយប្រហារដោយពាក្យសម្ដីមិនស្ទើរដែរ អ្នកខ្លះលើកឡើងថា ពួកគេនឹងមិនធ្វើពិធីរៀបអាពាហ៍ពិពាហ៍ទេ គឺភ្ជាប់ពាក្យហើយគឺ ហើយតែម្តង ព្រោះថា ពិធីភ្ជាប់ពាក្យរបស់ពួកគេធំស្មើមង្គលការ។ ខ្លះទៀតគិតថា ចំណងនៃគូស្នេហ៍ខុសវ័យមួយគូនេះមិនអាចស្ថិតស្ថេរដល់វ័យខាំចេក របូតខាំពោតរបេះនោះទេ។ ខ្លះថា តារាវ័យ២៤ឆ្នាំអ៊ិន សុផាណូ ព្រមភ្ជាប់ពាក្យក្រមុំកូនមួយ ខាត់ សុឃីម ព្រោះតែប្រាក់ទេ ថ្ងៃណាមួយគង់តែផ្ទុះរឿងបែកបាក់ជាមិនខាន។
បើទោះជាទទួលរងនូវពាក្យសម្តីវាយប្រហារយ៉ាងធ្ងន់ៗយ៉ាងនេះក្តី ក៏តារាស្រីវ័យ៣១ឆ្នាំនិយាយថា៖ «មិនថាតែខ្ញុំសូម្បីតែគូដណ្តឹងរបស់ខ្ញុំក៏មិនដែលយករឿង នោះមកទុកក្នុងចិត្តដែរ ព្រោះថា ពួកយើងមុននឹងសម្រេចភ្ជាប់ពាក្យនឹងគ្នាគឺពួកយើងទាំងពីរបាន សម្រេចចិត្តយ៉ាងច្បាស់លាស់ណាស់ទើបឈានដល់ដំណាក់កាលនេះ»។
ដើម្បីពង្រឹងចំណងស្នេហ៍ដ៏ប្រាកដប្រជានោះ អ្នកនាងបានឲ្យដឹងថា៖ «ខ្ញុំបានស្វែងរកគ្រូទាយល្បីៗពីមួយទៅរហូតដល់ទៅជាង១០គ្រូឯណោះ ដើម្បីឲ្យគ្រូល្បីទាំងអស់នោះដេញជើងលេខមើលថាពួកយើង ទៅជាយ៉ាងណាថ្ងៃក្រោយ»។
ទាក់ទិននឹងសម្ដីគ្រូ ទាយ អ្នកនាងបាននិយាយថា៖ «លទ្ធផលគ្រូទាយល្បីៗទាំងអស់នោះគឺជើងលេខឆ្លើយដូចគ្នាទាំងអស់ ថា ផាណូ ពិតជាគូខ្ញុំពិតប្រាកដមែន ហើយពួកយើងនឹងរួមរស់ជាមួយគ្នារហូតចាស់កោងខ្នងទៀតផង»។
អ្នកនាង ខាត់ សុឃីម បានបន្តថា៖ «ថ្វីបើកាលកំណត់ចូលរោងការរបស់ខ្ញុំនៅរាងឆ្ងាយបន្តិចក្តី (៨ខែ) តែពួកខ្ញុំទាំងពីរកំពុងមមាញឹកក្នុងការទិញរបស់របរសំខាន់ៗដែល ត្រូវរៀបចំក្នុងថ្ងៃនោះ មានដូចជាគ្រឿងតុបតែងផ្ទះ សម្លៀកបំពាក់កូនកំលោះ-ក្រមុំ និងដើររើសម៉ូដធៀបការជាដើម»។
ជាមួយការត្រៀមលក្ខណៈតាំងពីចម្ងាយនេះ តារាចម្រៀងកូនមួយរូបនេះបែរជានិយាយថា៖«អាពាហ៍ពិពាហ៍របស់ ខ្ញុំនឹងមិនរៀបចំធំដុំអីប៉ុន្មានទេ គឺរៀបត្រឹមតែ២០តុប៉ុណ្ណឹងទេ ព្រោះថាពួកយើងមិនចង់ខ្ជះខ្ជាយប្រាក់ច្រើន។ សូម្បីតែពិធីទទួលភ្ញៀវក៏ខ្ញុំធ្វើនៅឯផ្ទះរបស់ខ្ញុំដែរគឺនៅ ផ្ទះដែលភ្ជាប់ពាក្យនេះម្តង៕
0 មតិ:
Post a Comment