ភ្នំពេញ ៖ តារាចម្រៀងដែលល្បីឈ្មោះតាមរយៈបទចម្រៀងក្រសួងទេសចរ កញ្ញា សុនស្រីពេជ្រ ពេលនេះកំពុងមានបញ្ហាផ្នែកសុខភាព។
បើយោងតាមការបង្ហាញពីស្ត្រីម្នាក់ដែលអះអាងថាជាបងស្រីរបស់ តារាចម្រៀង សុន ស្រីពេជ្រ បានខ្សឹបប្រាប់ឲ្យដឹងថា ប្អូនស្រីរបស់គាត់( កញ្ញា សុន ស្រីពេជ្រ ) មានជំងឺឈឺត្រចៀកកើតអំបៅអំបែក អស់រយៈពេលប្រមាណ៦ខែកន្លងមកហើយ។
ប្រភពព័ត៌មានដដែលនេះបានប្រាប់ឲ្យដឹងទៀតថា ជំងឺប្អូនស្រីរបស់គាត់នេះបើសិនមិនបានពិនិត្យនិងព្យាបាលទាន់ ពេលវេលានោះទេ អាចមានស្ថានភាពគ្រោះថ្នាក់។ ប៉ុន្តែបច្ចុប្បន្ននេះស្ថានភាពជំងឺបានធូរស្រាលហើយពោលគឺមិន ចាំបាច់បញ្ជូនទៅព្យាបាលនិង វះកាត់នៅឯបរទេសទើបបាន។ បងស្រីរបស់តារាចម្រៀងប្រចាំផលិតកម្មហង្សមាសនិង រស្មីហង្សមាសរូបនេះមិនបានធ្វើការបកស្រាយឲ្យដឹងពីផលប៉ះពាល់នៃអាជីពសិល្បៈ របស់ប្អូនស្រីខ្លួននៅអំឡុងពេលមានជំងឺនោះទេ។
គួរបញ្ជាក់ដែរថា កញ្ញា សុន ស្រីពេជ្រ គឺជាកូនស្រីបង្កើតរបស់តារាសិល្បៈកំប្លែងលោក ម៉ារី សុន ហៅនាយសង់ស៊ីស។ នាងបានចូលប្រឡូកក្នុងអាជីពជាតារាចម្រៀងកាលពីឆ្នាំ២០០៦ ហើយលុះដល់ចុងឆ្នាំ២០០៩នាងក៏ចាប់ផ្ដើមល្បីឈ្មោះតាមរយៈបទចម្រៀង ជាច្រើនមាដូចជាបទ« អនុស្សាវរីយ៍រមណីយដ្ឋានតាតៃ» និងបទ« អង្គរស្នេហ៍» ជាដើមដែលត្រូវបានផលិតឡើងដោយក្រសួងទេសចរដើម្បីជំរុញផ្សព្វផ្សាយ ពីសក្ដានុពលនៃវិស័យទេសចររបស់ប្រទេសកម្ពុជា៕
0 មតិ:
Post a Comment