ភ្នំពេញៈ គូស្វាមីភរិយានៃក្រុមគ្រួសារសញ្ជាតិបារាំង ដែលមានកូនប្រុសស្រីបួននាក់ បានសម្រេចចិត្តដាក់ទុនជីវិតនៅក្នុងដំណើរផ្សងព្រេងជុំវិញពិភពលោក តាមរយៈការយករថយន្ត Ford Transit មកធ្វើជាទីជម្រកនាពេលធ្វើដំណើរ។
ក្រុមគ្រួសារនេះបានចេញដំណើរពីប្រទេសកំណើតខ្លួនកាលពីខែកក្កដា ហើយបានឆ្លងកាត់ប្រទេសមួយចំនួនដូចជា ស្វ៊ីស អាល្លឺម៉ង់ អូទ្រីស ហុងគ្រី រូម៉ានី ស្លូវ៉ាគី ប៊ុលហ្គារី តួកគី អ៊ីរ៉ង់ ឥណ្ឌា ថៃ និងឡាវ ខណៈពេលនេះពួកគេកំពុងតែមានវត្តមាននៅលើទឹកដីកម្ពុជាយើង។
លោក ហ្សង់ ហ្វីលីព ជាស្វាមី មានវ័យ៣៧ឆ្នាំបាននិយាយថា៖ «កាលពីនៅឯទីក្រុងប៉ារីស ខ្ញុំតែងក្រោកពីព្រលឹមទៅធ្វើការរហូតដល់ពេលយប់ជ្រៅ ដូច្នេះខ្ញុំមិនមានពេលគ្រប់គ្រាន់សម្រាប់ថែទាំកូនប្រុសស្រី ខ្ញុំឡើយ។ ខ្ញុំមានអារម្មណ៏ថា ហាក់ដូចជាធុញថប់ជាមួយនឹងជីវិតដែលរស់នៅដាច់ដោយឡែកបែបនេះ ណាស់។ យើងក៏មានបំណងចង់ជួយដល់អង្គការក្រៅរដ្ឋាភិបាលណាមួយ ហើយយើងក៏មានបំណងចង់ធ្វើអ្វីមួយល្អសម្រាប់ជួយដល់ពិភពលោកដែរ។ ស្របគ្នានេះដែរ យើងក៏ចង់ឃើញពីដំណើរជីវិតសាសនិកកាតូលិក នៅលើពិភពលោកទាំងមូលរស់នៅ និងគោរពប្រណិប័តន៍យ៉ាងដូចម្តេច? ទាំងអស់នេះគឺជាគោលបំណងនៃដំណើរផ្សងព្រេងរបស់យើង»។
បច្ចុប្បន្ននេះលោក និងភរិយា អានណា ហ្គាលី វ័យ៣៧ឆ្នាំ រួមជាមួយកូនប្រុសស្រីទាំងបួនមាន ម៉ាហ្គូស(៩ឆ្នាំ) វីចទ័រ និង កាពូស៊ីន (៧ឆ្នាំ) និងម៉ារីន(៣ឆ្នាំ) អាចនៅជួបជុំគ្នារៀងរាល់ថ្ងៃដូចទៅនឹងអ្វីដែលពួកគេបានប៉ង ហើយដែរ។ តែបញ្ហាដែលចោទសម្រាប់គ្រួសារគេនាពេលនេះគឺ កូនទាំងបីត្រូវចូលសាលា។ ដូច្នេះបានជាពួកគេទាំងបីនោះត្រូវរៀននៅតាមដំណើរផ្សងព្រេង នេះ ដោយលោក ហ្វីលីព និងភរិយាគាត់ដើរតួជាគ្រូបង្រៀនផ្ទាល់តែម្តង។
លោក ហ្វីលីព បន្តថា៖ «នៅបារាំង គេអនុញ្ញាតឲ្យមានការរៀនសូត្រនៅឆ្ងាយពីសាលាបែបនេះបាន។ ជារៀងរាល់ព្រឹកនៅម៉ោង៩ដល់១២ ជាពេលរៀនសូត្ររបស់ពួកគេ។ ពួកគេមានមេរៀនជាប្រចាំ និងកិច្ចការសាលាដែលត្រូវធ្វើ។ ពេលពួកគេធ្វើកិច្ចទាំងនោះរួច យើងបានបញ្ជូនវាតាមប្រព័ន្ធអ៊ីនធឺណិតទៅឲ្យគ្រូនៅឯបារាំងដើម្បី កែកិច្ចការទាំងនោះ ហើយគ្រូក៏ផ្ញើវាត្រឡប់មកវិញទៀតផង»។
ក្រុមគ្រួសាររបស់លោក ហ្វីលីព បានមកដល់កម្ពុជាបន្ទាប់ពីឆ្លងកាត់ឡាវ នៅថ្ងៃទី ២១ ខែមករា ឆ្នាំ២០១២ ហើយពួកគេមានគម្រោងស្នាក់នៅទីនេះរយៈពេលមួយខែ។ គួរបញ្ជាក់ថា ខណៈពេលដែលពួកគេបានធ្វើដំណើរឆ្លងកាត់តំបន់ព្រំដែននោះ ក៏ត្រូវជួបប្រទះនឹងទង្វើប្រព្រឹត្តអំពើពុករលួយជាមួយក្រុមប៉ូលិស អន្តោប្រវេសន៍សម្រាប់ការពិនិត្យលិខិតទិដ្ឋាការពួកគេដែរ។
ហ្វីលីព និយាយថា៖ «វាជាលើកដំបូងដែលពួកគេជួបហេតុការណ៍នៅកម្ពុជា។ ក្រុមប៉ូលិសអន្តោប្រវេសន៍បានសួររកប្រាក់បង់ថ្លៃទិដ្ឋាការនៃ សមាជិកក្រុមគ្រួសារទាំង៦។ ពួកគេទារប្រាក់ពួកយើងជិត២០០ដុល្លារអាមេរិក។ តែយើងត្រូវចំណាយត្រឹម៤០ដុល្លារអាមេរិកប៉ុណ្ណោះ»។
ក្រុមគ្រួសារនេះបានធ្វើដំណើរចេញពីឡាវតាមខេត្តស្ទឹងត្រែង ក្រចេះ កំពង់ចាម កំពង់ធំ សៀមរាប ដើម្បីនាំយកនូវសម្ភារសិក្សាមួយចំនួនពីបារាំងផ្តល់ទៅឲ្យអង្គការមិនយកប្រាក់ចំណេញមួយ L'ecole du Bayon នៅសៀមរាប។ បន្ទាប់មកពួកគេបន្តដំណើរមកភ្នំពេញដោយឆ្លងកាត់ខេត្តបន្ទាយ មានជ័យ និងខេត្តបាត់ដំបង។
ហ្វីលីព បន្តថា៖ «យើងបានសម្រេចចិត្តជ្រើសរើសប្រទេសជាច្រើនដែលត្រូវឆ្លងកាត់។ ដំបូងយើងត្រូវគិតពីបញ្ហាអាកាសធាតុ គឺយើងមិនត្រូវចេញដំណើរនៅពេលមានអាកាសធាតុត្រជាក់ខ្លាំង ឬ ក្តៅខ្លាំងឡើយ។ ដូច្នេះបញ្ហាអាកាសធាតុជាកត្តាចម្បងសម្រាប់ដំណើររបស់យើង»។
ហ្វីលីព បន្ថែមថា៖ «ពេលយើងឆ្លងកាត់ព្រំដែនកម្ពុជា យើងមិនបានដឹងពីប្រព័ន្ធនៃការធ្វើចរាចរណ៍ប្រកាន់ស្តាំ ឬ ឆ្វេងនោះទេ។ យើងគ្រាន់តែបើកបរនៅកណ្តាលទ្រូងថ្នល់ ឆ្ងាយ២គីឡូម៉ែត្រពីគេ។ យើងបានឃើញរថយន្តមួយបើកបរនៅខាងឆ្វេងយើងទើបបានយើងយល់ថា ត្រូវចរាចរបែបណា»។
ដំណើរផ្សងព្រេងជុំវិញពិភពលោករបស់គ្រួសារហ្វីលីព ត្រូវចំណាយប្រាក់២ពាន់អឺរ៉ូក្នុងមួយខែលើការចាយវាយ សាំងរថយន្ត ម្ហូបអាហារ និងគ្រឿងប្រើប្រាស់ផ្សេងៗ។ តែលោកក៏ត្រូវចំណាយប្រាក់ទ្វេដងដែរ ចំពោះការធ្វើដំណើរលើប្រទេសណាមួយតាមចរាចរណ៍ផ្លូវទឹក។ ជាក់ស្តែងការធ្វើដំណើរចេញពីឥណ្ឌាទៅកាន់ថៃ គឺលោកចំណាយប្រាក់ជិត៥ពាន់ដុល្លារអាមេរិកឯណោះ។ ឥឡូវក្រុមគ្រួសារនេះកំពុងតែយករថយន្តទៅពិនិត្យប្រព័ន្ធម៉ាស៊ីន នៅឯយាន្តដ្ឋានក្រុមហ៊ុនរថយន្ត Ford នៅភ្នំពេញ។
នៅថ្ងៃទី ២១ ខែកុម្ភៈនេះគ្រួសារលោកហ្វីលីព នឹងចាកចេញពីកម្ពុជាឆ្ពោះទៅវៀតណាម ហើយត្រឡប់មកឡាវ និងថៃវិញ មុននឹងបន្តទៅម៉ាឡេស៊ី ឥណ្ឌូនេស៊ី អូស្រ្តាលី នូវែលសេឡង់ ប៉េរូ ស៊ីលី អាហ្សង់ទីន បូលីវី ប្រេស៊ីល កូឡុំប៊ី វេណេស៊ុយអេឡា ម៉ិកស៊ិក កាណាដា កូស្តារីកា នីហ្គារ៉ាហ្គាយ បែលហ្ស៊ិក ទើបវិលទៅទឹកដីកំណើតបារាំងវិញ។ លោកថ្លែងថា៖ «ខ្ញុំសប្បាយចិត្តណាស់ពេលត្រូវបន្តដំណើរទៅវៀតណាមព្រោះវាជា ទឹកដីកំណើតនៃក្រុមសាច់ញាតិរបស់គ្រួសារខ្ញុំ»។
ដំណើរផ្សងព្រេងជុំវិញពិភពលោករបស់គ្រួសារលោកហ្វីលីព ត្រូវប្រើពេលប្រហែលជា២ឆ្នាំ និងចំណាយប្រាក់ផ្ទាល់ខ្លួន១៥ ម៉ឺនអឺរ៉ូ។ រាល់សកម្មភាពនៃការធ្វើដំណើរលោកតែងតែបន្សល់ទុកនូវព័ត៌មានទាំង ឡាយក្នុងគេហទំព័រhttp://www.breakaroundtheworld.com/ ៕
0 មតិ:
Post a Comment