ភ្នំពេញ: កាលពីរាត្រីថ្ងៃសៅរ៍ ទី១១ ខែកុម្ភៈ ឆ្នាំ២០១២កន្លងទៅនេះនៅក្នុងសាលប្រជុំនៃសាកលវិទ្យាល័យបញ្ញា
សាស្ដ្រ បុស្បា ប៉ាន់ បានចាប់ផ្ដើមបង្ហើរសំនៀងរបស់ខ្លួនចំនួនបីបទ ដែលបទទីមួយគឺ ជីវិតកូនស្រីអ្នកនេសាទ, បទនឹកឃើញទាំងអស់ និងបទ My Ship ដែលច្រៀងជាភាសាអង់គ្លេស និងប្រគំព្យាណូ ដោយឧត្ដមភរិយាលោក តឺរ៉ូ ជីនណៃ ( Teruo Jinnai ) អតីតប្រធានតំណាងអង្គការយូណេស្កូប្រចាំកម្ពុជា និងបច្ចុប្បន្នជាទីប្រឹក្សារាជរដ្ឋាភិបាលកម្ពុជា។
ចម្រៀងចំនួនបីបទរបស់នាង បុស្បាប៉ាន់ នារាត្រីនោះ មិនគ្រប់គ្រាន់ដើម្បីលើកទឹកចិត្ដឱ្យអ្នកស្ដាប់អស់ចិត្ដទ្បើយ ប៉ុន្ដែអ្វីដែលនាងច្រៀងមានគោលបំណងជាក់លាក់មួយ គឺការច្រៀងដើម្បីរៃអង្គាសប្រាក់ជួយកុមារក្រីក្រនៅទន្លេសាប និងដងទន្លេមេគង្គ មានឱកាសដើរទៅកាន់សាលារៀននឹងគេ។
មុនការចាប់ផ្ដើមកាប្រគំតន្ដ្រី ក្រុមការងារដែលដឹកនាំដោយលោក ប៉ាន់ ម៉េងហ៊ាង ជាឪពុករបស់នាង បុស្បា ប៉ាន់ និងលោកស្រីបណ្ឌិត លីលី ស៊ីសម្បត្ដិ អ្នកម្ដាយរបស់នាង បានចាក់បញ្ចាំងនូវខ្សែរឿង និយាយអំពីខនសឺតព្រះគុណគ្រូ ដែលបានធ្វើនៅប្រាសាទបាយ័ន កាលពីដើមឆ្នាំ២០១១ កន្លងមកនេះ ។
អ្នកអង្គម្ចាស់ស៊ីសុវត្ថិ ពង្សនារី មុនីពង្ស ដែលបានយាងទតខ្សែរឿងនៃ ខនសឺត ព្រះគុណគ្រូ នារាត្រីនោះផងដែរ បានមានបន្ទូលថា បុស្បា ប៉ាន់ ជាកុមារីមានទេពកោសល្យខ្ពស់ នាពេលខាងមុខ នាងនឹងមានអនាគតយ៉ាងត្រចះត្រចង់ ហើយជាមោទនភាពសម្រាប់ប្រទេសរបស់យើង ព្រោះពីដើមមក មិនដែលមានកុមារីមានទេពកោសល្យបែបនេះទ្បើយ។ អ្នកអង្គម្ចាស់បានមានបន្ទូលបន្ដថា តាមរយៈទេពកោសល្យ និងការខិតខំប្រឹងប្រែងរបស់នាង និងក្រុមគ្រួសារ នឹងធ្វើឱ្យនាងទទួលបាននូវជោគជ័យ។
រីឯលោក កុល ផេង ទេសរដ្ឋមន្ដ្រី និងជាស្ថាបនិកសាកលវិទ្យាល័យបញ្ញាសាស្ដ្រ បានមានប្រសាសន៍ថា ថ្ងៃនេះយើងប្រគំតន្ដ្រីប្រមូលប្រាក់ដើម្បីជួយកុមារក្រីក្រនៅទន្លេសាប និងតាមដងទន្លេមេគង្គបានទៅកាន់សាលារៀន គឺជាទានដ៏មានសារសំខាន់ ហើយនេះជាសិង្គហៈទាន ដ៏មានប្រយោជន៍ ជាទានជួយសង្គ្រោះដែលយើងអាចធ្វើនៅពេលណាក៏បាន ។
លោកបន្ដថា ជីវិតមនុស្សតែងតែជួបរឿងពីរក្នុងជីវិត គឺសេចក្ដីសុខ និងសេចក្ដីទុក្ខ ហើយបើយើងម្នាក់ៗចង់សុខ និងគិតថាជួយអ្នកកើតទុក្ខម្ដេចបាន គឺជួយបាន ព្រោះការជួយអ្នកមានទុក្ខ ធ្វើឱ្យយើងបានសុខ៕
0 មតិ:
Post a Comment