សេចក្តីជូនដំណឹង របស់ក្រសួងការបរទេស ចុះថ្ងៃទី៦ ខែមីនា ឆ្នាំ២០១២ បង្ហាញថា អ្នកសារព័ត៌មាន ដែលមានបំណងចូលរួមយកព័ត៌មាន ក្នុងកិច្ចប្រជុំខាងលើនេះ អាចចុះឈ្មោះតាមគេហទំព័រ www.asean2012.mfa.gov.kh ឬក៏អាចទៅចុះឈ្មោះនៅក្រសួងព័ត៌មាន ចាប់ផ្តើមពីថ្ងៃនេះ រហូតដល់ថ្ងៃទី២៥ ខែមីនា ឆ្នាំ២០១២។
ក្នុងកិច្ចប្រជុំកំពូលអាស៊ាន ចាប់ពីថ្ងៃទី៣០ មីនា ដល់ថ្ងៃទី៤មេសាខាងមុខ គឺមានកិច្ចប្រជុំរដ្ឋមន្ត្រីការបរទេសអាស៊ាន ដែលនឹងធ្វើឡើង នៅថ្ងៃទី២ ខែមេសា ឆ្នាំ២០១២។ ចំណែកកិច្ចប្រជុំកំពូលអាស៊ាន ដែលមាននាយករដ្ឋមន្ត្រី និងប្រមុខរដ្ឋប្រទេសសមាជិកអាស៊ានទាំង ១០ ចូលរួម គឺនឹងធ្វើឡើងនៅថ្ងៃទី៣ ខែមេសា ឆ្នាំ២០១២។
ចំណែកកិច្ចប្រជុំរដ្ឋមន្ត្រីការបរទេសអាស៊ាន (AMM) ត្រូវបានគេដឹងថា នឹងពិភាក្សាលើការផ្លាស់ប្តូរទស្សនៈជុំវិញបញ្ហាតំបន់ និងអន្តរជាតិ និងសេចក្តីថ្លែងការណ៍របស់អាស៊ាន ស្តីពី សិទ្ធិមនុស្ស ដំណោះស្រាយលើក្រមប្រតិបត្តិសមុទ្រចិនខាងត្បូង DOC តួនាទីរបស់អាស៊ាន ក្នុងសន្និសីទ G20 នៅប្រទេសម៉ិចស៊ិក ព្រមទាំងបញ្ហាប្រឆាំងគ្រឿងញៀន ដែលអាស៊ានកំណត់យកឆ្នាំ២០១៥ គឺតំបន់អាស៊ាន គ្មានគ្រឿងញៀន។
បញ្ហាកម្ពុជាធ្វើជាប្រធានអាស៊ាន និងកិច្ចប្រជុំកំពូលអាស៊ាន នាពេលខាងមុខ ត្រូវបានលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា លើកយកទៅពិភាក្សាជាមួយលោក ម៉ាទី ណាតាឡេហ្គាវ៉ា (Marty Natalegawa) រដ្ឋមន្ត្រីការបរទេសឥណ្ឌូណេស៊ី កាលពីថ្ងៃទី៥ ខែមីនា ឆ្នាំ២០១២ នៅទីស្តីការក្រសួងការបរទេស ក្នុងរាជធានីភ្នំពេញ។ ឥណ្ឌូណេស៊ី ជាប្រធានអាស៊ាន កាលពីឆ្នាំ២០១១។
ក្រោយកិច្ចប្រជុំ លោក ហោ ណាំហុង បានមានប្រសាសន៍ថា "ឯកឧត្តមរដ្ឋមន្ត្រីការបរទេសឥណ្ឌូនេស៊ី ក៏បានប្រាប់ថា ឥណ្ឌូនេស៊ី ត្រៀមខ្លួនជានិច្ច ដើម្បីបញ្ជូនឧត្តមមន្ត្រីអាស៊ានរបស់ឥណ្ឌូណេស៊ី មកកម្ពុជា ដើម្បីផ្លាស់ប្តូរទស្សនៈ និងការពិសោធន៍គ្នា ក្នុងការធ្វើជាប្រធានអាស៊ាននេះ។ ខ្ញុំក៏បានជម្រាបជូនឯកឧត្តម ណាតាឡេហ្គាវ៉ា អំពីបញ្ហាសំខាន់ខ្លះៗ ដែលកម្ពុជារៀបចំក្នុងការប្រជុំកំពូលអាស៊ាននេះ។ ទី១-បញ្ហាធ្វើយ៉ាងណាឲ្យប្រទេសមហាអំណាច នុយក្លេអ៊ែរទាំង ៥ ចុះហត្ថលេខាលើពិធីសារ តំបន់អាស៊ីអាគ្នេយ៍ គ្មានអាវុធនុយក្លេអ៊ែរ។
បញ្ហាទី២-ធ្វើយ៉ាងណាឲ្យការពិភាក្សារកចំណុចគន្លឹះ នៃក្រមប្រតិបត្តិនៃសមុទ្រចិនខាងត្បូង ឲ្យបានដើរទៅមុខ។ បញ្ហាសំខាន់មួយទៀត សម្រាប់កម្ពុជា ធ្វើជាប្រធានអាស៊ាន គឺបញ្ហាប្រជុំជាមួយប្រធានអង្គការអន្តរជាតិសំខាន់ៗ គេហៅថា ការសន្ទនាគ្រប់ជ្រុងជ្រោយរបស់អាស៊ាន ដែលក្នុងនោះ មានអគ្គលេខាធិការអង្គការសហប្រជាជាតិ ប្រធានធនាគារពិភពលោក ធនាគារ IMF ព្រមទាំងប្រធានអង្គការពាណិជ្ជកម្មពិភពលោក ដើម្បីផ្លាស់ប្តូរយោបល់គ្នាលើបញ្ហាប្រឈមលើពិភពលោកនាពេលសព្វថ្ងៃនេះ។ ខ្ញុំនិយាយថា បើធ្វើបាននូវការប្រជុំកំពូលអាស៊ាន គឺការសន្ទនាគ្រប់ជ្រុងជ្រោយរបស់អាស៊ាន លើពិភពលោកនេះ ជាការមួយមានសារៈសំខាន់ណាស់។ គឺលើកតួនាទីរបស់អាស៊ាន កាន់តែខ្ពស់ទៀត លើឆាកអន្តរជាតិ៕
ប្រភព៖ RFI
0 មតិ:
Post a Comment