កំពតៈកងទ័ពជំនាញសហរដ្ឋអាមេរិកមកពីតំបន់ប៉ាស៊ីហ្វិក ចុះផ្ដល់ជំនាញសង្គ្រោះបឋម ដល់មន្ត្រីកងរាជអាវុធហត្ថខេត្តកំពត ដើម្បីកាត់បន្ថយអត្រាស្លាប់របស់ជនរងគ្រោះ មុនទៅដល់មន្ទីរពេទ្យ។
វគ្គហ្វឹកហ្វឺននេះ ទទួលបានការពេញចិត្តពីសិក្ខាកាម ដែលបានចូលរួម។
លោកវរសេនីយ៍ឯក ចន្ទ ចាន់ធឿន ជាមេបញ្ជាការរងកងរាជអាវុធហត្ថខេត្តកំពត។ លោកបានឲ្យដឹងនៅរសៀលថ្ងៃសុក្រ ទី ១៦ ខែមីនាថា ការផ្ដល់ជំនាញសង្គ្រោះបឋមមកដល់មន្ត្រីលោក ពីសំណាក់កងទ័ពអាមេរិក ក្នុងយុទ្ធនាការធ្វើលំហាត់សមយុទ្ធ មានឈ្មោះថា «ឆ្មាំអង្គ» ឆ្នាំ ២០១២ នេះ បានផ្ដល់នូវចំណេះដឹងជាក់លាក់មួយ ដើម្បីជួយសង្គ្រោះជនរងគ្រោះពេលជួបគ្រោះថ្នាក់អ្វីមួយ មុនជនរងគ្រោះ ត្រូវបញ្ជូនទៅកាន់មន្ទីរពេទ្យ។
លោកបន្តថា ជំនាញសង្គ្រោះបឋម ដែលកងទ័ពអាមេរិកផ្ដល់ជូនមន្ត្រីកងរាជអាវុធហត្ថខេត្តកំពតពេលនេះ គឺមានដូចជា វិធីសាស្ត្រសង្គ្រោះជនរងគ្រោះពេលបាក់ដៃ ឬបាក់ជើងជាដើម។ វគ្គបណ្ដុះបណ្ដាលសង្គ្រោះបឋម មានរយៈពេល ៤ ថ្ងៃ គឺចាប់ពីថ្ងៃទី ១៤ ដល់ថ្ងៃទី ១៧ ខែមីនា ឆ្នាំ ២០១២ ហើយថា វគ្គហ្វឹកហ្វឺននេះ មានសិក្ខាកាមជាមន្ត្រីកងរាជអាវុធហត្ថខេត្តកំពត ចូលរួមហ្វឹកហាត់ជាង ៤០ នាក់។
កញ្ញា អេង ខន្តី ជាមន្ត្រីកងរាជអាវុធហត្ថនៃមន្ទីរស្រាវជ្រាវ និងយុត្តិធម៌ខេត្តកំពត។ កញ្ញាបានឲ្យដឹងថា វិធីសាស្ត្រសង្គ្រោះបន្ទាន់ ពិតជាមានសារៈសំខាន់ ដើម្បីជួយសង្គ្រោះជនរងគ្រោះ មុននឹងជនរងគ្រោះបានទទួលការព្យាបាលពីគ្រូពេទ្យ។
ចំណែកលោក ឡុង វណ្ណៈ ដែលជាសិក្ខាកាមម្នាក់ដែរ បានឲ្យដឹងថា ក្រោយទទួលបានវគ្គបណ្ដុះបណ្ដាល លោកបានយល់ដឹងច្រើនពីវិធីសាស្ត្រ ជួយសង្គ្រោះជនរងគ្រោះ ពេលជួបឧបទ្ទវហេតុអ្វីមួយ មុននឹងត្រូវបញ្ជូនទៅកាន់មន្ទីរពេទ្យឲ្យជួយសង្គ្រោះ។
លោកវរសេនីយ៍ឯក ដន ប្លាំង (Don Blunck) ជាមេបញ្ជាការទទួលបន្ទុកវគ្គបណ្ដុះបណ្ដាលសង្គ្រោះបឋម នៃកងទ័ពសហរដ្ឋអាមេរិក។ លោកបានឲ្យដឹងតាមរយៈអ្នកបកប្រែភាសាថា សិក្ខាកាមទាំងអស់ បន្ទាប់ពីបានឆ្លងកាត់វគ្គសង្គ្រោះបឋម ពួកគេពិតជាមានវិធីសាស្ត្រច្បាស់លាស់ ដើម្បីជួយសង្គ្រោះជនរងគ្រោះ មិនថាជនរងគ្រោះជួបគ្រោះថ្នាក់ នៅលើទីលានប្រយុទ្ធ ឬជួបឧបទ្ទវហេតុគ្រោះថ្នាក់ចរាចរណ៍តាមផ្លូវនោះទេ។
លោកបានឲ្យដឹងថា កងទ័ពអាមេរិក ក្រៅពីបានផ្ដល់ជំនាញវិធីសាស្ត្រសង្គ្រោះបឋម ដល់មន្ត្រីកងរាជអាវុធហត្ថខេត្តកំពត កងទ័ពសហរដ្ឋអាមេរិក ក៏បានផ្ដល់ជាសម្ភារៈបរិក្ខារពេទ្យមួយចំនួន ដល់មន្ត្រីកងរាជអាវុធហត្ថខេត្តកំពតថែមទៀតផង៕
កំណត់ចំណាំ ចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថអ្នកដទៃប៉ុណ្ណោះ។
0 មតិ:
Post a Comment