ចំនួននារីអវកាសយានិក ដែលកំពុងហាត់ហ្វឹកហ្វឺនជាមួយក្រុមបុរសៗ ក្នុងក្របខ័ណ្ឌបេសកកម្មហោះទៅកាន់លំហអវកាសលើកនេះ មិនត្រូវបានបង្ហើបបង្ហាញឱ្យដឹងពីចំនួនពិតប្រាកដទេ។ គេគ្រាន់តែដឹងថា យានអវកាស សេនជូ-៩ (Shenzhou-9) នឹងផ្ទុកអវកាសយានិកបីនាក់ និងទំនងជាមានស្ត្រីម្នាក់ផង។ ការជ្រើសរើសអវកាសយានិក នឹងត្រូវសម្រេច នៅនាទីចុងក្រោយតែប៉ុណ្ណោះ។ នេះបើតាមការគូសបញ្ជាក់របស់ទីភ្នាក់ងារសារព័ត៌មានចិនថ្មី។
សេនជូ-៩ នឹងត្រូវបង្ហោះចេញពីភពផែនដី នៅអំឡុងខែមិថុនា និងសីហា បន្ទាប់មកនឹងត្រូវភ្ជាប់ខ្លួនទៅនឹងប្រព័ន្ធម៉ូឌុលយានអវកាស Tiangong-1 ដែលជាស្ថានីយ៍រណបភពផែនដី តាមរយៈការបញ្ជាដោយផ្ទាល់ដៃ។ នៅពេលបានភ្ជាប់ខ្លួនបានជោគជ័យហើយ អវកាសយានិកចិន ត្រូវស្នាក់នៅជាបណ្តោះអាសន្នក្នុងស្ថានីយ៍ Tiangong-1 សិន ដើម្បីធ្វើការដកពិសោធន៍វិទ្យាសាស្ត្រ។
Tiangong-1 ដែលជាទីពិសោធន៍អវកាសចិនដំបូងបំផុត ទើបបាញ់បញ្ជូនទៅកាន់លំហអវកាស កាលពីថ្ងៃទី២៩កញ្ញា ២០១១ ដោយកាំជ្រួចឡុងម៉ាច 2F និងភ្ជាប់ដោយយានអវកាស សេនជូ-៨ (Shenzhou-8) ដែលគ្មានមនុស្សជិះ មួយខែបន្ទាប់។
គម្រោងផែនការអវកាសនេះ គឺជាដំណាក់កាលដ៏សំខាន់ និងជាផ្នែកមួយនៃកម្មវិធីអភិវឌ្ឍន៍អវកាសប្រកបដោយមហិច្ឆតារបស់ចិន ដែលចង់សម្រេចបង្កើតឱ្យបានស្ថានីយ៍អវកាសមួយមានសកម្មភាពជាប់លាប់ នៅឆ្នាំ២០២០ និងមានក្រុមអ្នកអវកាសអាចរស់នៅបានរាប់ខែ ដូចស្ថានីយ៍អវកាសរុស្ស៊ី និងស្ថានីយ៍អវកាសអន្តរជាតិ ISS៕ RFI
0 មតិ:
Post a Comment