និយ័តករអាមេរិក និងអឺរ៉ុប បានអនុម័តចំពោះការទិញយកក្រុមហ៊ុន Motorola Mobility Holdings Inc ពីសំណាក់ក្រុមហ៊ុន Google Inc ក្នុងតម្លៃ ១២,៥ពាន់លានដុល្លារ និងថាខ្លួននឹងតាមដានយ៉ាងម៉ត់ចត់លើក្រុមហ៊ុនអ៊ីនធើណិតដ៏ធំ មួយនេះ ដើម្បីធានាឲ្យបានថា សិទ្ធិពិសេសលើរបកគំហើញថ្មី (Patent) ដែលមានសារៈសំខាន់ចំពោះឧស្សាហកម្មទូរគមនាគមន៍ នឹងត្រូវបានផ្តល់អាជ្ញាប័ណ្ណក្នុងតម្លៃប្រកបដោយយុត្តិធម៌។
នេះគឺជាការអនុម័តមួយ ក្នុងចំណោមការអនុម័តជាច្រើនកាលពីថ្ងៃ ចន្ទ ដែលបានបង្ហាញពីការតស៊ូរបស់ក្រុមហ៊ុនបច្ចេកវិទ្យានានាក្នុង ការទិញយកសិទ្ធិពិសេសលើរបកគំហើញថ្មីជាច្រើន។
ក្រសួងយុត្តិធម៌អាមេរិក ក៏បានអនុម័តផងដែរឲ្យក្រុមហ៊ុន Apple លើការទិញយកសិទ្ធិពិសេសរបស់ក្រុមហ៊ុនកាណាដា Nortel Networks Corp ជាច្រើន ដែលក្រុមហ៊ុននេះបានក្ស័យធនទៅហើយនោះ និងបានយល់ព្រមឲ្យក្រុមហ៊ុនអេឡិតត្រូនិចរបស់អាមេរិកមួយនេះទិញ យកសិទ្ធិពិសេសនានា ដែលធ្លាប់ជាកម្មសិទ្ធិរបស់ក្រុមហ៊ុន Novell Inc ផងដែរ។
ក្រុមហ៊ុន Google ដែលប្រព័ន្ធប្រតិបត្តិការ Android របស់ខ្លួនមានប្រជាប្រិយបំផុតសម្រាប់ទូរស័ព្ទទំនើបដែលអាចភ្ជាប់ អ៊ីធើណិតបាននោះ បានឲ្យដឹងកាលពីខែសីហាថា ក្រុមហ៊ុនរបស់ខ្លួន នឹងទិញយកក្រុមហ៊ុនផលិតទូរស័ព្ទ Motorola ដើម្បីទទួលបានសិទ្ធិពិសេសចំនួន ១៧ ០០០ និងកម្មវិធីចំនួន ៧ ៥០០ ខណៈក្រុមហ៊ុននេះ កំពុងព្យាយាមប្រកួតប្រជែងជាមួយគូប្រជែងនានា ដូចជាក្រុមហ៊ុន Apple និងកំពុងការពារខ្លួនឯង និងក្រុមហ៊ុនផលិតទូរស័ព្ទដែលប្រើប្រាស់កម្មវិធី Android នានាពីការប្តឹងពីបទរំលោភលើសិទ្ធិពិសេសលើរបកគំហើញថ្មី៕
អត្ថបទ៖ ភ្នំពេញ ប៉ុស្តិ៍
0 មតិ:
Post a Comment