ផែកាណូតទេសចរណ៍ ដែលមានទីតាំងស្ថិតនៅ ច្រាំងទន្លេសាប ក្បែរសួនច្បារ CDC ក្នុងសង្កាត់វត្តភ្នំពេញ ខណ្ឌដូនពេញ ចន្លោះស្ថានីយ៍បូមទឹក របស់រដ្ឋាករទឹកស្វយ័តក្រុងភ្នំពេញ និងភោជនីយដ្ឋានទន្លេសាប ប្រហែល២៣០ម៉ែត្រ ត្រូវបានសម្ពោធឱ្យដំណើរការប្រើប្រាស់ព្រឹកថ្ងៃទី១៨ ខែមេសា ឆ្នាំ២០១២ ក្រោមអធិបតីភាព លោក នួន សុមេធ អភិបាលរងរាជធានីភ្នំពេញ។
លោកស្រី គឹម សុវណ្ណា ប្រធានស្តីទីមន្ទីរទេចរណ៍ រាជធានីភ្នំពេញ បានលើកឡើងថា ផែចំណតកាណូតទេចរណ៍ថ្មី នេះធ្វើពីទូកបណ្តែកទឹកអាចចល័តបាន មានបណ្តោយ ២៦ម៉ែត្រ ទទឹង ៥ម៉ែត្រ មានពីរជាន់ ប្រក់ដំបូលជាន់ ក្រោមជាលំហរួម និងមានបន្ទប់ទឹក ជាន់លើ មានលំហររួម ជាមួយកន្លែងរង់ចាំ បន្ទប់ផ្តល់ព័ត៌មាន និងកន្លែងលក់សំបុត្រ។ ពីច្រាំងទៅផែចំណតកាណូត ភ្ជាប់ដោយស្ពានឆ្លងប្រវែង ៤៥ម៉ែត្រ ទទឹង ១,៥០ម៉ែត្រ ដែលស្ពាននេះអាចតំឡើង និងបន្ទាបបានទៅតាមស្ថានភាព នៃកម្ពស់ទឹកទន្លេឡើង ឬស្រក។ នៅចំពោះមុខនេះផែអាចទទួលការណូតចូលទទួលភ្ញៀវបានចំនួន៦៤គ្រឿង។ ផែកាណូតនេះគ្រប់គ្រងដោយសមាគមកាណូតទេសចរណ៍ផ្លូវទឹកភ្នំពេញ មានបុគ្គលិកចំនួន ១០នាក់ សម្រាប់រៀបចំ សណ្តាប់ធ្នាប់ អនាម័យ និងផ្តល់សេវាកម្មជូនភ្ញៀវទេចរណ៍ ព្រមទាំងមានឯកសណ្ឋានបម្រើសមរម្យ ជាលក្ខណៈបុរាណ សមស្របនឹងទីតាំង។ ទន្ទឹមនឹងនេះសមាគមត្រៀមរៀបចំកាណូតសម្រាប់ជួយសង្គ្រោះផង ដែរប្រសិនក្នុងករណី កាណូតមានបញ្ហាពេលដឹកភ្ញៀវ។
ក្នុងឱកាសនោះ លោក នួន សុមេធ អភិបាលរងរាជធានីភ្នំពេញ បានកោតសសើរ និងសម្តែងនូវក្តីសោមនស្សរីករាយ ពិធីដាក់ឱ្យប្រើប្រាស់ផែកាណូតទេសចរណ៍ផ្លូវទឹក ដែលបានរៀបចំឡើងដោយមន្ទីរទេសចរណ៍រាជធានី សហការជាមួយសមាគមដឹកជញ្ជូនទេសចរណ៍ផ្លូវទឹករាជធានីភ្នំពេញ នាពេលនេះ។ លោកលើកឡើងថាការរៀបចំឱ្យមានផែកាណូតទេសចរណ៍នៅទីនេះ គឺមានលក្ខណៈល្អប្រសើរទាំងលក្ខណៈភូមិសាស្ត្រ និងប្រវត្តិសាស្ត្រ ចំពោះ លក្ខណៈភូមិសាស្ត្រគឺស្របទៅតាមការអភិវឌ្ឍន៍ប្លង់គោលរាជធានីភ្នំពេញ ដែលជាចម្បងត្រូវពង្រឹងការពារបរិស្ថាន និង អភិវឌ្ឍន៍តំបន់ទេសចរណ៍តាមដងទន្លេ។ លោកបានបន្តថា កាលពីអតីតកាលកន្លែងនេះជាកំពង់ផែ ដែល ដូនពេញ ធ្វើ ដំណើរចុះងួតទឹកជារៀងរាល់ថ្ងៃ និងជាកន្លែងដោះដូរពាណិជ្ជកម្មនាសម័យនោះដែរ។ ជាចុងក្រោយលោកបាន លើកឡើងនូវសំណូមពរ និងផ្តល់អនុសាសន៍សំខាន់ៗមួយចំនួនដើម្បីដំណើរការផែឱ្យលូន ក្នុងនោះដោយសង្កត់ធ្ងន់ថា ទន្ទឹមនឹងការយកចិត្តទុកដាក់លើការការពារសន្តិសុខ សុវត្ថិភាពដល់អ្នកទេសចរណ៍ គឺត្រូវកំណត់តំលៃសេវាកម្ម ឱ្យបានច្បាស់លាស់ត្រឹមត្រូវកុំមានការប្រែប្រួល ជាពិសេសត្រូវមានវេនពេលវេលា សំរាប់កាណូតទេសចរណ៍ ចៀសវាងការជជែក និងប្រទាញដណ្តើមភ្ញៀវគ្នា ដែលជាកត្តាអាក្រក់ប៉ះពាល់ដល់តម្លៃសីលធម៌ និង
កិត្តិយស សង្គម៕
ប្រភព
0 មតិ:
Post a Comment