ភ្នំពេញ: លទ្ធផលនៃកិច្ចប្រជុំគណៈកម្មការចម្រុះខ័ណ្ឌសីមាព្រំដែនគោកកម្ពុជា-ថៃ JBC នៅថ្ងៃទី១ ត្រូវនឹងថ្ងៃទី១៣ ខែកុម្ភៈ ឆ្នាំ២០១២ ទទួលបានលទ្ធផលល្អ និងវិជ្ជមានច្រើន។ នេះបើតាមការបញ្ជាក់របស់លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី។
គណៈប្រតិភូកម្ពុជាប្រមាណ ២០ រូប ដឹកនាំដោយលោក វ៉ា គីមហុង ទេសរដ្ឋមន្ត្រី ទទួលបន្ទុកកិច្ចការព្រំដែន និងលោក ឡុង វីសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានអញ្ជើញទៅចូលរួមកិច្ចប្រជុំគណៈកម្មការចម្រុះខ័ណ្ឌសីមាព្រំដែនគោកកម្ពុជា-ថៃ JBC រយៈពេលពីរថ្ងៃ នៅថ្ងៃទី១៣ និងថ្ងៃទី១៤ ខែកុម្ភៈ ឆ្នាំ២០១២។ សមាសភាពគណៈកម្មការនោះ មានតាំងពីអភិបាលខេត្តជាប់ព្រំដែនថៃ មេបញ្ជាការយោធភូមិភាគជាប់ព្រំដែនថៃ ក្រសួងការបរទេស ក្រសួងមហាផ្ទៃ និងក្រសួងការពារជាតិ។
កិច្ចប្រជុំគណៈកម្មការចម្រុះខ័ណ្ឌសីមាព្រំដែនគោកកម្ពុជា-ថៃ JBC នៅថ្ងៃទី១៣ និងថ្ងៃទី១៤ ខែកុម្ភៈ ឆ្នាំ២០១២ នៅទីក្រុងបាងកក ប្រទេសថៃ ត្រូវបានក្រសួងការបរទេសកម្ពុជា ប្រកាសថា នឹងពិភាក្សាការងារវាស់វែងព្រំដែន និងរកបង្គោលព្រំដែន ដែលនៅសល់ នៅតំបន់ក្រៅពីតំបន់ប្រាសាទព្រះវិហារ ដោយសារតំបន់ប្រាសាទព្រះវិហារនេះ ទុកឲ្យតុលាការយុត្តិធម៌អន្តរជាតិ ICJ បកស្រាយសាលក្រមឆ្នាំ១៩៦២ សិន ដែលកម្ពុជាបានស្នើ។
លោក ផៃ ស៊ីផាន បានមានប្រសាសន៍ឲ្យដឹងនៅព្រលប់ ថ្ងៃទី១៣ ខែកុម្ភៈ ឆ្នាំ២០១២ថា លោកទេសរដ្ឋមន្ត្រី វ៉ា គីមហុង ប្រាប់លោកថា កិច្ចប្រជុំ JBC នៅថ្ងៃទី១នេះ ទទួលបានលទ្ធផលល្អ និងវិជ្ជមានច្រើន។ ប៉ុន្តែលទ្ធផលវិជ្ជមានប៉ុនណា គឺលោកទេសរដ្ឋមន្ត្រី វ៉ា គីមហុង នឹងផ្តល់កិច្ចសម្ភាសន៍ព័ត៌មាន នៅថ្ងៃស្អែក ( ថ្ងៃទី១៤កុម្ភៈ ឆ្នាំ២០១២ ) វេលាម៉ោង ៦ និង ៣០ នាទី នៅព្រលានយន្តហោះពោធិ៍ចិនតុង។
ក្នុងកិច្ចប្រជុំ JBC កាលពីឆ្នាំ២០១១ នៅបូកហ្គូ ប្រទេសឥណ្ឌូនេស៊ី នៅឆ្នាំ២០១១ កម្ពុជា-ថៃ បានលើកឡើងថា ក្នុងចំណោមបង្គោលព្រំដែនទាំង ៧៣ បង្គោល ដែលបោះដោយបារាំង បានរកឃើញ ៤៨ បង្គោល តែក្នុង ៤៨ បង្គោល មាន ៣៣ បង្គោល បានឯកភាពគ្នា។ ដូច្នេះភាគីទាំងពីរ នឹងបន្តស្វែងរកបង្គោលព្រំដែន ២៥ បង្គោលទៀត និងរៀបចំរបាយការណ៍ជាភាសាអង់គ្លេសមួយ សម្រាប់ចែកជូនរាជរដ្ឋាភិបាលរៀងៗខ្លួន ហើយអាចបន្តការងារនេះ៕
ប្រភព: camnews
0 មតិ:
Post a Comment