មេដឹកនាំអាល់កៃដា លោកអៃម៉ែន អាល់ហ្សាវ៉ារី នៅក្នុងខ្សែវីដេអូមួយដែលបង្ហោះ តាមអ៊ីនធើណេត កាលពីថ្ងៃអាទិត្យបានអំពាវនាវប្រជាជនកុំឲ្យពឹងផ្អែកទៅលើ លោកខាងលិច ឬ ក៏រដ្ឋាភិបាលអារ៉ាប់ នៅក្នុងការបះបោរ របស់ពួកគេដើម្បីទម្លាក់ប្រធានាធិបតីបាសាអាល់អាសាត។
នៅក្នុងខ្សែវីដេអូ ដែលមានរយៈពេល៨នាទីក្រោមចំណងជើងថា« ឆៅមុខតោប្រទេសស៊ីរី!» និង បង្ហោះតាមវេបសាយ អ៊ីស្លាម លោក ហ្សាវ៉ារីដែលកើតនៅក្នុងប្រទេសអេហ្ស៊ីបក៏បានអំពាវនាវដល់ប្រជាជន មូស្លីម នៅក្នុងប្រទេសទួរគី អ៊ីរ៉ាក់ លីបង់ និង ហ្សកដានី ដើម្បីផ្ដល់ជំនួយដល់ពួកឧទ្ទាមស៊ីរីប្រឈមមុខនឹងកងទ័ពរបស់លោក អាសាត។
លោក ហ្សាវ៉ារី បាននិយាយថា« របួសរបស់ប្រជាជនស៊ីរី នៅតែហូរឈាម ពីមួយថ្ងៃទៅមួយថ្ងៃ នៅពេលដែលអ្នកកាប់សម្លាប់គេ កូនប្រុសរបស់អ្នកកាប់សម្លាប់ បាសាប៊ីន ហាហ្វីស(ហាហ្វេសអាល់សាត) មិនញញើតដើម្បីបញ្ឈប់នោះ»។ លោក ហ្សាវ៉ារីបានបន្តថា« ប៉ុន្តែការតស៊ូ របស់ប្រជាជនយើង នៅក្នុងប្រទេសស៊ីរី ទោះបីរងការឈឺចាប់ក៏ដោយ ក៏ការធ្វើពលីកម្មនិងការបង្ហូរឈាមបានកើតឡើងដែរ»។
លោក ហ្សាវ៉ារីបានកាន់តួនាទីជាមេដឹកនាំអាល់កៃដា បន្ទាប់ពីលោកអូសាម៉ាប៊ីឡាដិន ត្រូវបានគេសម្លាប់ដោយកងទ័ពពិសេសរបស់អាមេរិកនៅក្នុងការវាយឆ្មក់ មួយនៅក្នុងប្រទេស ប៉ាគីស្ថានកាលពីខែឧសភាកន្លងមក។ លោក ហ្សាវ៉ារី បានបន្ថែមថា« ប្រជាជនមូស្លីមម្នាក់ ត្រូវជួយបងប្អូន របស់ខ្លួននៅក្នុងប្រទេសស៊ីរី ជាមួយនឹងអ្វីៗ ទាំងអស់ដែលពួកគេអាចជួយបានដូចជាជីវិត ប្រាក់កាស មតិយោបល់ ក៏ដូចជាព័ត៌មានផងដែរ»។
នៅទីបញ្ចប់លោក ហ្សាវ៉ារី បាននិយាយថា «បើយើងចង់បានសេរីភាព យើងត្រូវតែរំដោះខ្លួនចេញពីរបបនេះ។ បើយើងចង់បានយុត្តិធម៌ យើងត្រូវតែសងសឹកប្រឆាំងនឹងរបបនេះ»៕
0 មតិ:
Post a Comment