ភ្នំពេញ ៖ អនុវត្តន៍តាមស.ជ.ណ របស់រាជរដ្ឋាភិបាលលេខ១៥ចេញថ្ងៃទី១០ ខែ មករា ឆ្នាំ២០១២ លោក កែប ជុតិមាបានធ្វើការណែនាំឲ្យមន្ត្រីពាក់ព័ន្ធក្រោមឱវាទទាំងអស់ត្រូវ គោរពតាមឲ្យបានម៉ត់ចត់។ក្នុងស.ជ.ណ នោះ លោក កែប ជុតិមា អភិបាលរាជធានីភ្នំពេញ បានមានប្រសាសន៍ថា មានពីរចំណុច ដែលមន្ត្រីពាក់ព័ន្ធត្រូវយកទៅអនុវត្តន៍ឲ្យមានប្រសិទ្ធភាពខ្ពស់។
ក្នុងនោះបញ្ហាទី១ ទប់ស្កាត់នូវរូបភាពអាជីវកម្មគោដុត នៅទីចំហសាធារណៈ ដូចជាមុខហាងជាដើម ដែលបង្ហាញពីរូបភាពហិង្សាឃោរឃៅ ផ្ទុយពីគោលការអហិង្សាធម៌របស់ព្រះពុទ្ធសាសនា។ បញ្ហាទី២ គឺ ការប្រកាសដាក់ទន្លេនៅមុខព្រះបរមរាជវាំងជាដែនដីអភ័យភូមិ ហាមឃាត់ ការនេសាទ ត្រី ឬ ប្រមាញ់សត្វគ្រប់ប្រភេទ។ ចំពោះមូលដ្ឋានដែលពាក់ព័ន្ធបញ្ហាទី២នេះគឺមានអាជ្ញាធរខណ្ឌដូនពេញ និង ខណ្ឌឫស្សីកែវ ហើយសមត្ថកិច្ចរបស់យើងហាមរដ្ឋបាលជលផល រដ្ឋបាលព្រៃឈើ ហើយនិងនគរបាលជើងទឹក ដែលអាជ្ញាធរពាក់ព័ន្ធទាំងនោះ ត្រូវតែយកទៅណែនាំ ប្រាប់ប្រជាពលរដ្ឋអំពី ស.ជ.ណ នេះ ឲ្យពួកគាត់បានយល់។ លោក កែប ជុតិមា ក៏បានបញ្ជាក់ដែរថា ស.ជ.ណ នេះសូម្បីតែស្ទូចត្រីនៅមុខវាំង ក៏មិនអនុញ្ញាតឲ្យដែរ។ បើស្ទូចត្រីកំសាន្តលេងទៅស្ទូចឲ្យឆ្ងាយពីមុខវាំង អាចទៅស្ទូចនៅអរិយក្សត្រ ។
លោក កែប ជុតិមា បានធ្វើការណែនាំដល់នាយករដ្ឋបាលរបស់សាលារាជធានីភ្នំពេញធ្វើលិខិត មួយឲ្យបាលល្អលំអិតជុំវិញ ស.ជ.ណនេះ។ ក៏គេមិនមែនហាមមិនឲ្យដុតគោទាំងមូលទេ តែត្រូវដុតនៅកន្លែងបិទបាំងណាមួយឲ្យបានឆ្អិន ហើយកាប់ជាកង់ៗ មកដាក់លក់មុខហាងមក។ លោក កែប ជុតិមា ក៏បានបញ្ជាក់ផងដែរថា មានសមត្ថកិច្ចមួយចំនួនបានប្រាប់គេថា ដុតគោទាំងមូលក៏មិនឲ្យដុតដែរ។ តែធាតុពិតមិនមែនដូច្នេះនោះទេ គឺ អនុញ្ញាតឲ្យមានការដុតទាំងមូល បានគ្រាន់តែមិនអនុញ្ញាតឲ្យដុតនៅទីកន្លែងចំហ នៅទីសាធារណៈប៉ុណ្ណោះ។
លោក កែប ជុតិមា បានលើកឡើងនូវការណែនាំដល់មន្ត្រីពាក់ព័ន្ធអំពី ស.ជ.ណ ខាងលើនេះ កាលពីព្រឹកថ្ងៃទី ១៣ ខែ កុម្ភៈ ឆ្នាំ២០១២ នៅសាលារាជធានីភ្នំពេញ ក្នុងសន្និបាតបូកសរុបលទ្ធផលអនុវត្តន៍ការងារឆ្នាំ ២០១១ និងទិសដៅបន្តឆ្នាំ២០១២។ ក្នុងអង្គសន្និបាតនោះក៏បានលើកឡើងនូវសមិទ្ធផលនានាបានអនុវត្តន៍ ជោគជ័យក្នុងឆ្នាំ ២០១១កន្លងមកហើយក៏បានលើកឡើងពីចំណុចខ្លាំងនិងចំណុចខ្សោយដែលត្រូវ បំពេញបន្ថែមនៅក្នុងឆ្នាំ២០១២នេះផងដែរ។
ចំណែកបញ្ហាសន្តិសុខសុវត្ថិភាពវិញក្នុងឆ្នាំ ២០១១កន្លងមកនេះបានកើតមានឡើងនូវបទល្មើសព្រហ្មទណ្ឌចំនួន៥៦០លើក កើន៧៦ភាគរយ រួមមានបទល្មើស ឧក្រិដ្ឋ ១៤១លើក កើន១១ភាគរយក្នុងនោះប្លន់ប្រដាប់អាវុធ៣១លើក ថយចុះ២៤ភាគរយ ប្លន់ប្រើប្រាស់មធ្យោបាយផ្សេង៣១ករណី កើន២៩ភាគរយ ឃាតកម្ម ៤០ករណីកើន២១ភាគរយ ជំរិតទារប្រាក់២លើក រំលោភសេពសន្ធវៈ៣៦លើក កើន២៤ភាគរយ និង បទមជ្ឈិម ៤១៩លើក កើន១១៩ភាគរយ៕
0 មតិ:
Post a Comment