ខេត្តឧត្ដរមានជ័យ ៖ កាលពីថ្ងៃទី២២ ខែកុម្ភៈ ឆ្នាំ២០១២ វេលាម៉ោង ១៩និង០០នាទី មានករណីគ្រោះថ្នាក់ចរាចរណ៍ រថយន្តបុកម៉ូតូមួយកើតឡើងនៅលើកំណាត់ ផ្លូវជាតិលេខ ៦៧ ចំណុចមុខអាហារដ្ឋាន សុវណ្ណបូរី ស្ថិតក្នុងភូមិអូរជញ្ជៀន ឃុំអន្លង់វែង ស្រុកអន្លង់វែង ។ ជនបង្កឈ្មោះ ភីម ប្រសើរ ភេទប្រុស អាយុ ២៣ឆ្នាំ មុខរបរបើកកន្លែងលាងរថយន្ត ទីលំនៅភូមិអូរជញ្ជៀន ឃុំអន្លង់វែង ស្រុកអន្លង់វែង បើកបររថយន្តម៉ាក CRV ពណ៌ខ្មៅ ពាក់ស្លាកលេខ ភ្នំពេញ ២A៥៦៦៥ បុកទៅលើម៉ូតូជនរងគ្រោះឈ្មោះ សៅ វឿន ភេទប្រុស អាយុ ៦៥ឆ្នាំ មុខរបរជាអាចារ្យវត្ត អន្លង់វែង បើកបរម៉ូតូម៉ាក វ៉េវ ពណ៌ខ្មៅលាយខៀវ គ្មានស្លាកលេខ បណ្ដាយឲ្យរងរបួសធ្ងន់ និង អ្នករួមដំណើរម្នាក់ទៀតត្រូវជាចៅរស់នៅភូមិ-ឃុំ ជាមួយគ្នារងរបួសស្រាល ។ ពេលបុករួចហើយ ឈ្មោះ ភឹម ប្រសើរ ក៍បើករថយន្តចូលទៅក្នុងកន្លែងលាងរថយន្តរបស់ខ្លួន ចម្ងាយពីកន្លែង កើតហេតុ ១៥០ម៉ែត្រ បន្ទាប់មកកូនរបស់ឈ្មោះ សៅ វឿន និងប្រពន្ធ បានពរកូនឈ្មោះ យន សីហា ទៅសួរនាំ ក៍ត្រូវជនបង្កប្រើអំពើហឹង្សាវាយទៅលើឪពុក-ម្ដាយ-កូនចំនួន ០៣នាក់ បណ្ដាលឲ្យរងរបួសថែមទៀត ១-ឈ្មោះ ជា ប៊ុនលី ភេទប្រុស អាយុ ២៦ឆ្នាំ រស់នៅភូមិកើតហេតុ មុខរបរលក់ដូរ (ប្ដី)រងរបួសធ្ងន់ ២-ឈ្មោះ ឆាន់ ស្រីណាន ភេទស្រី អាយុ ២៣ឆ្នាំ រស់នៅភូមិកើតហេតុ មុខរបរលក់ដូរ (ប្រពន្ធ)រងរបួសស្រាល ៣-ឈ្មោះ យន សីហា ភេទប្រុស អាយុ ០១ឆ្នាំ(កូន) របួសស្រាលបន្ថែមលើរបួសគ្រោះថ្នាក់ចរាចរណ៍ ។ ភ្លាមៗនោះកម្លាំងអធិការដ្ឋាននគរបាល ស្រុកអន្លង់វែង ទទួលបានពត៌មានភ្លាមក៍ដឹកនាំកម្លាំងចុះទៅដល់កន្លែងកើតហេតុ ចាត់វិធានការដកហូតវត្ថុតាង និងហៅជនបង្កមកសួរនាំ តែជនបង្កមិនមក និងមិនឲ្យវត្ថុតាង ហើយប្រើអាកប្បកិរិយាច្រង៉េងច្រង៉ាង និងជេស្ដីតេះដៀលមកលើសមត្ថកិច្ចនគរបាល បន្ទាប់មកជនបង្កឡើងរថយន្តបម្រុងបើកគេចខ្លួន តែត្រូវកម្លាំងនគរបាលស្រុកធ្វើការហ៊ុំព័ទ្ធឃាត់ខ្លួនជនបង្ក និងដកហូតវត្ថុតាងបានយកមកកាន់អធិការដ្ឋាននគរបាលស្រុក នៅវេលាម៉ោង ២០និង០០នាទី ។ ដើម្បីធ្វើការសាកសួរ និងកសាងសំណុំរឿងតាមនិតិវិធី ចំណែកជនរងគ្រោះទាំង ០៥នាក់ ខាងលើ កម្លាំងនគរបាលជួយអន្តរាគមន៍បញ្ជូនទៅមន្ទីពេទ្យបង្អែកស្រុក ។ បច្ចុប្បន្នបានកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការបន្ត ។
ប្រភព៖ អគ្គស្នងការដ្ឋាននគបាលជាតិ
0 មតិ:
Post a Comment