មន្ត្រីរដ្ឋាភិបាល នៅថ្ងៃទី៧ ខែកុម្ភៈ បានអះអាងថា កម្ពុជានឹងចាប់ផ្ដើមបូមប្រេង នៅឈូងសមុទ្រក្នុងប្លុកអេ (A) នៅចុងឆ្នាំ ២០១២ នេះ។ មន្ត្រីនាំពាក្យអង្គភាពព័ត៌មាន ទីស្ដីការគណៈរដ្ឋមន្ត្រី លោក ឯក ថា បានបញ្ជាក់ថា កម្ពុជានឹងអាចទទួលបាន ដំណក់ប្រេងកាតដំបូង បង្អស់ក្នុង ប្រវត្តិសាស្ត្រកម្ពុជា នៅខែធ្នូ ឆ្នាំ២០១២ ខាងមុខនេះ ដូចដែលបានគ្រោងទុក ដោយគ្មានអ្វីប្រែប្រួលនៅឡើយទេ។
ការអះអាងរបស់លោក ឯក ថា ធ្វើឡើងបន្ទាប់ពីសារព័ត៌មាន Bloomberg បានដកស្រង់សម្ដីលោក សុខ អាន រដ្ឋមន្ត្រីទីស្ដីការគណៈរដ្ឋមន្ត្រី ដែលបានប្រាប់សន្និសីទឋាមពលនៅទីក្រុងបាងកក ថា ក្រុមហ៊ុនអាមេរិក ឆៀវរ៉ុន (Chevron) នឹងចាប់ផ្ដើមបូមប្រេងនៅប្លុកអេ នៅឆ្នាំ២០១២នេះ។
លោក ឯក ថា៖ “កាលដែលយើងមានសុទិដ្ឋិនិយមយ៉ាងម៉ឺងម៉ាត់ ក្រោយពីក្រុមហ៊ុន ឆៀវរ៉ុន បានខួងអណ្ដូងប្រេងកាតនៅឈូងសមុទ្រនៅកម្ពុជា ក្រុមហ៊ុនបានធ្វើការជាដៃគូយ៉ាងជិតស្និទ្ធ ដើម្បីផលប្រយោជន៍ទាំងអស់គ្នា។ ប្រសិនបើអ្វីៗប្រកបដោយគ្មានភាពរអាក់រអួល ការងារបច្ចេកទេសដូចឯកឧត្ដមឧបនាយករដ្ឋមន្ត្រី សុខ អាន បញ្ជាក់ ការបូមប្រេងនឹងចាប់ផ្ដើមនៅថ្ងៃទី១២ ខែធ្នូ ឆ្នាំ២០១២”។
ព័ត៌មានចុងក្រោយ ស្ដីពីការរុករកប្រេងនៅកម្ពុជា ធ្វើឡើងបន្ទាប់ពី អាជ្ញាធរប្រេងកាតជាតិកម្ពុជា បានអនុញ្ញាតឲ្យ ក្រុមហ៊ុនជប៉ុន ចកម៉ិក (JOGMEC) សិក្សារាវរកធនធាន ប្រេងកាតនៅក្រោមដី នៅខេត្តចំនួន ៣ រួមមានខេត្តព្រះវិហារ ខេត្តកំពង់ធំ និងសៀមរាប។
គំរោងការសិក្សារាវនោះ ឋិតនៅប្លុក ១៧ (Bloc 17) ដែលមានទំហំប្រមាណ ៦.៥០០គីឡូម៉ែត្រក្រទ្បា ស្ថិតនៅឆ្ងាយ ពីតំបន់អភិរក្សប្រាសាទបុរាណ ដូចជាប្រាសាទព្រះវិហារ និងប្រាសាទដទៃទៀត។ កាលពីចុងឆ្នាំ២០១១ កម្ពុជាក៏បានផ្ដល់អាជ្ញាប័ណ្ណឲ្យក្រុមហ៊ុនចិន រុករកប្រេងកាតនៅប្លុកអេហ្វ (F) ផងដែរ។
ក្រៅពីការផ្ដល់សិទ្ធិសិក្សារករ៉ែប្រេងកាត រដ្ឋាភិបាលក៏បានផ្ដល់សិទ្ធិឲ្យក្រុមហ៊ុនបរទេស ស្វែងរករ៉ែដទៃទៀត ផងដែរ។ ការសិក្សាស្រាវជ្រាវរបស់ក្រុមអង្គការសង្គមស៊ីវិលបានរកឃើញថា រដ្ឋាភិបាលបានផ្ដល់អាជ្ញាប័ណ្ណចំនួន ១២៣ ឲ្យក្រុមហ៊ុនឯកជនបរទេសមកធ្វើអាជីវកម្មរាវរករ៉ែមាស ដែក និងត្បូង នៅខេត្តមណ្ឌលគិរី ខេត្តស្ទឹងត្រែង ខេត្តព្រះវិហារ និងខេត្តមួយចំនួនទៀត ដែលមានផ្ទៃដីសរុបចំនួន ២៤.០០០គីឡូម៉ែត្រក្រឡា។
អ្នកនាំពាក្យគណបក្ស សម រង្ស៊ី លោក យឹម សុវណ្ណ នៅថ្ងៃអង្គារ ទី៧ កុម្ភៈ បានស្វាគមន៍ព័ត៌មាននៃការបូមប្រេង ប៉ុន្តែសំដែងក្ដីបារម្ភថា កម្ពុជានឹងបាត់បង់ប្រាក់ចំណូលពីវិស័យប្រេងកាត ដោយសារកម្ពុជានៅខ្វះច្បាប់គ្រប់គ្រងវិស័យប្រេងកាត និងចំណូលជាច្រើន៖ "ប្រសិនបើថវិកាដែលបានមកពីការរុករកប្រេង និងប្រាក់ចំណូល មិនបានដាក់ចូលក្នុងថវិកាជាតិឲ្យមានតម្លាភាព និងទទួលខុសត្រូវនោះទេ វានឹងក្លាយជាទុក្ខសោកទៅវិញ។ សព្វថ្ងៃនេះយើងនៅខ្វះខាតច្បាប់ជាច្រើន”។
លោក សុខ អាន កាលពីខែកញ្ញា ឆ្នាំ២០១១ បានបញ្ជាក់ថា ក្រុមអ្នកច្បាប់ និងមន្ត្រីជំនាញកំពុងធ្វើសេចក្ដីព្រាងច្បាប់ស្ដីពីការគ្រប់គ្រង ប្រេងកាត និងឧស្ម័ន។ បច្ចុប្បន្ននេះ សេចក្ដីព្រាងច្បាប់ស្ដីពីការគ្រប់គ្រងប្រេងកាត និងឧស្ម័ន និងសេចក្ដីព្រាងច្បាប់ស្ដីពី ការយកពន្ធលើប្រាក់ចំណូលប្រេងកាត និងឧស្ម័ន កំពុងឋិតនៅទីស្ដីការគណៈរដ្ឋមន្ត្រីនៅឡើយ៕
ប្រភព៖ Radio Free Asia
0 មតិ:
Post a Comment