skip to main |
skip to sidebar
8:32 AM
khmer4all
កាលពីថ្ងៃអាទិត្យម្សិលមិញ ទាហានថៃបានបើកធ្វើសមយុទ្ធបាញ់ គ្រាប់ពិតទ្រង់ទ្រាយធំមួយនៅនៅក្នុងខេត្តសុរិន្ទ ជាប់ព្រំដែនកម្ពុជាត្រង់តំបន់ប្រាសាទតាមាន់ ថ្មដូន និងប្រាសាទតាក្របីនៃខេត្តឧត្តរមានជ័យ។ សមយុទ្ធឈ្មោះថា «ពស់វែក» បានប្រព្រឹត្តទៅដោយគ្មានផលប៉ះពាល់ ចូលទឹកដីកម្ពុជាដូចកាលពី ឆ្នាំ២០០៨ទេ។ យ៉ាងណាក៏ដោយ សមយុទ្ធនៅតាមព្រំដែនដែលមានទំនាស់ គឺជាសញ្ញាមិនល្អមួយ។ ប៉ុន្តែ មេទ័ពកម្ពុជាបានព្យាយាមសម្រាល ស្ថានការណ៍ដោយអះអាងថាសមយុទ្ធធ្វើ នៅក្នុងទឹកដីរបស់គេ គឺជារឿងធម្មតាមួយប៉ុណ្ណោះ។
យោធាថៃបាន បើកធ្វើសមយុទ្ធបាញ់គ្រាប់ពិតមួយ កាលពីថ្ងៃអាទិត្យម្សិលមិញ នៅតំបន់ជាប់ព្រំដែនប្រទេសកម្ពុជា។ សមយុទ្ធឈ្មោះថា «ពស់វែក» ត្រូវបានរៀបចំឡើងនៅក្នុងព្រៃភ្នំ ដងរ៉ាក់ខេត្តសុរិន្ទរបស់ថៃ ឈមគ្នាជាមួយតំបន់ប្រាសាទតាមាន់ ថ្មដូន និងប្រាសាទតាក្របី ក្នុងស្រុកបន្ទាយអំពិល ខេត្តឧត្តរមានជ័យ របស់កម្ពុជា។
ប្រភពយោធាពីតំបន់ជាយដែន បានឲ្យដឹងថា សមយុទ្ធ «ពស់វែក» នេះបានបើកធ្វើកាលពីថ្ងៃសៅរ៍ នៅចម្ងាយ ៨គីឡូម៉ែត្រ ពីព្រំដែន។ លំហាត់យោធាទ្រង់ទ្រាយធំនេះ បានប្រព្រឹត្តទៅដោយមិនបានធ្វើឲ្យ ប៉ះពាល់ដល់ទឹកដីកម្ពុជាទេ ហើយក៏គ្មានគ្រាប់ផ្លោងណាមួយ ធ្លាក់មកក្នុងទឹកដីកម្ពុជាដូច កាលពីឆ្នាំ២០០៨ដែរ។ កាលពីឆ្នាំ២០០៨ នៅក្នុងឱកាសបើកសមយុទ្ធដូចគ្នានេះដែរ គ្រាប់ផ្លោងជាច្រើនគ្រាប់បានធ្លាក់ចូលមកក្នុងទឹកដីកម្ពុជា។ បន្ទាប់ពីភាគីកម្ពុជាបញ្ចេញប្រតិកម្មខ្លាំងៗ ភាគីថៃបានសុំទោស ដោយអះអាងថាជាការបាញ់មិនចំគោលដៅ។
ប្រភពពីមន្ត្រីយោធាដដែលឲ្យដឹងទៀតថា ស្ថានការណ៍នៅតាមព្រំដែនកម្ពុជា-ថៃមានសភាពស្ងប់ស្ងាត់ជាធម្មតាទេ នៅពេលនេះ។ មុនធ្វើសមយុទ្ធនេះប៉ុន្មានថ្ងៃ យោធាថៃបានជូនដំណឹងដល់កម្ពុជាដែរ ដោយអះអាងថា សមយុទ្ធនេះមានប្រើប្រាស់សម្ភារៈយោធាចម្រុះ ដូចជាកាំភ្លើងធំ កាំភ្លើងដៃ រថពាសដែក និងរថក្រោះ។ ជាការកត់សម្គាល់ ភាគីថៃតែងតែបើកធ្វើសមយុទ្ធនៅកៀកនឹងព្រំដែនដែលមានទំនាស់ ដោយមិនខ្វល់ខ្វាយពីផលអាក្រក់ ដែលកើតពីសមយុទ្ធនេះឡើយ។ សមយុទ្ធបែបនេះត្រូវបានអ្នកខ្លះចាត់ទុកជាការគំរាមដល់ភាគី កម្ពុជា ប៉ុន្តែ មន្ត្រីយោធាកម្ពុជាតែងព្យាយាមសម្រាលស្ថានការណ៍ដោយអះអាងថាជារឿង ធម្មតាទេដែលថៃធ្វើសមយុទ្ធក្នុងទឹកដីរបស់គេ។
កាលពី២សប្តាហ៍មុន រដ្ឋមន្ត្រីការពារជាតិកម្ពុជា លោក ទៀ បាញ់ បានសរសេរលិខិតទៅសមភាគីថៃ ដើម្បីរម្លឹកឲ្យថៃកំណត់ពេលនៃកិច្ចប្រជុំក្រុមការងារចម្រុះ ព្រំដែន ដែលភាគីទាំងពីរបានសម្រេច កាលពីថ្ងៃទី២១ខែធ្នូ ឆ្នាំ២០១១ កន្លងទៅ។ ប៉ុន្តែ រហូតមកដល់ពេលនេះ ក្រសួងការពារជាតិថៃនៅមិនទាន់ឆ្លើយតបនៅឡើយទេ តែភាគីថៃបែរជាបើកធ្វើសមយុទ្ធតាមព្រំដែនទៅវិញ ខណៈដែលបញ្ហាព្រំដែនរវាងប្រទេសទាំងពីរ មិនទាន់បានដោះស្រាយអ្វីសោះ៕
ប្រភព៖ RFI
0 មតិ:
Post a Comment