កំណើនសេដ្ឋកិច្ចនៅក្នុងឆ្នាំ២០១២នេះ ត្រូវបានធនាគារអភិវឌ្ឍន៍អាស៊ី (ADB) នៅកម្ពុជា បានអះអាងថា អត្រាកំណើនសេដ្ឋកិច្ចគឺមានការថយចុះពីឆ្នាំមុន ដោយសារវិស័យនាំចេញស្នូលរបស់កម្ពុជា គឺសំលៀកបំពាក់នឹងរងផលប៉ះពាល់វិបត្តិសេដ្ឋកិច្ចនៅអឺរ៉ុប។
របាយការណ៍របស់ធនាគារអភិវឌ្ឍន៍អាស៊ីប្រចាំ២០១២ បានផ្សព្វផ្សាយថា ការព្យាករកំណើនសេដ្ឋកិច្ចក្នុងឆ្នាំ២០១២នេះ គឺមានកំណើនប្រមាណ ៦.៥% មានការថយចុះបន្តិចបើធៀបក្នុងឆ្នាំ២០១១ ដែលក្នុងនោះក៏បានបញ្ជាក់អំពីកំណើនលើវិស័យសំខាន់របស់ប្រទេស កម្ពុជា ដូចជាកំណើននៃការនាំចេញសំលៀកបំពាក់ ស្បែកជើង កសិកម្ម ទេសចរណ៍ជាដើម។
យោងតាមសេចក្ដីប្រកាសរបស់ធនាគារអភិវឌ្ឍន៍អាស៊ី នៅថ្ងៃទី១១ មេសា ២០១២ បានឲ្យដឹងថា ការព្យាករផ្អែកលើការសន្មតថា សេដ្ឋកិច្ចរបស់សហភាពអឺរ៉ុប និងសហរដ្ឋអាមេរិក ដែលជាទីផ្សារសំខាន់របស់ប្រទេសកម្ពុជា នឹងបន្តរើបឡើងវិញបន្តម្ដងបន្តិចៗ ទន្ទឹមនឹងរដ្ឋាភិបាលកម្ពុជា នឹងបន្តអនុវត្តគោលនយោបាយដែលគាំទ្រដល់កំណើន។
សេដ្ឋវិទូជាន់ខ្ពស់ប្រចាំធនាគារអភិវឌ្ឍន៍អាស៊ីនៅប្រទេសកម្ពុជា លោក ភីធើ ប្រ៊ីមប័ល (Peter Brimble) មានប្រសាសន៍ថា ទោះបីជាមានគ្រោះទឹកជំនន់ដែលកើតមានកន្លងមកក្តី ក៏កម្ពុជាត្រូវបានគេរំពឹងទុកថា នឹងបង្ហាញថា នឹងមានកំណើនសេដ្ឋកិច្ចដ៏រឹងមាំនៅក្នុងរយៈពេលពីឆ្នាំខាងមុខ នេះ។ ប៉ុន្តែលោក ប្រ៊ីមប័ល បានបង្ហាញអំពីភាពមិនសមាមាត្រគ្នានៃធនធានមនុស្ស និងទីផ្សារជំនាញ ដែលកាន់តែរីកធំនៅក្នុងរយៈពេលប៉ុន្មានឆ្នាំចុងក្រោយនេះ ដោយលោកបានបញ្ជាក់ឲ្យឃើញពីភាពចាំបាច់ ដើម្បីធ្វើសាលារៀន និងស្ថាប័នបណ្ដុះបណ្ដាលវិជ្ជាជីវៈឲ្យមកនូវកៀកសហគមន៍ធុរកិច្ច សំដៅបង្កើនគុណភាព និងភាពពាក់ព័ន្ធទៅនឹងតម្រូវការទីផ្សារ។
លោក ប្រ៊ីមប័ល មានប្រសាសន៍បន្តទៀតថា បើទោះជាមានវិបត្តិសេដ្ឋកិច្ចនៅបណ្ដាប្រទេសនៅសហគមន៍អឺរ៉ុប ក៏កម្ពុជានៅតែមានលទ្ធភាពនាំចេញដើម្បីទទួលបានកំណើនសេដ្ឋកិច្ច មួយរឹងមាំបាន៖ «ខ្ងុំគិតថា អ្វីដែលកើតឡើងនៅអឺរ៉ុបនាពេលបច្ចុប្បន្ននេះ វាជាក្តីបារម្ភសម្រាប់កម្ពុជា ប៉ុន្តែក្ដីបារម្ភនេះគឺអាចគ្រប់គ្រងបាន បើទោះជាវិបត្តិនៅអឺរ៉ុបនៅតែបន្តកើតមាន ដោយសារតែពាណិជ្ជកម្មរវាងតំបន់នៅក្នុងអាស៊ីមានការកើនឡើងដែល អាចជំនួសនៅការនាំចេញទៅសហគមន៍អឺរ៉ុបដែលកំពុងមានវិបត្តិ»។
របាយការណ៍របស់ធនាគារអភិវឌ្ឍន៍អាស៊ី ឆ្នាំ២០១២ បានបង្ហាញថា ការនាំចេញសំលៀកបំពាក់ និងស្បែកជើងទៅសហរដ្ឋអាមេរិក និងសហភាពអឺរ៉ុប នឹងថយចុះពី ១៣.៩% កាលពីឆ្នាំ២០១១ មកនៅត្រឹម ១១.៤% នៅឆ្នាំ២០១២។ ដោយឡែកកំណើននៃវិស័យសេវាកម្ម ត្រូវបានគេរំពឹងថា នឹងកើនឡើងដល់ ៥.៣% ពីមុនមានចំនួនតែពី ៥% និងវិស័យកសិកម្មដែលរងគ្រោះដោយសារទឹកជំនន់នៅចុងឆ្នាំ២០១១ ត្រូវបានព្យាករថា នឹងមានការកើនឡើង ៣.៨% ពី ៣.៣% ជាមួយនឹងការសន្មតថា អាកាសធាតុនឹងមានលក្ខណៈអំណោយផល។ ប៉ុន្តែនៅក្នុងរបាយការដដែលបានបង្ហាញថា ស្ថានភាពនឹងមានភាពប្រសើរជាងសម្រាប់ឆ្នាំ២០១៣ នៅពេលដែលប្រទេសកម្ពុជា ដើរស្របតាមគន្លងនៃការរើបឡើងវិញនៃទស្សនវិស័យសេដ្ឋកិច្ចសកល។
បើទោះជាធនាគារអភិវឌ្ឍន៍អាស៊ី ប៉ាន់ស្មានកំណើននៅឆ្នាំ២០១២នេះ មានកំណើន ៦.៥% ក៏មានស្ថាប័ននានាបានព្យាករសេដ្ឋកិច្ចដូចគ្នានេះដែរ គឺធនាគារពិភពលោក មូនិធិរូបិយវត្ថុអន្តរជាតិ រដ្ឋាភិបាលកម្ពុជា ប៉ុន្តែវិទ្យាស្ថានសេដ្ឋកិច្ចកម្ពុជា ប៉ាន់ស្មានកំណើនសេដ្ឋកិច្ចកម្ពុជា មានតែ ៦.២% ប៉ុណ្ណោះ៕ RFA
0 មតិ:
Post a Comment