Google Earth ជាកម្មវិធីមួយដែលមានប្រយោជន៍បំផុតសម្រាប់អ្នកចង់ស្វែងរកផ្លូវ ឬតំបន់ណាមួយ ហើយវាត្រូវបានគេប្រើប្រាស់យ៉ាងទូលំទូលាយ។ នៅពេលនេះគេបានរាយការណ៍ថាមានបុរសជនជាតិឥណ្ឌាម្នាក់ ដែលបានវង្វេងផ្លូវតាំងតែពី ២៥ឆ្នាំមុន អាចរកឃើញផ្ទះកំណើតរបស់ខ្លួនវិញ ដោយស្ថិតក្រោមជំនួយនៃ Google Earth ហើយគាត់ជួបជុំម្ដាយរបស់គាត់វិញហើយ។ លោក Saroo Brierly បាននឹងកំពុងតែធ្វើដំណើរតាមរថភ្លើងជាមួយបងប្រុសរបស់គាត់កាល ពីឆ្នាំ ១៩៨៦។ ក្នុងកំឡុងពេលធ្វើដំណើរនោះ គាត់បានគេងលក់ ហើយបន្ទាប់ពី ១៤ម៉ោងរួចមកគាត់បានភ្ញាក់ឡើងវិញ តែបញ្ហាគឺគាត់កំពុងតែស្ថិតនៅក្នុងក្រុង Calcutta នៃប្រទេសឥណ្ឌា។ គាត់ក៏បានវង្វេងពីបងប្រុសរបស់គាត់ ហើយគាត់មិនដឹងថាត្រូវត្រឡប់ទៅផ្ទះវិញដោយរបៀបណានោះទេ។ គាត់បានស្នាក់នៅក្នុងទ្វារទំនប់ទឹកមួយនៅទីនោះ ហើយគាត់ក៏បានក្លាយជាអ្នកសុំទានតាមចិញ្ចើមផ្លូវដើម្បីចិញ្ចឹម ក្រពះដែលកំពុងតែស្រែកឃ្លាន។
ជាភព្វសំណាងលោក Brierly ត្រូវបានគេទទួលឱ្យស្នាក់នៅក្នុងមន្ទីរជួយសង្គ្រោះកុមារកំព្រា ហើយក្រោយមកក៏មានប្ដីប្រពន្ធជនជាតិអូស្ត្រាលីមួយគូ ទទួលគាត់ធ្វើជាកូនធម៌ទៀត។ គាត់បាននិយាយទាំងត្រេកអរថា ខ្ញុំពិតជាវង្វេងផ្លូវ និងមិនអាចរកផ្លូវត្រឡប់ទៅផ្ទះបានទេ ដូច្នេះវាពិតជាល្អណាស់ដែលខ្ញុំបានទៅប្រទេសអូស្ត្រាលី។
ជាច្រើនឆ្នាំកន្លងផុតទៅគាត់ក៏ធំដឹងក្ដី ហើយគាត់ចង់ស្វែងរកទីកន្លែងកំណើតរបស់ខ្លួនឱ្យឃើញ។ គាត់នៅចងចាំពេលដែលគាត់វង្វេងនៅលើរថភ្លើង ហើយគាត់បានចាប់ផ្ដើមវាស់វែងពីចម្ងាយ រយៈពេល១៤ម៉ោង ដែលគាត់គេងលក់ ព្រមទាំងល្បឿនមធ្យមរបស់រថភ្លើង ដើម្បីប៉ាន់ស្មានមើលពីចំណុចដែលគាត់ចាកចេញ។ បន្ទាប់មកគាត់បានបើកមើលផែនទីនៅលើ Google Earth យ៉ាងលំអិត ហើយគាត់ប្រាកដក្នុងចិត្តថា ផ្ទះរបស់គាត់ប្រាកដជានៅ Khandwa។ ពេលដែលខ្ញុំបានរកឃើញ Khandwa ខ្ញុំបានពង្រីកមើលបន្តិចម្ដងៗ ហើយរកមើលគ្រប់ផ្លូវដែលនៅជុំវិញទឹកធ្លាក់ ដែលជាកន្លែងខ្ញុំធ្លាប់ទៅលេង។ គាត់ពិតជារីករាយជាខ្លាំងហើយក៏បានធ្វើដំណើរទៅផ្ទះកំណើតរបស់ ខ្លួន ហើយក៏ប្រទះឃើញផ្ទះដែលគាត់ធ្លាប់បានរស់នៅជាមួយគ្រួសាររបស់ គាត់។ ប៉ុន្តែគ្រួសាររបស់គាត់បានបានផ្លាស់ទីលំនៅចេញទៅបាត់ហើយ ហើយគាត់បានដើរសាកសួរអ្នកជិតខាងទាំងឡាយ។ ជាចុងក្រោយ លោក Brierly ក៏បានជួបនឹងម្ដាយតាមបំណងប្រាថ្នារបស់គាត់។
ម្ដាយរបស់លោក Brierly មានការពិបាកទទួលយកបន្តិច ដោយសារតែកូនប្រុសដែលបានបាត់ខ្លួន ២៥ឆ្នាំ កន្លងទៅហើយ បែរជាមកបង្ហាញខ្លួននៅចំពោះមុខគាត់ប្រៀបដូចជាខ្មោចបែបនេះ។ តែទោះជាយ៉ាងណាក៏ដោយ សម្រាប់គាត់គឺពិតជារឿងដែលមិនគួរឱ្យជឿទាល់តែសោះ ដោយសារតែ Google Earth បានជួយគាត់ឱ្យរកឃើញស្រុកកំណើត ដែលគាត់បានឃ្លាតឆ្ងាយជាយូរណាស់មកហើយ៕ CM
0 មតិ:
Post a Comment