រាជធានីភ្នំពេញ ៖ កងពន្លត់អគ្គិភ័យបានបាញ់ទឹកយ៉ាងសកម្មប្រឆាំងនឹងអណ្តាតភ្លើងក្រហមច្រាលទំពាលេបរោងសិប្បកម្មផលិតខ្នើយមួយកន្លែងបណ្តាលឱ្យចំហេះស្រាកស្រាន្ត មកវិញហើយរយៈពេលជាងកន្លះម៉ោងនៃការឆេះនេះ បើទោះណាភ្លើងមិនទាន់លើកទង់ជ័យសចុះចាញ់ទាំងស្រុងក៏ដោយ ។
សូមបញ្ជាក់ថា អគ្គិភ័យឆេះរោងសិប្បកម្មផលិតខ្នើយនេះគឺបានបញ្ចេញអណ្តាតភ្លើងសន្ធោសន្ធៅខ្ជាក់ផ្សែងខ្មៅអាប់ហុយទ្រលោមឡើងទៅលើអាកាសវេហាស៍ កាលពីវេលាម៉ោង៩និង៣០នាទីព្រឹកថ្ងៃទី៦ កុម្ភៈ ២០១២ ស្ថិតក្នុងភូមិចំរើនផល សង្កាត់បឹងទំពុន ខណ្ឌមានជ័យ...ពេលនេះសមត្ថកិច្ចកំពុងបញ្ចេញរថយន្តពន្លត់អគ្គិភ័យពី៣ទៅ៥គ្រឿង ដើម្បីប្រយុទ្ធដណ្តើមកាន់កាប់លើសភាពការណ៍នៃការឆេះនេះ ហើយឥឡូវនេះគ្រប់គ្រងលើអណ្តាតភ្លើងទាំងស្រុងហើយ ពោលគឺមិនឱ្យភ្លើងឆេះរាលដាលទៅលើលំនៅឋានផ្សេងៗទៀតដែលនៅក្បែរនោះ។
តាមការពិនិត្យមើលជាក់ស្តែងនៅកន្លែងកើតហេតុ ទីតាំងរោងសិប្បកម្មនេះស្ថិតនៅកន្លែងស្មុគស្មាញ ផ្លូវហាក់តូចចង្អៀតបន្តិចពិបាកដល់រថយន្តពន្លត់អគ្គិភ័យរបស់សមត្ថកិច្ចចូលទៅបាញ់ទឹកពន្លត់...សមត្ថកិច្ចមិនអាចជួយពន្លត់បានភ្លាមៗឡើយ រហូតដល់ជាងកន្លះម៉ោងឯណោះ ទើបរថយន្តពន្លត់អគ្គិភ័យទៅដល់កន្លែងដែលភ្លើងវាយប្រហារ ប៉ុន្តែការបាញ់ទឹកនេះមិនបានជួយសង្គ្រោះរោងសិប្បកម្មឱ្យចាកផុតពីចំណីភ្លើងនោះទេ គឺភ្លើងបានលេបត្របាក់ស្ទើរទាំងស្រុងទៅហើយ ដោយគ្រាន់តែទប់ស្កាត់កុំឱ្យវាឆេះរាលដាលទៅលើលំនៅឋានអ្នកផ្សេងទៀតប៉ុណ្ណោះ ។
រោងសិប្បកម្មនេះសំបូរទៅដោយសំឡី.គ កម្ទេចកម្ទីក្រណាត់ ដូច្នេះវាយងាយឆាបឆេះ ឬឆេះលឿនណាស់ ។ គេពិនិត្យឃើញរថយន្ត២គ្រឿងបានក្លាយជាចំណីភ្លើងទាំងស្រុង ព្រោះតែសំចតចោលនៅជាប់ជញ្ជាំងសិប្បកម្មគឺ១គ្រឿងម៉ាកវីហ្គោ ពណ៌ខ្មៅ និង១គ្រឿងទៀត ម៉ាកហ៊ីយ៉ាន់ដាយ ពណ៌ខៀវ ១តោនកន្លះ ។ មិនមានមនុស្សណាម្នាក់រងរបួស ឬប៉ះពាល់ដល់អាយុជីវតនោះទេ បើទោះណាមានកម្មករច្រើននាក់កំពុងធ្វើការនៅក្នុងរោងសិប្បកម្មនោះក៏ដោយ...តាមការសន្និដ្ឋានជំហានដំបូងរបស់សមត្ថកិច្ចបានឱ្យដឹងថា ការឆាបឆេះបង្កមហន្តរាយនេះបណ្តាលមកពីឆ្លងចរន្តអគ្គិសនី៕
0 មតិ:
Post a Comment