គណៈប្រតិភូសហរដ្ឋអាមេរិករបស់អង្គការថែរក្សាកម្ពុជា (People for Care & Learning) ផ្ដល់ប្រាក់១លានដុល្លារ ដល់សាលារាជធានីភ្នំពេញ ដើម្បីអភិវឌ្ឍន៍កសាងទីក្រុងនៅភូមិអណ្ដូង សង្កាត់គោករការ ខណ្ឌពោធិ៍សែនជ័យ។
គណៈប្រតិភូសហរដ្ឋអាមេរិកក្នុងពិធីជួបជុំ នៅព្រឹកថ្ងៃច័ន្ទ ទី៦ ខែកុម្ភៈ ឆ្នាំ២០១២ នៅខណ្ឌពោធិ៍សែនជ័យ រាជធានីភ្នំពេញ (RFA/Ouk Savborey)
ប្រជាពលរដ្ឋភូមិអណ្ដូង មន្ត្រីសាលារាជធានីភ្នំពេញ និងគណៈប្រតិភូសហរដ្ឋអាមេរិកជិត ១០០០នាក់ បានជួបជុំគ្នានៅព្រឹកថ្ងៃច័ន្ទ ទី៦ ខែកុម្ភៈ ឆ្នាំ២០១២ ដើម្បីពិភាក្សាការអភិវឌ្ឍគម្រោងកសាងទីក្រុងនៅភូមិអណ្ដូងថ្មី សង្កាត់គោករកា ខណ្ឌពោធិ៍សែនជ័យ។
អភិបាលរងរាជធានីភ្នំពេញ លោក នួន សុមេធ ថ្លែងថា ទឹកប្រាក់ ១លានដុល្លារ ដែលអង្គការថែរក្សាកម្ពុជា (People for Care & learning) បានផ្ដល់ឲ្យសាលារាជធានីភ្នំពេញ សម្រាប់អភិវឌ្ឍភូមិអណ្ដូង ក្នុងរយៈពេល ៣ឆ្នាំ។ នៅឆ្នាំដំបូង អង្គការបានផ្ដល់មូលប្បទានប័ត្រចំនួន ៣៥ម៉ឺនដុល្លារ ឲ្យអនុវត្តគម្រោង។ ប្រាក់នេះ សាលារាជធានីភ្នំពេញនឹងចាក់ដីនៅភូមិអណ្ដូង មិនឲ្យទឹកលិចនៅរដូវវស្សា កសាងផ្លូវ ទឹកស្អាត ភ្លើងអគ្គិសនី ជាដើម គឺត្រូវអនុវត្តគម្រោងមួយជំហានម្ដងៗ ៖ “សំខាន់បំផុតគឺកសាងនូវអគារមួយ សម្រាប់បណ្ដុះបណ្ដាលមុខរបរខ្នាតតូចរបស់បងប្អូនទៅអនាគត”។
ប្រតិភូអង្គការថែរក្សាកម្ពុជា បណ្ឌិត ហ្វ្រីត ការមូន (Fred Garmon) ថ្លែងថា ការស្រឡាញ់ពលរដ្ឋកម្ពុជា បានធ្វើឲ្យលោកធ្វើដំណើរមកប្រទេសកម្ពុជា ៥៤លើកហើយ ដើម្បីយកថវិកាមកជួយដល់ពលរដ្ឋក្រីក្រ រស់នៅក្នុងរាជធានីភ្នំពេញ ឲ្យគេទទួលបានការរស់នៅសមរម្យ។ ពលរដ្ឋរស់នៅសហរដ្ឋអាមេរិក រួមទាំងតារាភាពយន្តហូលីវូឌ (Hollywood) ផង បានប្រមូលថវិកាមកជួយអភិវឌ្ឍជនក្រីក្រនៅប្រទេសកម្ពុជា ដោយសហការជាមួយសាលារាជធានីភ្នំពេញ ៖ “ដូច្នេះខ្ញុំបានសួរនាយកតំណាងប្រទេសនឹង អ៊ីចឹងយើងនឹងសង់ផ្ទះនឹង ជូនប្រជាជននៅក្នុងភូមិនឹង ឲ្យបានគ្រប់គ្នានៅក្នុងភូមិតែម្ដង”។
បណ្ឌិត ចន គ្រីហ្គរី (John Gregory) ប្រតិភូអង្គការថែរក្សាកម្ពុជាថ្លែងថា ដោយសារតែមានក្ដីស្រឡាញ់ដល់ពលរដ្ឋកម្ពុជា មូលនិធិលោកបានជួយដល់អង្គការថែរក្សាកម្ពុជាអស់រយៈពេលជាង ១០ឆ្នាំ ដើម្បីឲ្យពលរដ្ឋកម្ពុជាក្រីក្រ បានរស់នៅប្រកបដោយសុភមង្គល និងផ្ដល់នូវគំនិតថែរក្សាពលរដ្ឋ និងធ្វើជាដៃគូល្អអភិវឌ្ឍគំនិត។
ប្រជាពលរដ្ឋរស់នៅភូមិអណ្ដូងច្រើនពាន់គ្រួសារ ដែលបានប្ដូរទីលំនៅពីសហគមន៍សំបុកចាប កាលពីថ្ងៃ១ ខែមិថុនា ឆ្នាំ២០០៦ មករស់នៅក្នុងភូមិអណ្ដូងថ្មី បានផ្ដល់យោបល់ថា ការអភិវឌ្ឍនេះ ពួកគេរីករាយជាខ្លាំង។ ប៉ុន្តែពួកគេខ្លះបារម្ភខ្លាចក្រោយការអភិវឌ្ឍរួច ពួកគេមិនអាចរស់នៅក្នុងភូមិអណ្ដូងទៀតបាន។
ស្ត្រីផ្ទុកមេរោគអេដស៍រស់នៅភូមិអណ្ដូងថ្មី ដែលប្ដូរលំនៅពីសហគមន៍សំបុកចាប ថ្លែងថា គាត់បារម្ភប្រសិនបើយកដីពួកគាត់កំពុងរស់នៅ ទៅសង់ផ្ទះថ្ម ហើយឲ្យគាត់បង់ប្រាក់ទិញផ្ទះនោះគាត់មិនមានលទ្ធភាពទេ ៖ “សង់ផ្ទះថ្មហើយ ឲ្យបង់លុយរាប់ពាន់ទៀត តើខ្ញុំមានលទ្ធភាពឯណារកលុយបង់”។
លោក ឌៀប ណារ៉េត ថ្លែងថា ៖ “ធ្វើហើយ ឲ្យបងប្អូននឹងបាននៅកន្លែងនឹងវិញផង កុំឲ្យអត់”។
យុវសិស្សវិទ្យាល័យជាស៊ីមឈូកវ៉ា ឈ្មោះ សន សុភ័ក្រ បន្ថែមថា ការអភិវឌ្ឍពួកគេខ្លាចព្រោះគេធ្លាប់រងនូវការបណ្ដេញពីផ្ទះនៅសំបុកចាប មករស់នៅភូមិអណ្ដូងថ្មី។ ច្រើនឆ្នាំក្រោយមកគ្រួសារគេទើបមានលទ្ធភាពសង់ផ្ទះរស់នៅបានស្រួល ស្រាប់តែសាលាក្រុងមានគម្រោងមកសង់ផ្ទះជាថ្មី គេខ្លាចក្រោយការសង់លំនៅថ្មីហើយ គ្រួសារគេ និងក្រុមមិត្តដទៃទៀត ដែលប្ដូរពីសំបុកចាប មិនអាចរស់នៅក្នុងតំបន់អភិវឌ្ឍន៍ថ្មីនេះ ៖ “ការបារម្ភរបស់ខ្ញុំ គឺខ្លាចមានការបណ្ដេញចេញដូចថ្ងៃទី៦ ខែ៦ ឆ្នាំ២០០៦ នោះដែរ”។
មន្ត្រីសាលារាជធានីភ្នំពេញបានថ្លែងថា គម្រោងនេះកំពុងសិក្សានៅឡើយ មិនទាន់មានផែនការជាក់លាក់អនុវត្តនៅខែណាទេ។ ការអភិវឌ្ឍនេះ គឺអង្គការជាអ្នកចេញប្រាក់អភិវឌ្ឍ ចំណែកសាលារាជធានីភ្នំពេញ ជាអ្នកទទួលខុសត្រូវអនុវត្តគម្រោងនេះ៕
ប្រភព:វិទ្យុអាស៊ីសេរី
0 មតិ:
Post a Comment