ភ្នំពេញ ៖ មន្រ្តីមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ជាភាសាអង់គ្លេសថា អង្គការស៊ីម៉ាក់ បានថ្លែងអោយដឹងថា ប្រទេសជប៉ុន នៅថ្ងៃព្រហស្បតិ៍ ទី១៦ ខែកុម្ភៈនេះ បានផ្តល់នូវសម្ភារៈបច្ចេកទេស និងគ្រឿងចក្រសម្រាប់បោសសម្អាតមីន ដែលមានតម្លៃជាង១៦លានដុល្លារអាមេរិកដល់ប្រទេសកម្ពុជា ដែលជំនួយនេះ គឺជាជំនួយដែលធំជាងគេបំផុត មិនធ្លាប់មានពីមុនមកសម្រាប់ការបោសសម្អាតគ្រាប់មីននៅក្នុង ប្រទេសកម្ពុជា។
លោក អ៊ុំ ភូមិរ៉ូ អគ្គនាយករងអង្គការស៊ីម៉ាក់ បានមានប្រសាសន៍ថា ពិធីប្រគល់ និងទទួលសម្ភារៈបច្ចេកទេស និងគ្រឿងចក្របោសសម្អាតមីន ដែលជាជំនួយរដ្ឋាភិបាលជប៉ុនផ្ដល់ជូនដល់រាជរដ្ឋាភិបាលកម្ពុជា បានប្រព្រឹត្ដទៅនៅក្នុងខេត្ដសៀមរាប ក្រោមអធិបតីភាពដ៏ខ្ពង់ខ្ពស់របស់លោកឧបនាយករដ្ឋមន្ដ្រី សុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីកម្ពុជា។
លោក អ៊ុំ ភូមិរ៉ូ បានបញ្ជាក់ថា ជំនួយនេះមានតម្លៃជាទឹកប្រាក់ជាង១៦ លានដុល្លារអាមេរិក មានជាសម្ភារៈបច្ចេកទេស និងគ្រឿងចក្រជាច្រើនប្រភេទ។ លោកបានមានប្រសាសន៍ថា នេះជាជំនួយសម្ភារៈបោសសម្អាតមីនរបស់ជប៉ុន លើកទី៦ហើយ ដែលផ្តល់មកអោយកម្ពុជា ហើយអះអាងថា លើកនេះជាជំនួយដ៏ធំជាងពេលមុនៗ។
គួររំលឹកថា សេចក្តីរាយការណ៍មួយធ្លាប់បានបង្ហាញអោយដឹងថា ការគាំទ្រផ្នែកហិរញ្ញវត្ថុពីដៃគូអភិវឌ្ឍន៍បានជួយដល់កម្ពុជា ក្នុងការបោសសម្អាត និងបំផ្លាញគ្រាប់មីនបង្កប់ក្នុងដីបានចំនួនជាង ៩ សែនគ្រាប់ ពីឆ្នាំ១៩៩២ ដល់ខែមករា ឆ្នាំ២០១១៕
0 មតិ:
Post a Comment