ភ្នំពេញ: មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១២ ខែមីនា ឆ្នាំ២០១២ បានប្រកាសក្នុងកិច្ចប្រជុំរដ្ឋសភាថា មកដល់ពេលនេះ កម្ពុជាជំពាក់បំណុលបរទេស ឬក៏ខ្ចីប្រាក់ពីបរទេសដើម្បីអភិវឌ្ឍន៍ប្រទេស សរុបចំនួនតែ ៣.៣០០ លានដុល្លារប៉ុណ្ណោះ។
នេះជាប្រតិកម្មរបស់លោក អ៊ុក រ៉ាប៊ុន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តបទៅនឹងការលើកឡើងរបស់សមាជិកសភាគណបក្សសមរង្ស៊ី នៅក្នុងកិច្ចប្រជុំរដ្ឋសភាវិសាមញ្ញ កាលព្រឹកថ្ងៃទី១២ ខែមីនា ឆ្នាំ២០១២ ចំពោះការពិភាក្សា និងអនុម័តសេចក្តីព្រាងច្បាប់ ស្តីពី ការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១០។
សមាជិករដ្ឋសភាគណបក្សសមរង្ស៊ី បានលើកឡើងថា រាជរដ្ឋាភិបាលបានជំពាក់បណុលប្រទេសចិនតែមួយ មានចំនួន ៤.០០០ លានដុល្លារសហរដ្ឋអាមេរិកហើយ មកដល់ពេលនេះ ហើយរាជរដ្ឋាភិបាលបានប្រគល់ដីសម្បទាននិងការរុករករ៉ែ ដោយគ្មានការដេញថ្លៃអ្វីទាំងអស់ដល់ក្រុមហ៊ុនមកពីប្រទេសចិន គឺសម្រេចប្រគល់ឲ្យតែម្តង។
នៅក្នុងកិច្ចប្រជុំសភាវិសាមញ្ញ លោក សុន ឆ័យ សមាជិកសភាមណ្ឌលភ្នំពេញ
នៃគណបក្សសមរង្ស៊ី បានលើកឡើងថា មកដល់ពេលនេះ រាជរដ្ឋាភិបាលកម្ពុជា ជំពាក់បំណុលប្រទេសចិន ចំនួន ៤.០០០ លានដុល្លារសហរដ្ឋអាមេរិកទៅហើយ។ជាមួយគ្នានោះ រាជរដ្ឋាភិបាលបានចាយវាយប្រាក់កម្ចីខ្ជះខ្ជាយថែមទៀត គ្មានតម្លាភាព។
ចំណែកលោក យឹម សុវណ្ណ អ្នកតំណាងរាស្ត្រមណ្ឌលភ្នំពេញ នៃគណបក្សសមរង្ស៊ី ក៏បានលើកឡើងថា រាជរដ្ឋាភិបាលបានប្រគល់ដីសម្បទាន ឲ្យទៅក្រុមហ៊ុមបរទេសមានទំហំជាង ២ លានហិចតា និងបានប្រគល់ដីរ៉ែសម្បទាន ឲ្យទៅក្រុមហ៊ុនបរទេស ( ក្នុងនោះ មានក្រុមហ៊ុនចិនដែរ ) មានទំហំជាង ២ លានហិចតា ដែលស្មើចំនួន ២៦% នៃផ្ទៃដីសរុបទូទាំងប្រទេស។
លោក សុវណ្ណ បានបញ្ជាក់ថា រាជរដ្ឋាភិបាលបានទទួលថវិការពីការផ្តល់ដីសម្បទាននោះ មិនបានចំនួន ២៦ លានដុល្លាអាមេរិកផង ដែលគិតជាមធ្យមរាជរដ្ឋាភិបាលជួលដីឲ្យក្រុមហ៊ុនឯកជន គឺក្នុង ១ ហិចតា ថ្លៃតែ ១០ ដុល្លារប៉ុណ្ណោះ។
លោក យឹម សុវណ្ណ បានលើកឡើងទៀតថា ប្រជាកសិករនៅខេត្តបាត់ដំបង ដែលបានជួលដីឯកជន មកធ្វើកសិកម្មវិញ ក្នុង ១ហិចតា ថ្លៃ ១៨០ ដុល្លារ ក្នុង ១ ឆ្នាំ មិនទាន់គិតដល់ការចំណាយថ្លៃជី និងបង់លុយឲ្យមន្ត្រីច្រកព្រំដែន ១ តោន ថ្លៃពី ៤០០ ទៅ ៥០០ បាតនោះទេ។ ដូច្នេះលោកសុំឲ្យរាជរដ្ឋាភិបាល ជួយគិតមើលផង។
លោក យឹម សុវណ្ណ បានទាមទារឲ្យរាជរដ្ឋាភិបាល ត្រូវពិនត្យដាក់ឲ្យមានការដេញថ្លៃ មានតម្លាភាពនូវរាល់អ្វីៗទាំងអស់ឡើងវិញ។ ជាមួយគ្នានោះ លោកបានលើកពីការលក់អចលនទ្រព្យ ដែលជាសម្បត្តិរដ្ឋ នៅខេត្តបាត់ដំបងជាង ២០ កន្លែង ដែលគេអះអាងថា យកទៅអភិវឌ្ឍន៍ ប៉ុន្តែការអភិវឌ្ឍគ្មានតម្លាភាពទេ ពីព្រោះបើតាមលោកគិត ការលក់អចលនទ្រព្យនោះ មានទឹកប្រាក់ដល់ទៅ ៤០០ លានដុល្លារអាមេរិក។
លោក ក៏បានលើកឡើងពីការលក់អចលនទ្រព្យ នៅខេត្តសៀមរាប និងរាជធានីភ្នំពេញ និងរាប់ពាន់កន្លែងទៀត នៅទូទាំងប្រទេស បានក្លាយទៅជាសម្បត្តិឯកជនអស់ហើយ មិនដឹងជា បានលុយប៉ុន្មានពាន់លានដុល្លារទេ។ លោកសុំឲ្យមានការដាក់លក់ដេញថ្លៃជាសាធារណៈ។
ជាការឆ្លើយតប លោក អ៊ុក រ៉ាប៊ុន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងថា មកដល់ពេលនេះ រាជរដ្ឋាភិបាលបានខ្ចីថវិកាពីបរទេស និងនិងខ្ចីពីអង្គការអន្តរជាតិ មានចំនួនតែ ៣.៣០០ លានដុល្លារអាមេរិកទេ គឺមិនដូចការលើកឡើងរបស់សមាជិកសភាគណបក្សប្រឆាំងលើកឡើងទេ។
លោករដ្ឋលេខាធិការ បានពន្យល់ថា ថវិកាដែលខ្ចីពិបរទេសមកនោះ គឺសម្រាបើយកមកធ្វើការអភិវឌ្ឍប្រព័ន្ធហេដ្ឋារចនាសម្ព័ន្ធ ដូចជា ធារាសាស្ត្រផ្លូវថ្នល់។ បើអត់មានប្រព័ន្ធហេដ្ឋរចនាសម្ព័ន្ធ ក៏ពុំអាចធ្វើឲ្យកម្ពុជា មានកំនើនសេដ្ឋកិច្ចបែបនេះដែរ។
ជាមួយនោះ លោក អ៊ុក រ៉ាប៊ុន ក៏បានបញ្ជក់តបទៅតំណាងរាស្ត្របក្សប្រឆាំងទៀតថា មុននឹងយល់ព្រមឲ្យរាជរដ្ឋាភិបាលកម្ពុជា ខ្ចីលុយពីបរទេស មកធ្វើការអភិវឌ្ឍនោះ គឺមានការវាយតម្លៃពីសន្ទុះកំនើនសេដ្ឋកិច្ចកម្ពុជាបច្ចុប្បន្ន និងអនាគតដែរ។
ជាមួយគ្នានោះ លោក ឈាង វុន សមាជិកសភាមណ្ឌលបាត់ដំបង មកពីគណបក្សប្រជាជនកម្ពុជា បានប្រតិកម្មតបថា ការខ្ចីប្រាក់ពីប្រទេសចិន គឺសម្រាប់យកមកធ្វើការអភិវឌ្ឍជាតិ និងមានការប្រាក់ទាប៕
0 មតិ:
Post a Comment