សារព័ត៌មានបរទេសផ្សាយឱ្យដឹងថា អង្គការអាកាសចរណ៍ និងអវកាសសហរដ្ឋអាមេរិក(NASA) ប្រទះឃើញផ្កាយព្រះគ្រោះថ្មីមានឈ្មោះថា «២០១១ អេជី៥»(២០១១ AG5)ទំហំប្រហែល៤៦០ហ៊្វូត គឺប្រហែល១៣៨ម៉ែត្រអាចមានឱកាសនឹងបុកផែនដីក្នុងរយៈពេលប្រហែល៣០ឆ្នាំខាងមុខ ។ បច្ចុប្បន្ន ក្រុមប្រតិបត្តិការរបស់អង្គការសហប្រជាជាតិកំពុងតាមដាន និងរិះរកវិធីសាស្ត្រទប់ទល់គ្រោះមហន្តរាយដែលអាចនឹងកើតឡើង ។
NASA បានគូសបញ្ជាក់ថា ផ្កាយព្រះគ្រោះខាងលើនឹងគោចរចូលក្បែរផែនដីជិតបំផុតក្នុងថ្ងៃទី៥ កុម្ភៈ ឆ្នាំ២០៤០ និងមានភាពប្រថុយប្រថានប្រហែល១ភាគ៦២៥ នឹងបុកផែនដី ប៉ុន្តែតួលេខនេះ អាចមានការប្រែប្រួលទៅតាមពេលវេលា ។ អ្នកវិទ្យាសាស្ត្រមានជំនឿថា ប្រសិនបើមានការបុកផែនដីពិតមែន ការប៉ះទង្គិចនឹងសម្លាប់មនុស្សជាច្រើននាក់ ប៉ុន្តែមិនស្លាប់រង្គាលដូចយុគសម័យដាយណូស័រ ដែលមានជំនឿថា ត្រូវផ្កាយព្រះគ្រោះទំហំប្រហែល៩ម៉ៃល៍ គឺប្រហែល១៤,៤គីឡូម៉ែត្របុកផែនដីនោះឡើយ ។
ទោះបីជាបែបណាក៏ដោយ បច្ចុប្បន្នអ្នកវិទ្យាសាស្ត្រនៅមិនទាន់ច្បាស់នៅឡើយទេ ទាក់ទងនឹងផ្កាយព្រះគ្រោះនេះ ក្រៅពីទំហំនិងវិធីសាស្ត្រគោចរ ប៉ុន្តែពួកគេមានការរំពឹងទុកថា ក្នុងរវាងពីឆ្នាំ២០១៣ ដល់២០១៦ ក្រុមការងារនឹងធ្វើការតាមដានពីផ្កាយព្រះគ្រោះខាងលើ ព្រមទាំងស្វែងរកទិន្នន័យឱ្យបានកាន់តែច្រើន ៕
0 មតិ:
Post a Comment