នៅតាមតំបន់ព្រំដែនកម្ពុជា-ថៃ មានសភាពស្ងប់ស្ងាត់ជាធម្មតា។ កងទ័ពប្រទេសទាំងពីរក៏មានការប្រាស្រ័យរាប់អានរកគ្នាជាធម្មតា។
ប្រទេសថៃនឹងធ្វើសមយុទ្ធយោធាបាញ់គ្រាប់កាំភ្លើងធន់តូច ធន់ធំ បាញ់គ្រាប់ពិតពេញមួយថ្ងៃ នាថ្ងៃអាទិត្យ ទី២៦ កុម្ភៈ ឆ្នាំ២០១២ នៅក្នុងខេត្តសុរិន្ទ ដែលមានចម្ងាយប្រហែល ១០គីឡូម៉ែត្រ ពីព្រំដែនខេត្តឧត្តរមានជ័យប្រទេសកម្ពុជា។
លោក ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា-ថៃ និងជានាយករងទីចាត់ការការងារព្រំដែននៃអគ្គបញ្ជាការនៃក្រសួង ការពារជាតិ។ លោកបានមានប្រសាសន៍នៅថ្ងៃទី២៥ ខែកុម្ភៈ ឆ្នាំ២០១២ ថា ភាគីថៃបានជូនដំណឹងមកកម្ពុជាថា សមយុទ្ធទាហានហ្វឹកហាត់ទ័ពថ្មីរបស់ថៃនេះ និងចាប់ផ្ដើមពីម៉ោង ៧ព្រឹក ដល់ម៉ោង៤ល្ងាច នាថ្ងៃទី២៦ ខែកុម្ភៈ ឆ្នាំ២០១២ ៖ «ការងារ ព្រំដែនយើងគឺយើងបានផ្សព្វផ្សាយទៅគ្រប់តាមអង្គភាពដែលនៅតាមជួរ មុខអស់ហើយ។ នេះជាការហ្វឹករបស់ថៃ ប៉ុន្តែយើងអាចដឹងហើយតាំងពីមុនយើងត្រូវតែប្រុងប្រយ័ត្ន ទោះបីវាហ្វឹកហាត់មែនពិតក៏ដោយ យើងត្រូវតែប្រុងប្រយ័ត្នខាងយើង ការប្រុងប្រយ័ត្នរបស់យើង បូរណភាពទឹកដី ទោះបីថៃមិនធ្វើសមយុទ្ធក៏យើងនៅតែប្រុងប្រយ័ត្ន ព្រោះវាដូចកាលមួយជំនាន់កើតមានព្រឹត្តិការណ៍ ថៃមិនដែលប្រាប់យើងទេ ជួនកាលវាសមយុទ្ធចុះឡើងៗ វាអាចបាញ់មកធ្លាក់លើទឹកដីយើង សមយុទ្ធប៉ុន្មានលើកថៃបាញ់ធ្លាក់មកលើទឹកដីកម្ពុជា អ៊ីចឹងយើងត្រូវតែប្រុងប្រយ័ត្នដែរបញ្ហាហ្នឹង»។
កាលពីដើមឆ្នាំ២០០៨ កន្លងទៅ កងទាហានថៃបានធ្វើសមយុទ្ធនៅក្នុងទឹកដីនៃខេត្តសុរិន្ទនេះដែល ប៉ុន្តែការធ្វើសមយុទ្ធបាញ់គ្រាប់ពិតរបស់ប្រទេសថៃ នៅពេលនោះ បានបណ្ដាលឲ្យគ្រាប់ផ្លោងធន់ធំ ផ្លោងចូលក្នុងទឹកដីខ្មែរក្នុងខេត្តឧត្តរមានជ័យ។ បញ្ហានេះបានធ្វើឲ្យរដ្ឋាភិបាលខ្មែរមានប្រតិកម្មយ៉ាងខ្លាំងទើបថៃ ធ្វើការសុំទោសកម្ពុជា។
លោក ពេជ្រ វណ្ណា បានអះអាងថា ថ្វីត្បិតតែស្ថានភាពនៅតាមព្រំដែនកម្ពុជា-ថៃ មានភាពស្ងប់ស្ងាត់ ក៏ប៉ុន្តែកងទ័ពកម្ពុជានៅតែមានការប្រុងប្រយ័ត្ននៅគ្រប់ចំណុចគោល ដៅទាំងអស់ ៖ «អត់មានអីទេ ស្ថានភាពកងទ័ព គឺស្ងាត់ស្ងៀម រក្សាកម្លាំងនៅមុខតិចតូចនិង គឺសាមគ្គីគ្នា ចេញចូលរាប់អានចាប់ដៃគ្នាធម្មតា អត់មានបញ្ហាអីកើតឡើងទេ ទំនាក់ទំនងគ្នាបានល្អ ឥឡូវសហការតាមអនុសាសន៍របស់សម្ដេច គឺ ទាហានយើងនៅម្ដុំណា គឺយើងសហការទំនាក់ទំនងនៅម្តុំហ្នឹង យើងមិនអាចបង្កហេតុបង្ករឿងដល់គេទេ ប៉ុន្តែបើគេមកលើយើងត្រូវតែទប់ស្កាត់»។
ថ្មីៗនេះ កម្ពុជា-ថៃ បានជួបប្រជុំគ្នាពិភាក្សាលើកិច្ចការងារព្រំដែនរវាងប្រទេសទាំង ពីរនៅទីក្រុងបាងកក ប្រទេសថៃ។ នៅក្នុងជំនួបរយៈពេលពីរថ្ងៃ ភាគីទាំងពីរកម្ពុជា-ថៃ និងមានការជជែកគ្នាលើកិច្ចការងារព្រំដែន ដែលបានជាប់គាំងអស់រយៈពេលជាច្រើនឆ្នាំកន្លេងមកនេះ។
កម្ពុជា-ថៃ ចាប់តាំងពីថ្ងៃទី១៥ ខែកក្កដា ឆ្នាំ២០០៨ ក្រោយពីជម្លោះរឿងប្រាសាទព្រះវិហារបានបង្កឲ្យមានការផ្ទុះអាវុធ ជាច្រើនលើកច្រើនសារនៅតំបន់ព្រំដែន បណ្ដាលឲ្យកងទ័ពប្រទេសទាំងពីរស្លាប់ និងរបួសរៀងៗខ្លួន។ អង្គការយូនីស្គូបានសម្របសម្រួលដាក់ប្រាសាទព្រះវិហារចូលជាសម្បត្តិ បេតិកភណ្ឌពិភពលោក កាលពីចុងឆ្នាំ២០០៨។
បញ្ហានេះបានធ្វើឲ្យប្រទេសកម្ពុជា និងថៃ កើតមានសភាពការតានតឹងខាងផ្នែកយោធាជាបន្តបន្ទាប់ ក្នុងនោះមានដូចជាការដាក់ពង្រាយកងទ័ពការពារនៅតាមព្រំដែន រហូតមានការផ្ទុះអាវុធតូចធំជាច្រើនលើកច្រើនសារ។ ក្រោយមកប្រទេសទាំងពីរបានចាប់ផ្ដើមបង្ហាញគ្រឿងសព្វាវុធទំនើបដាក់ គ្នារៀងៗខ្លួន តាមរយៈការធ្វើសមយុទ្ធយោធា៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែ ប៉ុណ្ណោះ។
ប្រភពពី៖ RFA
0 មតិ:
Post a Comment