មន្ត្រីជាន់ខ្ពស់រដ្ឋាភិបាលកម្ពុជា និងវៀតណាមបានចុះហត្ថលេខាលើអនុស្សារណៈយោគយល់ ស្តីពីការដោះដូរចំណែកដីមួយចំនួននៅតាមបណ្តោយព្រំដែន។ ការចុះហត្ថលេខានេះធ្វើឡើងរវាងលោកទេសរដ្ឋមន្ត្រីកម្ពុជាទទួលបន្ទុកកិច្ចការព្រំដែនលោក វ៉ា គឹមហុង និងអនុរដ្ឋមន្ត្រីការបរទេសវៀតណាមលោក Ho Xuan Son កាលពីថ្ងៃទី១៤មីនា ក្នុងរាជធានីភ្នំពេញ។
ការចុះហត្ថលេខាលើអនុស្សារណៈយោគយល់ ស្តីពីការដោះដូរចំណែកដីនៅកន្លែងខ្លះតាមបណ្តោយព្រំដែននេះ គឺជានីតិវិធីមួយនៃការពន្លឿនកិច្ចការព្រំដែនផងដែរ នេះបើតាមការបញ្ជាក់របស់លោក វ៉ា គឹមហុង ប្រាប់វិទ្យុបារាំងអន្តរជាតិនៅថ្ងៃព្រហស្បតិ៍នេះ។ លោកទេសរដ្ឋមន្ត្រីពន្យល់ថា ក្រោយពីបានកំណត់ខ្សែបន្ទាត់ព្រំដែនហើយ ទើបគេឃើញថា មានភូមិរបស់កម្ពុជាខ្លះបានស្ថិតនៅខាងដីនៃប្រទេសវៀតណាម ហើយក៏មានភូមិរបស់វៀតណាមខ្លះបានស្ថិតនៅលើទឹកដីកម្ពុជាវិញដែរ។ ដូច្នេះអនុស្សារណៈយោគយល់គ្នានេះបានចែងអំពីការកាត់កងទំហំដីស្មើគ្នាដើម្បីសងគ្នាទៅវិញទៅមក។ បើតាមការបញ្ជាក់របស់លោក វ៉ា គឹមហុង ការដោះដូរចំណែកដីនេះ មានច្រើនករណីនៅក្នុងខេត្តកំពង់ចាម ខេត្តស្វាយរៀង និងខេត្តតាកែវ។
កម្ពុជានិងវៀតណាមមានព្រំដែនគោករួមប្រវែង១២៧០គីឡូម៉ែត្រ ដែលត្រូវការបោះបង្គោលព្រំដែនចំនួន៣១៤បង្គោល។ បង្គោលទីមួយត្រូវបានសម្ពោធជាផ្លូវការដោយនាយករដ្ឋមន្ត្រីនៃប្រទេសទាំងពីរកាលពីខែកញ្ញាឆ្នាំ២០០៦។ រហូតដល់ពេលនេះ ប្រទេសទាំងពីរបានបោះបង្គោលព្រំដែនបានប្រមាណ២៣០បង្គោលហើយ។ រដ្ឋាភិបាលហាណូយនិងភ្នំពេញបានសន្យាបញ្ចប់ការបោះបង្គោលព្រំដែនអោយចប់នៅចុងឆ្នាំ២០១២នេះ។ ប៉ុន្តែលោកទេសរដ្ឋមន្ត្រី វ៉ា គីមហុង បានអះអាងថា នៅមានតំបន់ខ្លះដែលជួបបញ្ហាស្មុគស្មាញទាំងផ្នែកច្បាប់ និងបច្ចេកទេស។ កន្លងមកយ៉ាងហោចណាស់មានតំបន់ដែលត្រូវបោះបង្គោលចំនួន១៥កន្លែងដែរ ដែលបានរាំងស្ទះ ដោយសារតែភាពស្មុគស្មាញទាំងនេះ៕
0 មតិ:
Post a Comment