ប្រជាពលរដ្ឋជនជាតិដើមភាគតិចព្នងជាង ១០០គ្រួសារ នៅខេត្តមណ្ឌលគិរី បានតវ៉ាចំពោះអារាមព្រះពុទ្ធសាសនាមួយកន្លែងកំពុងសាងសង់បំពានទៅលើទីសក្ការអ្នកភូមិច្រើនជំនាន់មកហើយ។
ប្រជាសហគមន៍ជនជាតិដើមភាគតិចព្នង នៅភូមិ ពូ តាង ឃុំពូជ្រី ស្រុកពេជ្រាដា ខេត្តមណ្ឌលគិរី នៅថ្ងៃអាទិត្យ ទី១៩ ខែកុម្ភៈ ឆ្នាំ២០១២ បានអំពាវនាវសុំឲ្យស្ថាប័នមានសមត្ថកិច្ចពាក់ព័ន្ធបញ្ឈប់សកម្មភាពសាងសង់វត្តអារាមព្រះពុទ្ធសាសនាមួយកន្លែង ដែលបានបំពានទៅលើសិទ្ធិរស់នៅទាក់ទិនជំនឿប្រពៃណី និងវប្បធម៌ជនជាតិដើមភាគតិច។
តំណាងសហគមន៍ភូមិពូតាង គឺលោក ទាវ ក្រាក់។ លោកបានបញ្ជាក់ថា អាជ្ញាធរភូមិឃុំបានយកដីតំបន់អ្នកភូមិទុកជាទីតាំងគោរពបូជាច្រើនជំនាន់ មានខ្ទមអ្នកតា និងព្រៃឈើទំហំមួយហិកតារ នៅក្នុងភូមិប្រគល់ឲ្យសាងសង់វត្តគ្មានការឯកភាពក្នុងសហគមន៍។ លោកបន្តថា សហគមន៍បានយល់ព្រមផ្ដល់ដីនៅទីតាំងផ្សេងក្នុងភូមិ ដើម្បីសាងសង់វត្តចៀសវាងបំពានទៅលើទីគោរពបូជារបស់អ្នកភូមិ ក៏ប៉ុន្តែសំណើសុំរបស់សហគមន៍ក្រុមអាជ្ញាធរមូលដ្ឋានមិនបានយកចិត្តទុកដាក់ដោះស្រាយឡើយ ៖ “ខ្ញុំចង់ឲ្យភូមិឲ្យឃុំៗ គេមិនទទួលទេ ក្រដាសតវ៉ារបស់ពួកខ្ញុំហ្នឹង។ ពួកខ្ញុំថាពួកហ្នឹងរំលោភបំពានទីកន្លែងសាសនារបស់ពួកខ្ញុំ ធ្វើជាន់ផ្ទះខ្ទមសាសនារបស់ពួកខ្ញុំតែម្ដងឥឡូវហ្នឹង”។
អារាមព្រះពុទ្ធសាសនាដែលគេកំពុងសាងសង់មានឈ្មោះថា វត្តអូរធែល តេជោមានជ័យ ចាប់សាងសង់នៅចុងឆ្នាំ២០១១ បច្ចុប្បន្នមានកុដិមួយខ្នង ទំហំ ២០ម៉ែត្រក្រឡា មានព្រះសង្ឃបួនអង្គ និងកំពុងចាប់ផ្ដើមសាងសង់សាលាឆាន់មួយខ្នងបន្ថែមទៀត។
ប្រធានគណៈកម្មការអាចារ្យវត្ត គឺលោក តា ទូច មានប្រសាសន៍បញ្ជាក់ថា ដីដែលកំពុងសាងសង់វត្តមានទំហំប្រមាណជាងកន្លះហិកតារ គឺជាដីដែលអាជ្ញាធរភូមិឃុំបានវាស់វែងប្រគល់ជូនគណៈកម្មការវត្តសាងសង់វត្តនៅតំបន់នោះ និងជាដីវាលនៅជាប់នឹងខ្ទមអ្នកតា និងព្រៃឈើក្រុមសហគមន៍គោរពបូជា។ ចំណែកទីតាំងផ្សេងដែលក្រុមសហគមន៍បានឲ្យសម្រាប់សាងសង់វត្តមិនអំណោយផលសម្រាប់សាងសង់វត្តអារាម និងមិនអាចព្រះសង្ឃគង់នៅបាន។
លោកបន្តថា ដីមួយចំណែកនៃទីសក្ការប្រពៃណីរបស់អ្នកភូមិ ជាពិសេសខ្ទមអ្នកតា និងព្រៃឈើនៅជុំវិញនោះ បានរក្សាទុកសម្រាប់សហគមន៍ជនជាតិដើមភាគតិចគោរពបូជា មិនមាននរណាប៉ះពាល់ទេ ៖ “គាត់ហ្នឹងប្រកាន់ថា ចាស់ទុំហ្នឹងលក់ដីឲ្យមកខាងបងប្អូនខ្មែរហ្នឹងកសាងវត្តហ្នឹង មានចោទប្រកាន់ថាអ៊ីចឹង តែចាស់ទុំហ្នឹងគាត់អត់មានលក់ទេ។ ឃុំ និងចាស់ទុំហ្នឹងគាត់ឲ្យ”។
មេឃុំ ពូ ជ្រី លោក កើញ រដ្ឋា។ លោកមានកំណើតជនជាតិដើមភាគតិចព្នង បានបញ្ជាក់ថា មុននឹងវាស់វែងដីសម្រាប់សាងសង់វត្ត លោកបានសុំការឯកភាពពីក្រុមមេកន្ទ្រាញចាស់ទុំក្នុងភូមិ បានយល់ព្រមរួចហើយ ដោយយល់ឃើញថា បើមានវត្តព្រះពុទ្ធសាសនាមួយនៅតំបន់នោះ និងរួមចំណែកផ្ដល់ប្រយោជន៍មួយផ្នែកដល់សហគមន៍ជនជាតិដើមនោះដែរ។ លោកបន្តថា ក្រុមសហគមន៍អ្នកតវ៉ាភាគច្រើនក្រុមមានវ័យតិច មិនមានការយល់ដឹង និងអភិរក្សប្រពៃណីជ្រុល ៖ “ទុកទាំងអស់ដើមឈើគាត់ក៏មិនកាប់ដែរ ទុករក្សាគាត់ធ្វើតែវាលខាងវាលស្រែ។ ភាគតិចទេ ភាគច្រើនគេសប្បាយចិត្តនឹងធ្វើ ខ្ញុំយល់ថា បងប្អូនជនជាតិទាំងនេះគាត់ចង់បានវត្តអារាមហ្នឹង វាល្អជាង”។
អ្នកសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តមណ្ឌលគិរី លោក សំ សារិន។ លោកបានបញ្ចេញយោបល់ថា អាជ្ញាធរមូលដ្ឋានគួរជួបប្រជុំដោះស្រាយសម្របសម្រួលក្នុងបញ្ហានេះធ្វើយ៉ាងណាឲ្យឯកភាពសាមគ្គីភាពគ្នាក្នុងបញ្ហាសាសនា និងជំនឿ ប្រពៃណីក្រុមសហគមន៍ជនជាតិដើមភាគតិច។ លោកបន្តថា នៅសប្ដាហ៍ក្រោយបុគ្គលិកសមាគមនឹងចុះទៅមូលដ្ឋាននោះ ដើម្បីជួយស្វែងរកដំណោះស្រាយបញ្ចប់ទំនាស់នេះ ៖ “ធ្វើការសម្រុះសម្រួលរវាងពលរដ្ឋជនជាតិដើមភាគតិច និងប្រជាពលរដ្ឋជនជាតិខ្មែរហ្នឹង អាចនៅបាន ឬងាកដោះដូរយ៉ាងម៉េចបានអាហ្នឹងសំខាន់នៅលើអាជ្ញាធរ ប៉ុន្តែគ្រាន់មិនទាន់មានចម្លើយពីភូមិ ហើយនិងឃុំយ៉ាងម៉េចនៅឡើយទេ”។
ទោះជាយ៉ាងនេះក្ដី មន្ត្រីក្រុមប្រឹក្សាឃុំពូជ្រីដដែលបានឲ្យដឹងថា នៅសប្ដាហ៍ក្រោយនេះដែរ លោកមានគម្រោងអញ្ជើញមន្ត្រីថ្នាក់ស្រុក និងប្រជាពលរដ្ឋសហគមន៍ជួបប្រជុំគ្នាដោះស្រាយបញ្ហាតវ៉ាមិនឲ្យសាងសង់វត្តនេះឡើងវិញ៕
ប្រភព:វិទ្យុអាស៊ីសេរី
0 មតិ:
Post a Comment