ភ្នំពេញ ៖ កាលពីព្រឹកថ្ងៃទី១៩ ខែកុម្ភៈ ឆ្នាំ២០១២នេះ អង្គភាពប្រឆាំងអំពើពុករលួយបានប្រកាសចាប់ខ្លួនបក្ខពួកអតីត ព្រះរាជអាជ្ញាខេត្តពោធិ៍សាត់ ឈ្មោះតុប ចាន់សិរីវុធ ម្នាក់ទៀតដែលពាក់ព័ន្ធនឹងអំពើពុករលួយ។
យោងតាមសេចក្ដីជូនដំណឹងរបស់អង្គភាពប្រឆាំងអំពើពុករលួយដែល កម្ពុជាថ្មីបានទទួលឲ្យដឹងថា ជនជាប់ចោទឈ្មោះពេជ្រ គង់យូ ភេទប្រុសអាយុ៤៣ឆ្នាំ ជាម្ចាស់ភោជនីយដ្ឋានរាត្រីរីករាយ ត្រូវបានប្រកាសចាប់ខ្លួន បន្ទាប់ពីសាលាដំបូងខេត្តពោធិ៍សាត់ចោទប្រកាន់ និងផ្តន្ទាទោសពីបទចាប់ជំរិត និងបង្ខាំងមនុស្សខុសច្បាប់។ ការប្រកាសចាប់ខ្លួនជនជាប់ចោទរូបនោះដោយសារតែតុលាការរកឃើញថា ឈ្មោះពេជ្រ គង់យូ បានឃុបឃិតប្រព្រឹត្តបទល្មើសជាមួយអតីតព្រះរាជអាជ្ញាខេត្តពោធិ៍ សាត់ឈ្មោះតុប ច័ន្ទសេរីវុធ កាលពីថ្ងៃទី២៤-២៥ ខែមិថុនា ឆ្នាំ២០១០ នៅភូមិតាកែវលើ ឃុំត្នោតជុំ ស្រុកក្រគរ ខេត្តពោធិ៍សាត់។
សេចក្ដីជូនដំណឹងក៏បានឲ្យដឹងទៀតថា ជនជាប់ចោទឈ្មោះពេជ្រ គង់យូ បានគេចខ្លួនពីសំណាញ់ច្បាប់រហូតមកដល់ថ្ងៃនេះ បន្ទាប់ពីអង្គភាពប្រឆាំងអំពើពុករលួយបានចាប់បញ្ជូនបក្ខពួករបស់ គេទៅតុលាការ។
អង្គភាពប្រឆាំងអំពើពុករលួយបានជូនដំណឹងដល់សាធារណៈជន ប្រសិនបើបានឃើញ ឬបានជួបប្រទះជនជាប់ចោទខាងលើនៅកន្លែងណាមួយ សូមរាយការណ៍ជូនមន្រ្តីនគរបាលជាតិ និងកងរាជអាវុធហត្ថ ដែលនៅជិតបំផុត ឬរាយការណ៍ទៅអង្គភាពប្រឆាំងអំពើពុករលួយតាមរយៈលេខទូរស័ព្ទ ០២៣ ២២៣ ៣១៤, ០១២ ៥៥១ ២១៣, ០១២ ៦៤៦ ៩៩៨៕
0 មតិ:
Post a Comment