ក្រុងឡុងដ៍: និស្សិតបញ្ចប់ការសិក្សាផ្នែកធនធានមនុស្សមកពីប្រទេសវ៉េណេស៊ុយអេឡា ដែលមានបំណងចូលបម្រើការងារជាមួយកុមារ ត្រូវបានបំពាក់មកុដបវរកញ្ញាពិភពលោកប្រចាំឆ្នាំ២០១១នៅក្នុង កម្មវិធីប្រកួតបវរកញ្ញាក្នុងទីក្រុងឡុងដ៍ក្នុង ខែវិច្ឆិកានេះ ។
កញ្ញា អ៊ីវីយ៉ាន សាកូស (Ivian Sarcos) វ័យ២១ឆ្នាំ បានជាប់ជាបវរកញ្ញាផ្ដាច់ព្រ័ត្រនៅ Earls Court ក្នុងទីក្រុងឡុងដ៍ ជាទីកន្លែងដែលបវរកញ្ញាពិភពលោកដំបូងគេបានទទួលមកុដបវរកញ្ញា នេះក្នុងឆ្នាំ១៩៥១។
ក្រុមអ្នករៀបចំកម្មវិធី បានថ្លែងថា ការប្រកួតបវរកញ្ញានេះត្រូវបានផ្សាយផ្ទាល់ទៅកាន់ជាង១៥០ប្រទេស ជុំវិញពិភពលោក និងមានអ្នកទស្សនាប្រមាណមួយពាន់លាននាក់។
ការប្រកួតបវរកញ្ញាលំដាប់ថ្នាក់ពិភពលោកនេះ បានទទួលរងការរិះគន់ក្នុងរយៈពេលប៉ុន្មានឆ្នាំចុងក្រោយនេះ ដោយសារតែភាពមិនទាន់សម័យហើយគ្មានអ្វីពិសេសក្រៅពីការបង្ហាញឈុត ហែលទឹកប៉ុណ្ណោះ។ ប៉ុន្ដែកញ្ញា១២២រូបដែលកញ្ញាជនជាតិវ៉េណេស៊ុយអេឡា នាង សាកូស យកឈ្នះ គឺមួយចំនួនបានបញ្ចប់ការសិក្សា និងច្រើនជាងពាក់កណ្ដាលអាចនិយាយលើសពី៣ភាសា។
យោងតាមគេហទំព័របវរកញ្ញាពិភពលោក បានឲ្យដឹងថា កញ្ញា សាកូស ដែលទើបចេញបម្រើការងារឲ្យក្រុមហ៊ុនបណ្ដាញផ្សព្វផ្សាយមួយ បានថ្លែងថា បំណងប្រាថ្នានៅពេលអនាគតរបស់នាងគឺការចូលបម្រើការជាមួយអង្គការ ក្រៅរដ្ឋាភិបាល និងកុមារ។ កញ្ញាបានបង្កើតមូលនិធិផ្ទាល់ខ្លួនដើម្បីជួយដល់កុមារ។ កញ្ញាពិភពលោកឆ្នាំក្រោយនឹងត្រូវប្រារព្ធក្នុងតំបន់ Inner Mongolia ប្រទេសចិន៕
0 មតិ:
Post a Comment