ភ្នំពេញ: ធនាគារអភិវឌ្ឍន៍អាស៊ី ADB បានប្រកាសនូវលទ្ធផលនៃការព្យាករណ៍សេដ្ឋកិច្ច ឬភាសាបច្ចេកទេសហៅថា ផលិតផលក្នុងស្រុកសរុប GDP សម្រាប់ប្រទេសកម្ពុជា គឺកំណើនសេដ្ឋកិច្ចកម្ពុជានៅឆ្នាំ២០១១ កើនឡើងដល់ ៦,៨%។ ចំណែកឆ្នាំ២០១២ កំណើនសេដ្ឋកិច្ចកម្ពុជា បានថយចុះមកនៅត្រឹមតែ ៦,៥%។ ក៏ប៉ុន្តែ ADB បានមើលឃើញថា នៅឆ្នាំ២០១៣ សេដ្ឋកិច្ចកម្ពុជានឹងកើនឡើងដល់ ៧%។
លទ្ធផលព្យាករណ៍សេដ្ឋកិច្ច ដែលជារបាយការណ៍ប្រចាំឆ្នាំ របស់ធនាគារអភិវឌ្ឍន៍អាស៊ី ដែលមានឈ្មោះថា “ទស្សនវិស័យអភិវឌ្ឍន៍អាស៊ី ២០១២ ( ADO 2012 )” ត្រូវបានប្រកាសនៅព្រឹកថ្ងៃទី១១មេសា ឆ្នាំ២០១២ នៅទីស្នាក់ការ ADB ជិតផ្ទះសម្តេចនាយករដ្ឋមន្ត្រី ហ៊ុន សែន ក្នុងរាជធានីភ្នំពេញ ជិតវិមានឯករាជ្យ។
របាយការណ៍បង្ហាញថា ការព្យាករពីកំណើនសេដ្ឋកិច្ចកម្ពុជាយ៉ាងដូច្នេះ ដោយផ្អែកលើកំណើននៃការនាំចេញសម្លៀកបំពាក់ និងស្បែកជើង កំណើននៃវិស័យសេវាកម្ម និងទស្សនវិស័យសេដ្ឋកិច្ចជាសកល ដែលមានស្ថិរភាពជាងមុន។
ចំពោះការព្យាករពីកំណើនសេដ្ឋកិច្ចកម្ពុជា នឹងថយចុះមកនៅត្រឹម ៦,៥% នៅឆ្នាំ២០១២ ត្រូវបាន ADB សន្មតថា បណ្តាលមកពីការថយចុះនូវការនាំចេញនៃវិស័យឧស្សាហកម្ម និងការកើនឡើងបន្តិចបន្តួចប៉ុណ្ណោះ នៃកំណើនក្នុងវិស័យសេវាកម្ម និងកសិកម្ម។ កំណើនក្នុងវិស័យឧស្សាហកម្ម ដោយមានការជំរុញពីការនាំចេញសម្លៀកបំពាក់ និងស្បែកជើង ទៅកាន់សហរដ្ឋអាមេរិក និងសហភាពអឺរ៉ុប នឹងថយចុះមកនៅ ១១,៤% ពី ១៣,៩% កាលពីឆ្នាំ២០១១។
តាម ADB ការថយចុះនៃកំណើនសេដ្ឋកិច្ចកម្ពុជា បន្តិចបន្តួច នៅឆ្នាំ២០១២ ក៏មកពីសេដ្ឋកិច្ចរបស់សហភាពអឺរ៉ុប និងសហរដ្ឋអាមេរិក ដែលជាទីផ្សារនាំចេញដ៏សំខាន់របស់ប្រទេសកម្ពុជា។
លោក Peter Brimble អនុប្រធានប្រចាំប្រទេស និងជាសេដ្ឋកិច្ចវិទូជាន់ខ្ពស់របស់ធនាគារអភិវឌ្ឍន៍អាស៊ីប្រចាំប្រទេសកម្ពុជា បានមានប្រសាសន៍ថា “បើទោះបីជាមានគ្រោះទឹកជំនន់អាក្រក់បំផុត ដែលមិនធ្លាប់មានក្នុងរយៈពេលជាងមួយទស្សវត្សរ៍កន្លងមកនេះ កើតមានឡើង កាលពីឆ្នាំមុន និងបើទោះបីជាមានភាពមិនប្រាកដប្រជាក្នុងកម្រិតខ្ពស់ និងកលយុគសេដ្ឋកិច្ច ក្នុងសកលលោកក៏ដោយ ប្រទេសកម្ពុជា ត្រូវបានគេរំពឹងទុកថា នឹងបង្ហាញពីកំណើនសេដ្ឋកិច្ចដ៏រឹងមាំ នៅក្នុងរយៈពេលពីរឆ្នាំខាងមុខ។ ប៉ុន្តែភាពមិនសមាមាត្រនៃធនធានមនុស្ស និងទីផ្សារជំនាញ ដែលកាន់តែរីកធំ នៅក្នុងរយៈពេលប៉ុន្មានឆ្នាំចុងក្រោយនេះ រំលេចឲ្យឃើញពីភាពចាំបាច់ ដើម្បីធ្វើឲ្យសាលារៀន និងស្ថាប័នបណ្តុះបណ្តាលវិជ្ជាជីវៈ ឲ្យមកនៅកៀកសហគមន៍ធុរកិច្ច សំដៅបង្កើនគុណភាព និងភាពពាក់ព័ន្ធទៅនឹងតម្រូវការទីផ្សារ”។
យ៉ាងណាក៏ដោយ ADB បានលើកឡើងពីអតិផរណា ទំនិញឡើងថ្លៃ នៅក្នុងឆ្នាំ២០១២ និងឆ្នាំ២០១៣ នឹងថយចុះមកនៅត្រឹមប្រមាណ ៥% គិតជាមធ្យមប្រចាំឆ្នាំ ពី ៥,៥% នៅឆ្នាំ២០១១ ដោយសន្មតថា នឹងមានការប្រើប្រាស់ប្រភពក្នុងស្រុកក្នុងកម្រិតទាប ដើម្បីផ្តល់ហិរញ្ញប្បទាន ដល់ឱនភាពថវិកា។ ប៉ុន្តែការឡើងថ្លៃប្រេងជាសកល នៅឆ្នាំ២០១២ អាចធ្វើឲ្យការព្យាករនេះ ប្រឈមនឹងភាពមិនប្រាកដប្រជាផងដែរ៕
ថ្ងៃទី១១ខែមេសា/09:50PM
0 មតិ:
Post a Comment