រហូតមកទល់នឹងពេលនេះ មានតែប្រូក្រាមមួយប៉ុណ្ណោះបង្កើតដោយក្រុមហ៊ុន Google ដែលអាចឲ្យយើងបកប្រែភាសានានាទៅជាភាសាមួយផ្សេងទៀត បានយ៉ាងល្អអាច យកជាការបាន ទោះបីវានៅមិនទាន់មានគ្រប់ភាសាទាំងអស់ក៏ដោយចុះ តែចាត់ទុកថាវាគឺជាជំហានមួយទៀតសម្រាប់បង្រួមគម្លាតរវាងភាសា ហើយក៏ជាជំនួយមួយយ៉ាងសំខាន់ សម្រាប់អ្នកចង់សិក្សាភាសាបរទេសផងដែរ។ ប្រូក្រាមដែលក្រុមហ៊ុន Google បានបង្កើតគឺ "Google Translator" អាចឲ្យយើងប្រើនៅលើ Android OS ទាំងជាមួយទូរស័ព្ទ និង Tablet បាន ក្រៅពីនេះក៏មាន Microsoft translator មួយទៀតដែលមានរបៀបប្រើស្រដៀងគ្នានោះដែរ ប៉ុន្តែអាចប្រើបានតែនៅពេលយើងចូលទៅវេបសាយ www.microsofttranslator.com ប៉ុណ្ណោះ មិនបានបង្កើតជាប្រូក្រាមសម្រាប់ឲ្យយើងយកមក Install ដាក់ក្នុងទូរស័ព្ទ ឬ Tablet ដូចអ្វីដែល Google បានធ្វើនោះឡើយ, សូមបញ្ជាក់ថា ទាំង Google និង Microsoft ឥតបានបញ្ចូលការបកប្រែជាភាសាខ្មែរយើងនៅក្នុងនោះទេ មានតែភាសាថៃ វៀតណាម គ្មានភាសាខ្មែរយើងទេ។ ក្នុងពេលថ្មីៗនេះក្រុមហ៊ុន Google បានដើរមួយជំហានទៅមុខ ផុតពី Google និង Apple ដោយបានបង្កើតប្រូក្រាមមួយអាចឲ្យបកប្រែភាសា ទៅជាសម្លេង បន្ទាប់មកប្រូ ក្រាមនេះវាប្រើសម្លេងរបស់យើងឲ្យនិយាយភាសាមួយទៀតដែលយើងបានជ្រើសយក។ ប្រូក្រាមបកប្រែភាសាដោយប្រើសម្លេងផ្ទាល់របស់ អ្នកនិយាយវាមិនប្រើសម្លេងផ្សេងយកមក ជំនួយទេ តែជាសម្លេងសូរសៀងរបស់អ្នកប្រើទាំងស្រុងតែម្តង។
បច្ចេកទេសនៃការយកសម្លេងដើមរបស់អ្នកនិយាយមកឲ្យនិយាយភាសាមួយទៀតកើតឡើយបានដោយ អាស្រ័យទៅលើការបង្ហាត់ ឬប្រាប់ទៅប្រូក្រាមនោះឲ្យវាស្គាល់ សូរស័ព្ទនៃការបញ្ចេញសម្លេងរបស់អ្នកប្រើ បន្ទាប់ពីនេះប្រូក្រាមវានឹងប្រើសូរសម្លេងរបស់យើងទៅបង្កើតជាសូរសម្លេងសម្រាប់ភាសាដទៃឯទៀត ដោយរក្សាបាននូវទម្រង់នៃសម្លេង ដើមមិនឲ្យខុសឡើយ។ អ្នកប្រើគ្រាន់តែនិយាយនូវឃ្លាឬប្រយោគ ដែលចង់និយាយ រួចជ្រើសរើសភាសាដែលចង់ឲ្យវាបកប្រែ នោះឃ្លាឬប្រយោគដែលយើងបាននិយាយនឹងត្រូវបាននិយាយចេញមក ភ្លាមៗ ជាភាសាមួយទៀត ហាក់បីដូចជាយើងខ្លួនឯងបាននិយាយភាសានោះដោយផ្ទាល់ដូច្នោះដែរ ព្រោះវាបានរក្សានូវសូរសៀងដើមរបស់អ្នកនិយាយនោះទាំងស្រុង។ ប្រូក្រាមនេះកំពុងស្ថិតនៅក្នុងការអភិវឌ្ឍន៍នៅឡើយទេ ប៉ុន្តែអាចនឹងត្រូវដាក់ចេញឲ្យប្រើការនៅពេលណាមួយជាមួយទូរស័ព្ទដែលដើរដោយប្រព័ន្ធ Window ឬប្រើដោយ ឧបករណ៍ណាមួយ ដោយឡែក(នៅមិនទាន់ច្បាស់)ក៏អាចថាបាន។ ក្នុងពេលនេះប្រូក្រាមនោះអាចឲ្យអ្នកប្រើបកប្រែបានចំនួន ២៦ភាសា ដែលជាភាសាគោលប្រើច្រើនក្នុងពិភពលោក រំពឹងថាចំនួនភាសាអាចកើនឡើងច្រើនជាងនេះ តែភាសាខ្មែរយើងប្រហែលជាគ្មានវាសនាក្នុងពេលឆាប់ៗនេះទេ ឬអាចគ្មានតែម្តងក៏ថាបាន ព្រោះចំនួនអ្នកប្រើ(អ្នកនិយាយតិចពេក)មិនមានច្រើន ឬមិនចំគោលដៅរបស់គេ។ អ្នកប្រើត្រូវប្រើពេលយ៉ាងហោចណាស់ក៏មួយម៉ោងដែរ ដើម្បីបង្ហាត់ប្រូក្រាមនោះឲ្យវាបានស្គាល់សម្លេងរបស់យើង ប្រូក្រាមនោះវាយកសម្លេងរបស់យើងទៅប្រៀបធៀប ជាមួយពាក្យនៃភាសាផ្សេងទៀត រួចកាឡៃសម្លេងរបស់យើង ឲ្យមានសូរបន្លឺចេញមកឲ្យដូចសូរដើមនៃការបញ្ចេញសម្លេងរបស់អ្នកប្រើ, ទោះបីវាមិនបានមួយរយភាគរយដូចជាសំនៀង នៃសូររបស់អ្នកប្រើទាំងស្រុងក្តី តែអាចនិយាយបានថា វាគឺជាសម្លេងរបស់យើងដែលជាអ្នកប្រើ។ នៅក្នុងភាពយន្តរឿង Startrek លោក Captain Kirk មានកាន់ឧបករណ៍ម្យ៉ាងនៅក្នុងដៃសម្រាប់បកប្រែសម្លេង ដែលនិយាយឲ្យទៅជាភាសាមួយទៀតភ្លាមៗ អាចនិយាយបានថានេះគឺជាក្តីស្រមៃបានក្លាយពីការប្រឌិតក្នុងភាពយន្តឲ្យមកជាការពិត ហើយយើងសង្ឃឹមថា នៅពេលអនាគតខាងមុខ ភាសាខ្មែរយើងនឹងត្រូវបានគេដាក់បញ្ចូលទៅក្នុង នោះផងដែរ។ នៅពេលណាមួយខាងមុខយើងអាចនិយាយភាសាមួយជាមួយអ្នកម្ខាងទៀតដែលនិយាយភាសាផ្សេងតែអាចស្តាប់គ្នាបាន ព្រោះវាត្រូវបានបកប្រែពីភាសាមួយទៅភាសាមួយទៀតភ្លាមៗ ដោយមិនចាំបាច់ត្រូវពឹងទៅលើអ្នកបកប្រែឡើយ។ គោលដៅរបស់ប្រូក្រាមបកប្រែដោយប្រើការនិយាយចេញមកនេះ កំពុងស្ថិតក្នុងការស្រាវជ្រាវនៅឡើយទេ ឯគោលដៅនៃប្រូក្រាមនេះក៏មិនទាន់ ដឹងថាត្រូវគេយកទៅប្រើជាមួយអ្វីខ្លះក៏នៅមិនទាន់ដឹងដែរ តែបើសិនជាវាមានភាពសុក្រឹតអាចយកជាការបាន យើងអាចនឹងឃើញវាត្រូវបានគេប្រើនៅលើយន្តហោះ តាមទូរស័ព្ទ Tablet ឬ ឧបករណ៍យកជាប់តាមខ្លួនរថយន្ត និងតាមទីសាធារណៈនានាជាក់ជាមិនខាន ព្រោះសេចក្តីត្រូវការរបស់ប្រូក្រាមបកប្រែភាសានេះមានច្រើនណាស់ ជាពិសេសនោះ គឺវាអាចប្រើការ បានគ្រប់ទីកន្លែង ទូទាំងពិភពលោក តែគិតថាអាជីពរបស់អ្នកប្រកបរបរបកប្រែភាសា មិនត្រូវបាត់បង់ ដោយសារតែវាឡើយ។ សូមរម្លឹកផងដែរថា Apple បានបង្កើត SIRI សម្រាប់ជាជំនួយការរបស់ iphone 4S តែនៅលើ Android វិញវាមានប្រូក្រាមមួយឈ្មោះថា Google Assistant អាច ប្រើការបានដូចគ្នាទៅនិង SIRI របស់ Apple ដែរ។ យើងជាខ្មែរនិយាយអង់គ្លេសមិនសូវបានច្បាស់ល្អ មិនសូវត្រូវតាមវេយ្យាករណ៍ តែប្រូក្រាម Google Assistant អាចយល់ពីអ្វីដែល យើងនិយាយ ប្រសើរជាង SIRI គ្រាន់តែព្យាយាមនិយាយឲ្យត្រូវតាមវេយ្យាករណ៍ នោះយើងនឹងមានអ្នកជំនួយការម្នាក់ដែលនៅក្បែរយើងជានិច្ចមិនខាន បើប្រៀបធៀបជាមួយ SIRI វិញគឺមិនចាញ់គ្នាប៉ុន្មានទេ ប្រហាក់ប្រហែលគ្នា៕ CEN
0 មតិ:
Post a Comment