ភ្នំពេញ: ប្រធានធនាគារពិភពលោកប្រចាំកម្ពុជា បានកោតសរសើរចំពោះភាពរីកចំរើនផ្នែកសេដ្ឋកិច្ច និងបរិយាកាសវិនិយោគនៅកម្ពុជា។ ប្រធានធនាគារពិភពលោក ក៏បានវាយតំលៃខ្ពស់ ចំពោះកំណើន និងការងើបឡើងវិញ នៃសេដ្ឋកិច្ចកម្ពុជា បន្ទាប់វិបត្តិសេដ្ឋកិច្ចសកល និងតួនាទីដ៏សំខាន់ នៃវិស័យពាណិជ្ជកម្ម សម្រាប់កាត់បន្ថយភាពក្រីក្ររបស់ប្រជាជន។
ការថ្លែងបែបនេះរបស់ប្រធានធនាគារពិភពលោកលោក Qimiao Fan បានធ្វើឡើងនៅក្នុងជំនួបជាមួយរដ្ឋមន្ត្រីក្រសួងពាណិជ្ជកម្មលោក ចម ប្រសិទ្ធ ដើម្បីជម្រាបលា បន្ទាប់ពីលោកបានបញ្ចប់អាណត្តិការងាររយៈពេល ៣ ឆ្នាំ នៅក្នុងប្រទេសកម្ពុជា។
នៅក្នុងជំនួប លោក Qimiao Fan បានលើកឡើងពីទំនាក់ទំនង និងការដកស្រង់នូវបទពិសោធន៍នានា ចំពោះការបំពេញបេសកកម្មរបស់លោកនៅកម្ពុជា។ លោកក៏បានផ្តល់សារៈសំខាន់ទៅលើការធ្វើពិធីកម្មសេដ្ឋកិច្ច និងឧត្តមភាពប្រកួតប្រជែងនៃការនាំចេញរបស់កម្ពុជា ដោយហេតុថា កម្ពុជាជាប្រទេសអភិវឌ្ឍន៍តិចតួច ដែលទទួលបាននូវភាពអនុគ្រោះពាណិជ្ជកម្មពីប្រទេសអភិវឌ្ឍន៍ និងប្រទេសដៃគូជាច្រើន។
លោកបានបង្ហាញនូវជំនឿថា កម្ពុជានឹងមានសេដ្ឋកិច្ចរឹងមាំតទៅមុខទៀត។ ក្នុងនោះ ទោះបីលោកបានបញ្ចប់អាណត្តិការងារនៅកម្ពុជាហើយក្តី តែគម្រោងអភិវឌ្ឍន៍នានានៅតែបន្តនិរន្តរភាពឱ្យគ្រប់ជ្រុងជ្រោយ ហើយធនាគារពិភពលោកប្រចាំនៅកម្ពុជា ក៏នឹងពិនិត្យមើលចំពោះគម្រោងអភិវឌ្ឍន៍ថ្មីៗ របស់កម្ពុជាដើម្បីត្រៀមផ្តល់ការគាំទ្រ។
ចំណែកលោករដ្ឋមន្ត្រីក្រសួងពាណិជ្ជកម្ម ចម ប្រសិទ្ធ បានវាយតម្លៃខ្ពស់ចំពោះការបេសកកម្មការងាររបស់លោកប្រធាន ធនាគារពិភពលោកប្រចាំនៅកម្ពុជា និងបានថ្លែងអំណរគុណចំពោះសកម្មភាពចូលរួម និងការគាំទ្ររបស់ធនាគារពិភពលោកទៅលើគម្រោងអភិវឌ្ឍន៍នានារបស់ កម្ពុជា។
ជាក់ស្តែង កម្មវិធីគាំទ្រអភិវឌ្ឍន៍ពាណិជ្ជកម្ម (TDSP) ដែលគ្រប់គ្រងដោយធនាគារពិភពលោក ត្រូវបានលោកទេសរដ្ឋមន្ត្រី ចម ប្រសិទ្ធ ចាត់ទុកជាគម្រោងដ៏សំខាន់ ព្រោះវាបានបង្កើត ជាផ្នែកមួយ នៃអភិក្រមគ្របដណ្តប់ទូទាំងវិស័យពាណិជ្ជកម្ម (Trade SWAP) ដែលកម្ពុជាត្រូវអនុវត្តឱ្យបានជោគជ័យ សំរាប់ជាគំរូ ដល់ប្រទេសក្រីក្រដទៃទៀត៕
ប្រភព: camnews
0 មតិ:
Post a Comment