ភេង សុវ័ណ្ណវិចិត្រ និស្សិតបញ្ចប់វគ្គសិក្សាថ្នាក់Cisco CCIE ក្នុងឆ្នាំ២០១០ ក្នុងទីក្រុងហុងកុងជានិស្សិត IT របស់កម្ពុជាដំបូងបង្អស់ដែលទទួល បានសញ្ញាប័ត្រ Cisco Certified Internetwork Expert (CCIE) ដែលមានមនុស្សជាច្រើនច្រណែននឹងភាពជោគជ័យរបស់គាត់ដោយសារអ្វី ដែលគាត់ទទួលបានគឺជាក្តីស្រមៃរបស់មនុស្សគ្រប់រូបហើយវាគឺជា រឿងពិបាកបំផុតដើម្បីសម្រេចបានក្តីស្រមៃមួយនេះ។ គាត់បានបន្ថែមទៀតថា៖ ” វាពិតជារឿងលំបាកបំផុតបើយើងចង់ប្រលងជាប់វិញ្ញាសាកម្រិត CCIE ហើយវាក៏ជាឱកាសមួយដ៏កម្រដើម្បីទទួលបាននូវការប្រលងប្រភេទនេះ “។
ក្នុងចំណោមសញ្ញាប័ត្រទាំងអស់ Cisco CCIE គឺជាសញ្ញាប័ត្រជាន់ខ្ពស់បំផុតរបស់ Cisco ។
លោក ហុង សុភានី ប្រធាន ផ្នែកគ្រប់គ្រង របស់ Cisco Networking Academy ប្រចាំប្រទេសកម្ពុជាបាននិយាយថា សុវ័ណ្ណវិចិត្រ គឺជាមនុស្ស ម្នាក់ក្នុងចំណោមមនុស្ស ២៥០០០ នាក់នៅក្នុងពិភពលោកដែលទទួលបានសញ្ញាប័ត្រ CCIE ហើយនៅក្នុងប្រទេសកម្ពុជាមិនធ្លាប់មាននរណា ម្នាក់អាចទទួលបានសញ្ញាប័ត្រនេះនៅឡើយទេ។
សុវ័ណ្ណវិចិត្រ ដែលទទួលបានការបណ្ដុះបណ្ដាលវគ្គសិក្សាផ្នែក networking ដែលបានផ្ដល់ឱ្យដោយ Cisco ទទួលស្គាល់ថាការសិក្សា Cisco មានការលំបាកក៏ព្រោះតែកត្តាច្រើនយ៉ាង ។ Cisco គឺជាក្រុមហ៊ុនខ្នាតធំដែលធ្វើការបង្កើតផលិតផល Computer networking និងផ្ដល់សេវាកម្មNetworking ទូទាំងពិភពលោក។ ក្រុមហ៊ុននេះក៏មានការិយាល័យតំណាងរបស់ខ្លួនក្នុងប្រទេសកម្ពុជាដែរ ។
ក្នុងពេលបច្ចុប្បន្ន សុវ័ណ្ណវិចិត្រ កំពុងតែបម្រើការឱ្យក្រុមហ៊ុន Nexusguard ដែលជាក្រុមហ៊ុនសុវត្ថិភាព Cloud មួយនៅក្នុងប្រទេស តៃវ៉ាន់។ គាត់ ក៏ ធ្លាប់ជាអតីតគ្រូបង្រៀនរបស់ Cisco ដែលធ្លាប់បង្រៀននិស្សិតកម្ពុជាតាមរយៈកម្មវិធី WebEx។ ភាពជោគជ័យរបស់ សុវ័ណ្ណវិចិត្រ គឺបានមកពី ការតស៊ូ និងភាពប៉ិនប្រសប់។ សុវ័ណ្ណវិចិត្រ មានស្រុកកំណើតនៅខេត្តក្រចេះគាត់ធ្លាប់ជាសិស្សពូកែម្នាក់ខាង ផ្នែកគណិតវិទ្យាកាលពីនៅវិទ្យាល័យ ក្នុងឆ្នាំ ២០០៣ នាទីក្រុងភ្នំពេញដោយសារតែគាត់មាននិស្ស័យខាង វិទ្យាសាស្ត្រ និង បច្ចេកវិទ្យា គាត់បានសម្រេចចិត្តសិក្សាមុខវិជ្ជាIT ក្នុង សាកលវិទ្យាល័យនីតិសាស្ត្រ និងវិទ្យាសាស្រ្ដសេដ្ឋកិច្ច (RULE)។
គាត់បានបន្ថែមទៀតថា៖ “ខ្ញុំស្គាល់ពីសមត្ថភាពនិងរបៀបសិក្សារបស់ខ្លួនឯង ដូច្នេះហើយទើបខ្ញុំជ្រើសរើសសិក្សាមុខវិជ្ជានេះ “។
ដោយសារតែការសិក្សានៅក្នុងសាលា RULE របស់គាត់មានលក្ខណៈល្អឥតខ្ចោះលោក សុវ័ណ្ណ វិចិត្រ ត្រូវបានជ្រើសរើសឱ្យទទួលបាន អាហារូបករណ៍ពេញឆ្នាំទៅរៀនកុំព្យូទ័រនៅឯប្រទេសចិន។ នៅទីនោះហើយដែលគាត់ទទួលបានឱកាសសិក្សាក្នុង Cisco Networking Academy ។
គាត់បាននិយាយថាគាត់បានចំណាយអស់ប្រាក់ជាច្រើនដើម្បីទិញឧបករណ៍ សម្រាប់អនុវត្តន៍ដើម្បីរៀបចំខ្លួនសម្រាប់ការប្រឡងរហូតដល់គាត់ មាន ទំនុកចិត្តគ្រប់គ្រាន់ក្នុងខ្លួនមុនពេលដែលគាត់សម្រេចចិត្ត ប្រឡងវិញ្ញាសា CCIE ។
គាត់បាននិយាយទៀតថា “ចេះសិក្សាស្វែងយល់ដោយខ្លូងឯង គឺជាកត្តាមួយដ៏សំខាន់សម្រាប់អ្នករៀន IT” ដោយគាត់បានបន្ថែមទៀតថាអ្នករៀន IT គួរតែធ្វើការស្រាវជ្រាវ និង អនុវត្តន៍ឱ្យបានច្រើនទៅលើអ្វីដែលពួកគេបានរៀនពីសាលា ៕
ប្រភព៖ CM
0 មតិ:
Post a Comment