8 មេសា 2012
ភ្នំពេញ: ក្រូចឆ្មារវាគឺជាប្រភេទរុក្ខជាតិហូបផ្លែម៉្យាងដែលវាផ្តល់សារប្រយោជន៍ដ៏ច្រើនចំពោះសុខភាព ក្នុងនោះសំខាន់បំផុត អាចប្រឆាំងបាក់តេរី, សម្លាប់វីរុស, បង្កើនសមត្ថភាពអង្គបដិបក្ខ និងមានឥទ្ធិពលបញ្ចុះទម្ងន់, ជំនួយរំលាយអាហារនិងរំដោះជាតិពុលថ្លើម។ ក្រូចឆ្មារមានផ្ទុកសារជាតិមានប្រយោជន៍ជាច្រើន ដូចជាអាស៊ីតស៊ីទ្រិក, កាល់ស្យូម, ម៉ាញ៉េស្យូម, វីតាមីន C …។
ប្រសិទ្ធភាពដ៏ច្រើនអនេករបស់ផ្លែក្រូចឆ្មារដែលអាចអ្នកពុំទាន់ដឹង មានដូចខាងក្រោមនេះ :
ព្យាបាលមុនៈ
អាស៊ីតក្រូចឆ្មារមានឥទ្ធិពលព្យាបាលមុន៖ វីតាមីន C ក្នុងពពួកផ្លែឈើអម្បូរក្រូចធ្វើឱ្យស្បែកមាំមួន ទន្ទឹមនោះប៉ូតាស្យូមមានលទ្ធភាពកម្ទេចបាក់តេរីបង្កមុនមួយចំនួន ព្រមជាមួយការផឹកទឹកក្រូចឆ្មារនៅរាល់ពេលព្រឹក។ អ្នកក៏អាចធ្វើតាមប៉ុន្មានវិធីខាងក្រោមនេះ :
-យកម្រាមដៃ ឬសំឡីជ្រលក់ទឹកក្រូចឆ្មារបន្តក់ទៅលើកន្លែងមុនទុកមួយយប់។ ព្រឹកឡើងលាងសម្អាតជាមួយទឹក។ ដំបូងអ្នកនឹងមានអារម្មណ៍ផ្សាបន្តិច ប៉ុន្តែមួយសន្ទុះក្រោយនឹងបាត់ទៅវិញ។
-លាយទឹកក្រូចឆ្មារជាមួយទឹកផ្កាកុលាប ឬទឹកឃ្មុំ តាមអត្រា១/១។ លាបល្បាយខាងលើត្រង់កន្លែងកើតមុន ទុកតិចបំផុតកន្លះម៉ោង បន្ទាប់មកលាងសម្អាតជាមួយទឹក។ មួយថ្ងៃគួរអនុវត្តន៍ពីរដង ល្អបំផុតនៅពេលព្រឹកនិងពេលយប់។
ជួយបន្ថយកង្វល់
ក្លិនក្រូចឆ្មារជួយសម្រួលអារម្មណ៍, បន្ថយនឿយហត់, ព្រិលភ្នែក, វិលមុខ តានតឹង។ អាស្រ័យហេតុនោះ អ្នកអាចប្រើប្រេងក្រូចឆ្មារក្នុងការិយាល័យដើម្បីបង្កើនប្រសិទ្ធភាពធ្វើការ។ ប្រសិនមានអារម្មណ៍តានតឹង ចូរបន្តក់ប្រេង ក្រូចឆ្មារប៉ុន្មានតំណក់ទៅលើកន្សែងដើម្បីហិត។
បង្ការកម្តៅមាត់
លក្ខណៈប្រឆាំងបាក់តេរី និងសម្លាប់វីរុសរបស់ក្រូចឆ្មារ អាចជំរុញដំណើរការសះស្បែកពេលមាត់ត្រូវរលាកដំបៅ។ ចូរលាយក្រូចឆ្មារជាមួយទឹកឧណ្ហៗមួយកែវប្រើសម្រាប់ខ្ពុរមាត់មួយថ្ងៃបីដង ។
បញ្ចុះកម្តៅ
លាយក្រូចឆ្មារមួយផ្លែនៅក្នុងកែវទឹកក្តៅជាមួយទឹកឃ្មុំ ពីរម៉ោងផឹកមួយកែវរហូតដល់អាការៈជំងឺធូរ។
គ្រុនផ្តាសាយធ្វើឱ្យអ្នកអស់កម្លាំង
ទឹកក្រូចឆ្មារ ពុំព្រឹមតែផ្គត់ផ្គង់វីតាមីន C ឱ្យពពួកកោសិកាប្រឆាំងបាក់តេរីប៉ុណ្ណោះទេ តែនៅអាចកម្ទេចវីរុសក្នុងស្រទាប់ជាតិរំអិលនៅច្រមុះនិងបំពង់ក។
ដើម្បីបន្ថយឈឺបំពង់ក ចូរលាយក្រូចឆ្មារមួយផ្លែ អំបិលមួយស្លាបព្រាកាហ្វេទៅក្នុងទឹកក្តៅឧណ្ហៗ (250 ml) ប្រើដើម្បីខ្ពុរមាត់មួយថ្ងៃបីដង ដោយម្តងមួយនាទី ។
ធ្វើឱ្យទន់ស្នាមក្រិន
បំពោកក្រូចឆ្មារមួយយប់ ជាវិធីដ៏អស្ចារ្យមួយដើម្បីជួយបំបាត់ស្នាមក្រិន។ ចូរកាត់ក្រូចឆ្មារមួយចំណិតកម្រាស់ប្រមាណ៥ មិល្លីម៉ែត្របិទលើកន្លែងក្រិន។ យកប្រេងចម្រាញ់ក្រូចឆ្មារបន្តក់ទៅលើកន្លែងក្រិន ក៏អាចធ្វើឱ្យទន់ស្បែក។ ចូរប្រយ័ត្នប្រយែង គឺប្រើប្រេងក្រូចឆ្មារតែនៅត្រង់កន្លែងត្រូវក្រិន ព្រោះឥទ្ធិពលរបស់វាខ្លាំងក្លាគួរសម មិនសមស្របជាមួយស្បែកធម្មតា ។
ជួយស្តារកម្លាំងឡើងវិញ
អ្នកដើរផ្លូវឆ្ងាយ អ្នកចូលចិត្តធ្វើដំណើរទេសចរជុំវិញពិភពលោក ឬអ្នកផ្សងគ្រោះថ្នាក់ ទឹកក្រូចឆ្មារជាកាដូដ៏វិសេសអស្ចារ្យមួយ ។ ពេលមានអារម្មណ៍អស់កម្លាំង គេអាចដោតទុយោបឺតទៅក្នុងក្បាលក្រូចឆ្មារ និងបឺតទឹកផ្ទាល់-វិធីមួយមានប្រសិទ្ធភាពលឿនអាចនាំមកនូវអារម្មណ៍ស្រឡះស្រឡំ។
ធុំក្លិនមាត់
ក្រោយពេលទទួលទានគ្រឿងទេសខ្លាំងមួយចំនួន ផឹកស្រា ជក់បារី ឬដោយសារក្រពេញទឹកមាត់ខ្សោយ ដង្ហើមរបស់អ្នកនឹងមានក្លិនពិបាកទ្រាំ។ ដើម្បីឱ្យដង្ហើមក្រអូបឡើងវិញ ចូរខ្ពុរមាត់ប៉ុន្មានដងក្នុងមួយថ្ងៃជាមួយទឹកក្រូចឆ្មារស្រស់ លាយទឹកក្តៅឧណ្ហៗ ក៏អាចបន្ថយក្លិនអាហារ។
ប្រឆាំងសត្វល្អិតខាំ
ប្រសិនទ្រនិចសត្វស្ថិតនៅក្នុងស្បែក ត្រូវដកចេញឱ្យអស់ រួចម៉ាស្សាកន្លែងត្រូវទិចជាមួយប្រេងក្រូចឆ្មារ ១-២តំណក់ លាយជាមួយទឹកឃ្មុំមួយស្លាបព្រាកាហ្វេ ។
ដើម្បីបណ្តេញសត្វល្អិត លាយប្រេងក្រូចឆ្មារ២០តំណក់ជាមួយទឹកមួយកែវ (250 ml) និងបាញ់ទៅក្នុងបរិយាកាស គឺធ្វើឱ្យមានក្លិនល្អផង និងអាចបណ្តេញសត្វល្អិតមិនឱ្យចូលមកជិតផង។
អាចសម្រាលការឈឺចាប់
ថ្វីត្បិតមានរសជូរ ប៉ូតាស្យូមនៅក្នុងផ្លែក្រូចឆ្មារ មានប្រយោជន៍ខ្លាំងណាស់សម្រាប់សរីរាង្គ វាត្រូវបានប្រើដូចជាឱសថមួយសម្រួលអាស៊ីតសល់ មូលហេតុបង្ករលាកសន្លាក់។ ផឹកទឹកមួយកែវលាយក្រូចឆ្មារមួយផ្លែ បីដងក្នុងមួយថ្ងៃ ប្រសិនឈឺខ្លាំងពេក។
ជួយការពារក្រពះ
ផឹកទឹកក្រូចឆ្មារស្រស់មួយកែវលាយជាមួយទឹកក្តៅឧណ្ហៗក្រោយរាល់ពេលបាយ។ អាស៊ីតក្រូចឆ្មារនឹងរំញោចក្រពះ បញ្ចេញអាស៊ីតរំលាយអាហារ និងជួយរំញោចចលនារបស់សាច់ដុំក្រពះ៕
0 មតិ:
Post a Comment