ខេត្តបន្ទាយមានជ័យ៖ សកម្មភាពប្រើវិធីដាក់ថ្នាំសណ្តំ បានមកធ្វើសកម្មភាពនៅ ខេត្តបន្ទាយមានជ័យទៀតហើយ បន្ទាប់ពីមានសភាពស្ងប់ស្ងាត់មួយរយៈមក។ ជាក់ស្តែងកាលពីវេលាម៉ោង៨ព្រឹកថ្ងៃទី២៧ ខែកុម្ភៈ ឆ្នាំ២០១២ នៅចំណុចផ្សារចំការគ ហៅផ្រាថ្មី ស្ថិតក្នុងភូមិ២ (ខ្លាកូនចាស់) សង្កាត់កំពង់ស្វាយ ក្រុងសិរីសោភ័ណ មាននារីម្នាក់ជានិស្សិត បានត្រូវស្ត្រី២នាក់ ដាក់ថ្នាំសណ្តំយកគ្រឿងអល័ង្លការ និងលុយមួយចំនួន រួចគេចខ្លួនបាត់ដោយសុវត្ថិភាព។
តាមបណ្តឹងនារីរងគ្រោះ បានប្រាប់សមត្ថកិច្ចថា នាងឈ្មោះ ដឿន ចាន់លៀស អាយុ២៤ឆ្នាំ មានទីលំនៅភូមិគំរូ ឃុំគំរូ ស្រុកថ្មពួក ខេត្តបន្ទាយមានជ័យ បច្ចុប្បន្នជានិស្សិតឆ្នាំទី៤ រៀននៅសាកលវិទ្យាល័យគ្រប់គ្រង និងសេដ្ឋកិច្ច (UME) ជួលផ្ទះគេស្នាក់នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ។
នារីរងគ្រោះរូបនោះ បានបន្តថា មុនពេលកើតហេតុ នាងបានយកម៉ូតូទៅផ្ញើនឹងស្តង់អ្នកឥវ៉ាន់ចាប់ហួយ ដែលលក់ក្នុងផ្សារ ពេលនោះមានស្ត្រីចំនួន ២នាក់ ដែលរូបនាងពុំដែលស្គាល់ទាល់តែសោះ បានមកសួរនាងថា តើទិញអ្វីខ្លះ នាងក៏បានឆ្លើយថា ទិញល្មុត និងខោអាវក្មេងមួយចំនួន បន្ទាប់មកនាងបំរ៉ុងនឹងដើរទៅញ៉ាំបបរ ស្រាប់តែមានស្ត្រីម្នាក់មកកាន់ដៃនាង ពេលនោះនាងហាក់ដូចជាមានស្មារតីមិនប្រក្រតី ហើយស្ត្រី២នាក់នោះហៅនាងឲ្យជិះម៉ូតូទៅជាមួយគេ ដោយនិយាយថាទៅផ្ទះរបស់គេ នាងក៏ឡើងជិះម៉ូតូទៅដោយមិនដឹងខ្លួន ពេលដល់ចំណុចហួសស្ពានទី១បន្តិច (ផ្លូវទៅសៀមរាប) ក្នុងភូមិសាស្ត្រសង្កាត់កំពង់ស្វាយ ក្រុងសិរីសោភ័ណ ពួកគេបានឈប់ម៉ូតូ រួចដោះយកខ្សែកមាសសុទ្ធ១ខ្សែ ទំងន់៥ជី កាបូប១ ដែលមានលុយថៃចំនួន៥០០បាត, លុយដុល្លា១០$ , លុយខ្មែរ២ម៉ឺនរៀល កាតគ្រីម៉ូតូមានស្លាក ប.មានជួ័យ ១សេ.២១៤០ ចំនួន១សន្លឹក និងអត្តសញ្ញាណប័ណ្ណ១សន្លឹក បន្ទាប់ពួកគេធ្វើសកម្មភាពរួច បានជិះម៉ូតូគេចខ្លួនបាត់។
លោកអធិការនគរបាលក្រុងសិរីសោភ័ណ បានឲ្យដឹងថា ចំពោះសកម្មភាពដាក់ថ្នាំសណ្តំនេះ បានស្ងប់ស្ងាត់មួយរយៈហើយ ស្រាប់តែពេលនេះ លេចមុខជនសង្ស័យធ្វើសកម្មភាពនេះម្តងទៀត ដូច្នេះក្នុងនាមអធិការនគរបាលក្រុង សូមអំពាវនាវដល់ប្រជាពលរដ្ឋទាំងអស់ ប្រសិនបើមានការសង្ស័យទៅលើជនណាម្នាក់ត្រូវរាយការណ៍មក សមត្ថកិច្ច ដើម្បីសមត្ថកិច្ចធ្វើការស្រាវជ្រាវ និងសួរនាំជននោះ ហើយជាងនេះទៀត គឺត្រូវចេះប្រុងប្រយ័ត្នថែរក្សាទ្រព្យសម្បត្តិខ្លួនឯងផង៕
ប្រភព
0 មតិ:
Post a Comment