រដ្ឋមន្ត្រីការបរទេសឥណ្ឌូណេស៊ី លោក Marty Nalalegawa នឹងមកបំពេញទស្សនកិច្ចរយៈពេលមួយថ្ងៃនៅកម្ពុជានៅថ្ងៃចន្ទច័ន្ទនេះ។ ក្រសួងការបរទេសកម្ពុជាមិនបានប្រាប់ឲ្យដឹងជាផ្លូវការអំពីរបៀបវារៈនៃកិច្ចពិភាក្សាក្នុងដំណើរទស្សនកិច្ចនេះនៅឡើយទេ ប៉ុន្តែ ប្រភពក្រៅផ្លូវការបានឲ្យដឹងថា ទស្សនកិច្ចរបស់ប្រមុខការទូតឥណ្ឌូណេស៊ី គឺដើម្បីស្វែងយល់អំពីដំណោះស្រាយបញ្ហាព្រំដែនកម្ពុជាថៃក្នុងក្របខណ្ឌនៃសាលដីការបស់តុលាការយុត្តិធម៌អន្តរជាតិក្រុងឡាអេ។
លោក ហោ ណាំហុង រដ្ឋមន្ត្រីការបរទេសកម្ពុជានឹងទទួលជួបពិភាក្សាជាមួយលោក Marty Nalalegawa រដ្ឋមន្ត្រីការបរទេសឥណ្ឌូណេស៊ីនៅថ្ងៃចន្ទនេះនៅឯទីស្តីការក្រសួងការបរទេសទីក្រុងភ្នំពេញ។ លិខិតជូនដំណឹងរបស់ក្រសួងការបរទេសកម្ពុជាបានប្រាប់ឲ្យដឹងថា ដំណើរទស្សនកិច្ចរបស់រដ្ឋមន្ត្រីការបរទេសឥណ្ឌូណេស៊ីគឺធ្វើឡើងតាមការអញ្ជើញរបស់លោក ហោ ណាំហុង ប៉ុន្តែ ក្រសួងការបរទេសមិនបានប្រាប់ពីរបៀបវារៈនៃកិច្ចពិភាក្សាគ្នាក្នុងដំណើរទស្សនកិច្ចនេះទេ។ រីឯមន្ត្រីក្រសួងការបរទេសមួយចំនួនក៏អះអាងថាមិនបានដឹងពីរបៀបវារៈនៃដំណើរទស្សនកិច្ចនេះដែរ។
យ៉ាងណាក៏ដោយ ប្រភពក្រៅផ្លូវការបានឲ្យដឹងថាដំណើរទស្សនកិច្ចរបស់ប្រមុខការទូតឥណ្ឌូណេស៊ីនៅពេលនេះធ្វើឡើងនៅក្នុងក្របខណ្ឌនៃការសម្របសម្រួលក្នុងជម្លោះព្រំដែនរវាងកម្ពុជានិងថៃ។ ប្រភពដដែលបានឲ្យដឹងទៀតថា លោក Marty Nalalegawa មកកម្ពុជាដើម្បីស្វែងយល់ពីការវិវឌ្ឍន៍ថ្មីៗក្នុងដំណោះស្រាយបញ្ហាព្រំដែនរវាងកម្ពុជានិងថៃ។ បន្ទាប់ពីបញ្ចប់ទស្សនកិច្ចនៅភ្នំពេញនៅថ្ងៃស្អែកនេះ ប្រមុខការទូតឥណ្ឌូណេស៊ីនឹងបន្តដំណើរទៅកាន់ទីក្រុងបាងកកទៀតដើម្បីជួបពិភាក្សាជាមួយមេដឹកនាំថៃ។
គួររម្លឹកថា ឥណ្ឌូណេស៊ីបានដើរតួនាទីជាអ្នកសម្របសម្រួលជម្លោះកម្ពុជាថៃកាលពីឆ្នាំ២០១១កន្លងទៅនៅពេលដែលប្រទេសនេះបំពេញតួនាទីជាប្រធានអាស៊ាន។ ប៉ុន្តែ នៅឆ្នាំ២០១២ នេះខណៈដែលកម្ពុជាឡើងធ្វើជាប្រធានអាស៊ានវិញម្តង កម្ពុជាបានស្នើឲ្យឥណ្ឌូណេស៊ីបន្តតួនាទីជាអ្នកសម្របសម្រួលជម្លោះព្រំដែនជាមួយប្រទេសថៃដដែល។ នៅក្នុងក្របខណ្ឌនេះ លោក Marty ត្រូវបានតែងតាំងជាអ្នកសម្របសម្រួលដោះស្រាយបញ្ហារវាងប្រទេសទាំងពីរ។ ដូច្នេះ បេសកកម្មរបស់លោកគឺការសម្របសម្រួលរឿងដកកងទ័ពចេញពីតំបន់គ្មានកងទ័ពបណ្តោះអាសន្នទៅតាមសាលដីការបស់តុលាការក្រុងឡាអេកាលពីថ្ងៃទី១៨កក្កដាឆ្នាំ២០១១។ ការដកទ័ពចេញពីតំបន់ជម្លោះនេះត្រូវធ្វើឡើងក្រោមការត្រួតពិនិត្យរបស់អ្នកសង្កេតការណ៍ឥណ្ឌូណេស៊ី។
ប៉ុន្តែ ម្តងហើយម្តងទៀត បញ្ហានេះបានជាប់គាំងដោយសារតែភាគីថៃមិនព្រមអនុវត្តតាម។ ម្យ៉ាងទៀត រដ្ឋមន្ត្រីការបរទេសឥណ្ឌូណេស៊ីលោក Marty Nalalegawa ក៏ត្រូវរាយការណ៍ជូនតុលាការក្រុងឡាអេអំពីការវិវឌ្ឍន៍ក្នុងសំណុំរឿងនេះផងដែរ។ ទាំងនេះជាកម្មវត្ថុនៃដំណើរទស្សនកិច្ចរបស់លោកនៅកម្ពុជានិងថៃនៅពេលនេះ៕
0 មតិ:
Post a Comment