អតីតមេដឹកនាំថៃបានព្រមានថា ភាពរង្គោះរង្គើជម្លោះផ្ទៃក្នុងថៃ អាចនឹងកើតមានសាជាថ្មីទៀត ប្រសិនបើតុលាការអន្តរជាតិសម្រេចអោយកម្ពុជាឈ្នះក្នុងរឿងក្ដីដីតំបន់ប្រាសាទព្រះវិហារ។
អតីតនាយករដ្ឋមន្ត្រីថៃ លោក Thaksin Shinawat និយាយថា ប្រសិនបើតុលាការយុត្តិធម៌អន្តរជាតិ ក្នុងទីក្រុងឡាអេ ប្រទេសហុឡង់ដ៍ កាត់សេចក្ដីឲ្យភាគីថៃចាញ់ក្ដីក្នុងករណីជម្លោះតាមបណ្ដោយព្រំដែនជាមួយកម្ពុជា ក្បែរតំបន់ប្រាសាទព្រះវិហារនោះ ជម្លោះក្នុងចំណោមពលរដ្ឋថៃនឹងកាន់តែរីករាលដាលក្ដៅគគុកឡើងជាក់ជាមិនខាន។
កាសែត Bangkok Post បានដកស្រង់សំដីរបស់លោក Thakshin ចុះផ្សាយកាលពីថ្ងៃអាទិត្យ បានឲ្យដឹងថា លោក Thaksin បានសារភាពថា រដ្ឋមន្ត្រីក្រសួងការបរទេសថៃ លោក Nappadon Pattama កាលពីឆ្នាំ២០០៩ មិនគួរគាំទ្រដល់កម្ពុជាក្នុងការដាក់បញ្ចូលប្រាសាទព្រះវិហារទៅក្នុងបញ្ជីសម្បត្តិបេតិកភណ្ឌពិភពលោកនោះឡើយ។ លោកបន្តថា រឿងក្ដីនេះ កម្ពុជាមានប្រៀបជាងថៃ។
លោក Thaksin គូសបញ្ជាក់ថា នៅក្នុងអំឡុងបារាំងធ្វើអាណានិគមលើកម្ពុជា បារាំងបានប្រគល់ផែនទីព្រំដែនប្រសាទព្រះវិហារអោយព្រះអង្គម្ចាស់ថៃ Damrong Rajanuparb ដែលត្រូវជាប្អូនប្រុសរបស់ស្តេច Rama ទី៥ របស់ថៃ។ ពេលនោះ ព្រះអង្គម្ចាស់ថៃ Damrong Rajanuparb, មិនត្រឹមតែមិនជំទាស់តវ៉ាទេ ព្រះអង្គថែមទាំងសុំផែនទី៤ច្បាប់ទៀតពីបារាំង ដើម្បីយកទៅចែកចាយអាជ្ញាធរថៃឲ្យប្រើប្រាស់។
លោក Thaksin បន្តថា នៅក្នុងច្បាប់អន្តរជាតិ ប្រសិនបើប្រទេសជិតខាងរបស់ខ្លួនធ្វើផែនទីព្រំដែន ហើយប្រទេសមួយជំទាស់ ប្រទេសនោះត្រូវលើកតរឿង។ ប៉ុន្តែប្រទេសថៃនាពេលនោះមិនជំទាស់នឹងផែនទីរបស់បារាំងនោះទេ។ ទោះជាយ៉ាងណាក៏ដោយ អតីតនាយករដ្ឋមន្ត្រីថៃរូបនេះ បានបន្តទៀតថា សេចក្ដីសម្រេចរបស់តុលាការយុត្តិធម៌អន្តរជាតិក្នុងទីក្រុងឡាអេឆ្នាំ១៩៦២ មិនបានបញ្ជាក់ច្បាស់អំពីតំបន់ជុំវិញប្រាសាទព្រះវិហារឡើយ។
ទោះយ៉ាងណាក៏ដោយ មន្រ្តីជាន់ខ្ពស់របស់កម្ពុជា មិនមានការភ្ញាក់ផ្អើលអ្វីនោះឡើយ ហើយថាប្រទេសទាំងពីរត្រូវអនុវត្តតាមសាលក្រមកំពូលក្នុងពិភពលោកមួយនេះ។
អ្នកនាំពាក្យក្រសួងការបរទេសខ្មែរ លោក គុយ គួង មានប្រសាសន៍ថា ជម្លោះក្នុងប្រទេសថៃគឺជាការទទួលខុសត្រូវរបស់រដ្ឋាភិបាលដែលត្រូវដោះស្រាយ។ ហើយថា ថៃត្រូវគោរពទៅតាមច្បាប់អន្តរជាតិ។
នៅឆ្នាំ១៩៦២ តុលាការយុត្តិធម៌អន្តរជាតិក្នុងទីក្រុងឡាអេ ប្រទេសហុឡង់ដ៍ បានសម្រេចឲ្យកម្ពុជាឈ្នះក្ដីក្នុងករណីជម្លោះប្រាសាទព្រះវិហារ។ ចាប់តាំងពីពេលនោះមក ប្រទេសទាំងពីរបានគោរពសាលក្រមស្ថាពរមួយនេះរៀងៗខ្លួន។ រយៈពេល ៤៧ឆ្នាំក្រោយមក ប្រទេសទាំងពីរចាប់ផ្ដើមមានជម្លោះលើបញ្ហាប្រាសាទម្ដងទៀត ក្រោយពីកម្ពុជាបានដាក់បញ្ចូលប្រាសាទរបស់ខ្លួនមួយនេះ ទៅក្នុងបញ្ជីសម្បត្តិបេតិកភណ្ឌពិភពលោកនៅឆ្នាំ២០០៩។
កាលពីថ្ងៃទី៨ ខែមិនា កន្លងទៅថ្មីៗនេះ ភាគីកម្ពុជាបានឡើងបង្ហាញឯកសារបន្ថែមអំពីជម្លោះរបស់ខ្លួន ជាមួយថៃ នៅចំពោះមុខចៅក្រមនៃតុលាការយុត្តិធម៌អន្តរជាតិ (ICJ)។ ការឡើងបង្ហាញអំណះអំណាងរបស់កម្ពុជាក្រោយពីភាគីថៃបានបង្ហាញឯកសាររបស់ខ្លួនកាលពីចុងឆ្នាំមុន។
លោក គុយ គួង មានប្រសាសន៍ថា ក្នុងកាលៈទេសៈនេះ កម្ពុជាគ្មានអ្វីក្រៅពីរង់ចាំការកាត់សេចក្ដីរបស់តុលាការអន្តរជាតិនោះឡើយ។
រហូតមកទល់ពេលនេះ គេឃើញស្ថានការណ៍យោធាក្នុងតំបន់ព្រំដែនកម្ពុជា-ថៃ ក្បែរប្រាសាទព្រះវិហារ នៅមានសភាពស្ងប់ស្ងាត់នៅឡើយ។ ពលរដ្ឋខ្មែរសង្ឃឹមថា តុលាការអន្តរជាតិមួយនេះនឹងផ្ដល់យុត្តិធម៌ដល់កម្ពុជា៕
0 មតិ:
Post a Comment