ភ្នំពេញ: បើទោះជាការប្រមូលពន្ធ ពីរខែដើមឆ្នាំ២០១២ សម្រេចលើសផែនការ១៣ភាគរយក្តី ក៏រដ្ឋមន្ត្រីក្រសួងហិរញ្ញវត្ថុ ជំរុញថែមឲ្យមន្ត្រីពន្ធដារប្រមូលពន្ធអាករលើតម្លៃបន្ថែម ដែលជាប្រភពសម្រាប់បង្កើនចំណូលពន្ធដារ និងបន្តការខិតខំគ្រប់គ្រងនិងប្រមូលពន្ធលើអ្នកជាប់ពន្ធមធ្យម ព្រមទាំងបន្តការខិតខំគ្រប់គ្រង និងប្រមូលពន្ធលើប្រាក់បៀវត្សរ៍របស់និយោជកនៃក្រុមហ៊ុនថែមទៀត ។
មន្ត្រីអគ្គនាយកដ្ឋានពន្ធដារ បានឲ្យដឹងថា នៅក្នុងខែមករានិងកុម្ភៈដើម ឆ្នាំ ២០១២នេះពន្ធដាររកបានចំណូលពន្ធប្រមាណ៣៨៤,៣ពាន់លានរៀល(ប្រមាណជា៩៦លានដុល្លារអាមេរិក) ដែលសម្រេចបានលើសផែនការឆ្នាំ២០១២ ប្រមាណជា១៣ ភាគរយ ។
ទោះជាបែបនេះក្តី មន្ត្រីអគ្គនាយកដ្ឋានពន្ធដារ និយាយថា លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុពេលចូលរួមប្រជុំបូកសរុបលទ្ធផលការងារប្រមូលពន្ធសម្រាប់២ខែដំបូងឆ្នាំ២០១២នេះ កាលពីសប្តាហ៍មុន បានដាក់ចេញនូវវិធានការផ្សេងៗនិងវិធានការអាទិភាពសម្រាប់ការអនុវត្តប្រមូលពន្ធដារបន្ថែមទៀត។
លោកឧបនាយករដ្ឋមន្ត្រីគាត ឈន់ បានជំរុញឲ្យមន្ត្រីពន្ធដារបន្តការខិតខំគ្រប់គ្រង និងប្រមូលពន្ធអាករលើតម្លៃបន្ថែម ដែលជាប្រភពសម្រាប់បង្កើនចំណូលពន្ធដារ បន្តការខិតខំគ្រប់គ្រងនិងប្រមូលពន្ធលើអ្នកជាប់ពន្ធមធ្យម ដែលនៅស្ថិតក្រោមការគ្រប់គ្រងរបស់សាខាខេត្តទាំង២៣ និងខណ្ឌទាំងអស់នៅភ្នំពេញ បន្តការខិតខំគ្រប់គ្រងនិងប្រមូលពន្ធលើប្រាក់បៀវត្សរ៍របស់និយោជកនៃក្រុមហ៊ុនដែលបានចុះបញ្ជីជាមួយរដ្ឋបាលសារពើពន្ធ។
ជាមួយគ្នានេះ លោកក៏បានបញ្ជាក់នូវវិធានម៉ឺងម៉ាត់ថា ត្រូវអនុវត្តវិធានការតឹងទារចំពោះសហគ្រាសរឹងមួយចំនួនដែលជំពាក់បំណុលពន្ធច្រើន ដូចជាការរឹបអូស ការឃាត់ទុកគណនីធនាគារ ការបញ្ឈប់ប្រតិបត្តិការនាំចេញ នាំចូល ការទុកជាមោឃៈនូវអាជ្ញាប័ណ្ណ កាត់ប្រាក់នៅរតនាគារជាតិ មិនអនុញ្ញាតឲ្យចូលដេញថ្លៃនិងមិនអនុញ្ញាតឲ្យចុះបញ្ជីថ្មីជាដើម ៕
0 មតិ:
Post a Comment