ភ្នំពេញៈ កាលពីថ្ងៃទី១មីនាម្សិលម៉ិញសហព័ន្ធកីឡាគុនដាវ (Fencing)កម្ពុជាបានធ្វើមហាសន្និបាតសម្រាប់អាណត្តិថ្មីរបស់ខ្លួនឆ្នាំ២០១២ដល់ឆ្នាំ២០១៦ ។
សហព័ន្ធកីឡាគុនដាវនេះ បង្កើតឡើងនៅឆ្នាំ២០០៦ មានឈ្មោះជាផ្លូវការថា សហព័ន្ធកីឡាគុនដាវកម្ពុជា បានទទួលស្គាល់ពីសហព័ន្ធកីឡាគុនដាវអន្តរជាតិ (FIE) នៅថ្ងៃទី១ ខែកុម្ភៈ ឆ្នាំ២០០៦ និងបានទទួលស្គាល់ដោយគណៈកម្មាធិការជាតិអូឡាំពិកកម្ពុជា សម្រាប់អាណត្តិទី១ ពីឆ្នាំ២០០៦ ដល់ឆ្នាំ២០១០ នៅថ្ងៃទី១៨ ខែឧសភា ឆ្នាំ២០០។ប៉ុន្តែសហព័ន្ធនេះ បានពន្យារអាណត្តិខ្លួនអស់រយៈពេល២ឆ្នាំ ដោយទើបតែធ្វើនៅឆ្នាំនេះ ។
នៅក្នុងរបាយការណ៍ ដែលអានក្នុងមហាសន្និបាតបានបង្ហាញថា គិតត្រឹមខែធ្នូ ឆ្នាំ២០១០ មានគ្រូបង្វឹកម្នាក់ កីឡាករម្នាក់ និងកីឡាការិនីម្នាក់តែប៉ុណ្ណោះ។ ប៉ុន្តែមកដល់ឆ្នាំ២០១២នេះ សហព័ន្ធនេះហាក់ដូចជាមិនទាន់បង្ហាញទិន្នន័យថ្មី ពីចំនួនគ្រូ កីឡាករ-កីឡាការិនីប៉ុន្មាននាក់នោះទេ។
នៅក្នុងមហាសន្និបាតនេះ លោក ចៅ ភិរុណ ជាប់ឆ្នោតជាប្រធានសហព័ន្ធលោកមាស សារិន ជាប់ឆ្នោតជាអនុប្រធានទី១ លោក ខ្លូត រតនា ជាអនុប្រធានទី២ លោក ម៉ម ខាន់រ៉ង ជាអគ្គលេខាធិការ អ្នកស្រី វិន រ៉ាវី ជាអគ្គលេខាធិការរង លោក ហ៊ុយ សាន់ ជាអគ្គហិរញ្ញិក និងលោក ឈុន យ៉ាន ជាសមាជិក។
លោក ម៉ម ខាន់រ៉ង ដែលមានឈ្មោះធ្វើជាអគ្គលេខាធិការនោះ បានប្រាប់កម្ពុជាថ្មីថា លោកបានសុំឈប់ពីសហព័ន្ធជាយូរមកហើយ ៕
0 មតិ:
Post a Comment