ខេត្តបាត់ដំបង ៖ សមត្ថកិច្ចស្រុកគាស់ក្រឡ បានឃាត់ខ្លួនយុវជន២នាក់ ក្នុងចំណោមបក្សពួក៤នាក់ ដែលត្រូវបានសង្ស័យថា មានជាប់ពាក់ព័ន្ធនឹងការប៉ុនប៉ងធ្វើមនុស្សឃាតមិនបានសម្រេចកាលពីយប់ថ្ងៃទី២៥ កុម្ភៈថ្មីៗនេះ ស្ថិតនៅភូមិព្រៃចក ឃុំព្រះផុស ស្រុកគាស់ក្រឡ ខេត្តបាត់ដំបង។
មន្រ្តីនគរបាលស្រុកគាស់ក្រឡបានឱ្យដឹងថា ជនសង្ស័យទាំង២នាក់នេះដែលបានឃាត់ខ្លួនទុកនោះម្នាក់ឈ្មោះហឿន រ៉ាត់ ហៅធី អាយុ២២ឆ្នាំ និងម្នាក់ទៀតឈ្មោះស្រង់ ចាន់រុង ហៅឡោក អាយុ២២ឆ្នាំដូចគ្នា រីឯបក្សពួក២នាក់ទៀតដែលបានរត់គេចខ្លួននោះ មានឈ្មោះឆាន់ ឆាយ ហៅអ៊ូក អាយុ២២ឆ្នាំ និងឈ្មោះហាយ ម៉េត ហៅម៉ុត អាយុ២២ឆ្នាំ។ ចំនែកជនរងគ្រោះវិញឈ្មោះរឹម រិន ភេទប្រុស អាយុ១៧ឆ្នាំ ពួកគេទាំងអស់នេះរស់នៅភូមិ-ឃុំកើតហេតុខាងលើជាមួយគ្នា។ សមត្ថកិច្ចបញ្ជាក់ថា ក្រុមជនដៃដល់បានប្រើដំបងឈើជ្រុងពួនស្ទាក់វាយជនរងគ្រោះបណ្ដាលឲ្យ រងរបួសធ្ងន់ធ្ងរក្នុងគ្រាដែលជនរងគ្រោះដើរចេញពីរោងការមួយកន្លែងនៅ ក្នុងភូមិពេលមានការរាំកម្សាន្ត។
ជាមួយនឹងការឃាត់ខ្លួននេះផងដែរក្រុមជនសង្ស័យមិនសារភាពថា ពួកគេជាអ្នកប្រព្រឹត្តនោះទេ ដោយគ្រាន់តែប្រាប់ថា នៅយប់ថ្ងៃកើតហេតុនោះពួកខ្លួនបាននាំគ្នាទៅរាំលេងក្នុងពិធីមង្គល ការមួយនៅក្នុងភូមិដោយមិនបានដឹងរឿងនោះឡើយ ប៉ុន្តែបានដឹងនៅពេលដែលមានមនុស្សជាច្រើនភ្ញាក់ផ្អើលពេលគេប្រទះឃើញ ជនរងគ្រោះដេកសន្លប់កណ្ដាលផ្លូវ។ ប៉ុន្តែនៅក្នុងចម្លើយរបស់ឈ្មោះស្រង់ ចាន់រុង ហៅឡោក បានប្រាប់ឲ្យដឹងថា នៅយប់កើតហេតុឈ្មោះឆាន់ ឆាយ ហៅអ៊ូក ដែលរត់គេចខ្លួនបាត់នោះបានមកបបួលខ្លួនទៅវាយមនុស្សម្នាក់តែ មិនប្រាប់ឈ្មោះនោះ ទេ។ លុះពេលពួកខ្លួនទាំង៤នាក់នាំគ្នាដើរដល់រោងការ ស្រាប់តែមានរឿងនោះកើតឡើងរួចទៅហើយ។ ជននេះបញ្ជាក់ថា ការពិតពួកខ្លួនមិនបានវាយឈ្មោះរឹម រិន នោះទេ ៕
0 មតិ:
Post a Comment