ព្រំដែនកម្ពុជា-ថៃ: នៅព្រឹកថ្ងៃទី៩ ខែមករា ឆ្នាំ២០១២ ព្រះសង្ឃ និងក្រុមអាវលឿងថៃ បាននាំគ្នាយ៉ាងច្រើនដែលពួកគេទាំងនោះ មានគោលបំណងចូលមកដុតធូប នៅភ្នំទ្រព្យ តំបន់ប្រាសាទព្រះវិហារ។ ការឈរជួបជុំរបស់ជនជាតិថៃទាំងនោះ ក្រោយពីខាងភាគីថៃលោកឧត្តមសេនីយ៍ទោ មេបញ្ជាការកងទ័ពថៃភូមិភាគ២ បានចូលមកសុំកម្ពុជា កាលពីថ្ងៃទី៨ ខែមករា ឆ្នាំ២០១២ ដើម្បីឲ្យព្រះសង្ឃ និងប្រជាជនថៃ ប្រហែល ៥០០ នាក់ ចូលមកដុតធូប នៅភ្នំទ្រព្យ តំបន់ប្រាសាទព្រះវិហារ ក៏ប៉ុន្តែត្រូវបានភាគីកម្ពុជា បានធ្វើការបដិសេធ។
លោកឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ ប្រចាំទិសប្រាសាទព្រះវិហារ បានឲ្យដឹងថា ក្រុមពួកអាវលឿង និងព្រះសង្ឃថៃ បានសុំកម្ពុជា ចូលមកដុតធូប នៅកន្លែងពួកគេ បានយកព្រះ មកដាក់កន្លងមក នៅចំណុចឈមនឹងភ្នំទ្រព្យ។ តែយើងមិនបានអនុញ្ញាតិឲ្យទេ។ មកដល់ព្រឹកម៉ោងជាង ៩ នេះ ថៃកំពុងតែស្ថិតនៅក្នុងទឹកដីរបស់គេទេ ។
លោកឧត្តមសេនីយ៍ បន្តថា រហូតមកដល់ពេលនេះ ស្ថានភាពហាក់បីដូចជារស៊ើបបន្តិច ព្រោះតែលោកសង្ឃ និងក្រុមអាវលឿងថៃទាំងនោះ ចង់ចូលមកកាន់ចំណុចភ្នំទ្រព្យ។ តែទោះបីជាយ៉ាងណាក៏ដោយ កម្ពុជាមិនអនុញ្ញាតិឲ្យថៃចូលជាដាច់ខាត ហើយខាងសមត្ថកិច្ចនៅព្រំដែន កំពុងធ្វើការការពារបូរណភាពទឹកដី ៕
0 មតិ:
Post a Comment