ខេត្តសៀមរាប ៖ លោកយឹម ឆៃលី ឧបនាយករដ្ឋមន្ដ្រី ទទួលបន្ទុកប្រធានក្រុមប្រឹក្សាស្តារ និងអភិវឌ្ឍន៍វិស័យកសិកម្មជនបទ បានថ្លែងថា «ប្រមុខរាជរដ្ឋាភិបាលកម្ពុជា បានដាក់ចេញនូវបទបញ្ជាឱ្យដោះលែងទណ្ឌិត និងពិរុទ្ធជនទាំងឡាយណាជាប់ពាក់ព័ន្ធនឹងការនេសាទខុសច្បាប់នៅទូទាំងប្រទេសដែលរដ្ឋបាលជលផល ក៏ដូចអាជ្ញាធរបឹងទន្លេសាបចាប់បញ្ជូនទៅឱ្យតុលាការក្នុងគ្រាចុះអនុវត្ដន៍សារាចរលេខ០១របស់រាជរដ្ឋាភិបាលឱ្យមានសេរីភាពវិញ លើកលែងតែករណីកាប់ព្រៃលិចទឹកពុំអនុញ្ញាតឱ្យដោះលែងឡើយ ។
លោកឧបនាយករដ្ឋមន្ដ្រីយឹម ឆៃលី បានមានប្រសាសន៍យ៉ាងដូច្នេះ កាលពីព្រឹកថ្ងៃទី៤ មីនា ក្នុងកិច្ចប្រជុំដ៏ប្រថុចញ៉ុចមួយនៅឯសាលប្រជុំសាលាខេត្ដសៀមរាប ដោយមានការចូលរួមពីសំណាក់អ្នកឧកញ៉ាសៀង ណាំ តំណាងរាស្ដ្រមណ្ឌលសៀមរាប លោកស៊ូ ភិរិន្ទ អភិបាលខេត្ដសៀមរាប លោកមុំ សោភា រដ្ឋលេខាធិការក្រសួងយុត្ដិធម៌ លោកចន័ន្ទ វុត្ថា អគ្គនាយកក្រសួងធនធានទឹក និងឧតុនិយម និងលោកណៅ ធួក ប្រធានរដ្ឋបាលជលផល ព្រមទាំងមន្ដ្រីអាជ្ញាធរពាក់ព័ន្ធជាច្រើនរូបទៀត ។
លោកឧបនាយករដ្ឋមន្ត្រីបានបន្ថែមថា បទបញ្ជាឱ្យដោះលែងទណ្ឌិត និងពិរុទ្ធជន នៅទូទាំងប្រទេសសម្ដេចតេជោ ហ៊ុន សែន បានប្រកាសរួចហើយ ដែលការសម្រេចដោះលែងនេះ មិនមែនតែខេត្ដសៀមរាបមួយប៉ុណ្ណោះទេ គឺធ្វើឡើងក្នុងក្របខណ្ឌទូទាំងប្រទេសចំពោះប្រជាពលរដ្ឋណាប្រព្រឹត្តពាក់ព័ន្ធជាមួយបទល្មើសនេសាទ ដែលត្រូវបានរដ្ឋបាលជលផល និងអាជ្ញាធរបឹងទន្លេសាប ចាប់បញ្ជូនទៅតុលាការពីមុនមក ។ ប៉ុន្ដែចំពោះអ្នកដែលកាប់ទន្ទ្រានព្រៃលិចទឹក ឬអ្នកកាប់ឈើខុសច្បាប់មិនអាចដោះលែងទេ ដូចជាករណីនៅខេត្ដបន្ទាយមានជ័យ និងខេត្ដបាត់ដំបង ព្រោះពួកអ្នកទាំងនោះសុទ្ធតែទៅកាប់ព្រៃយកដី ។
លោកបានបន្ដថា នៅពេលដែលរាជរដ្ឋាភិបាលអនុវត្ដគោលនយោបាយទប់ស្កាត់បទល្មើសនេសាទជាប្រវត្ដិសាស្ដ្រនៅក្នុងបឹងទន្លេសាប ជាពិសេសអនុវត្ដសារាចរលេខ០១នោះយើងបានចាប់ប្រជាពលរដ្ឋមួយចំនួនយកមកដាក់ពន្ធនាគារ ហើយពេលនេះរាជរដ្ឋាភិបាលបានប្រកាសឱ្យប្រជាពលរដ្ឋចាប់ត្រីឡើងវិញ ពោលគឺសម្រេចរំលាយឡូត៍នេសាទទាំងអស់ក្នុងបឹងទន្លេសាប ដូច្នេះអត់មានតំបន់ណាត្រូវហាមឃាត់ទៀតទេ ត្រូវតែធ្វើការដោះលែងពួកគាត់ឱ្យមានសេរីភាពវិញ ។ លោកបានបញ្ជាក់បន្ថែមថា ការដោះលែងប្រជាពលរដ្ឋទាំងនោះ ត្រូវធ្វើយ៉ាងណាឱ្យស្របទៅតាមនីតិវិធីរបស់តុលាការ ហើយមធ្យោបាយដែលល្អនោះ យើងត្រូវតែអនុវត្ដឱ្យបានឆាប់បំផុត ដោយប្រគល់ភារកិច្ចដ៏សំខាន់នេះទៅឱ្យលោកម៉ី សោភា រដ្ឋលេខាធិការក្រសួងយុត្ដិធម៌ជាអ្នកដោះស្រាយទូទាំងប្រទេស ។
ទាក់ទិនទៅនឹងនីតិវិធីនៃការដោះលែងទណ្ឌិត និងពិរុទ្ធជនជាប់ពាក់ព័ន្ធទៅនឹងករណីប្រព្រឹត្តបទល្មើសនេសាទតាមបទបញ្ជារបស់ប្រមុខរាជរដ្ឋាភិបាលកម្ពុជានោះ លោកម៉ី សោភា រដ្ឋលេខាធិការក្រសួងយុត្ដិធម៌ បានមានប្រសាសន៍ថា ប្រជាពលរដ្ឋទាំងអស់ដែលត្រូវបានរដ្ឋបាលជលផល និងអាជ្ញាធរបឹងទន្លេសាប ចាប់បញ្ជូនមកឱ្យតុលាការទាំងអស់ភាគច្រើនត្រូវបានចោទប្រកាន់ពីបទប្រើប្រាស់ឧបករណ៍ឆក់ត្រី ឧបករណ៍នេសាទស្បៃមុង និងប្រើប្រាស់ឧបករណ៍នេសាទមួយចំនួនទៀត ដែលពុំមានក្នុងប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ដោយក្នុងនោះមួយចំនួនត្រូវបានតុលាការបើកសវនាការកាត់ទោសសាលក្រមស្ថាពររួចហើយ និងមួយចំនួនទៀតតុលាការនៅមិនទាន់កាត់ទោសនៅឡើយទេ។
លោកបានបញ្ជាក់ថា ចំពោះករណីសំណុំរឿងដែលមានប្រកាសសាលក្រមស្ថាពរនោះនីតិវិធីនៃការដោះលែងត្រូវតែធ្វើទៅតាមរយៈក្រសួងយុត្ដិធម៌ស្នើទៅសម្ដេចនាយករដ្ឋមន្ដ្រី ដើម្បីស្នើទៅដល់ព្រះមហាក្សត្រសុំការប្រទានលើកលែងទោស ។ ចំណែកសំណុំរឿងមិនទាន់កាត់ក្ដីអាចធ្វើទៅបានតាមរយៈការដោះលែងនៅក្រៅឃុំ ឬបើកសវនាការកាត់ឱ្យគាត់នៅក្រៅឃុំតែម្ដង ។
នៅក្នុងកិច្ចប្រជុំដ៏មានសារសំខាន់នោះដែរលោកឧកញ៉ាសៀង ណាំ អ្នកតំណាងរាស្ដ្រមណ្ឌលសៀមរាប បានទទូចសុំឱ្យមានការប្រគល់នូវឧបករណ៍នេសាទដូចជាទូក កាណូតម៉ាស៊ីន ឱ្យទៅទណ្ឌិត និងពិរុទ្ធជនទាំងអស់វិញ ខណៈប្រមុខរាជរដ្ឋាភិបាលសម្រេចធ្វើការដោះលែងពួកគាត់ឱ្យមានសេរីភាពវិញ ។
ទោះជាយ៉ាងណា រហូតមកទល់ពេលនេះ ពុំមានរបាយការណ៍ផ្លូវការណាមួយបញ្ជាក់ឱ្យដឹងអំពីចំនួនទណ្ឌិត និងពិរុទ្ធជនទូទាំងប្រទេសដែលកំពុងជាប់ក្នុងមន្ទីរឃុំឃាំង ព្រោះតែ
នេសាទខុសច្បាប់នោះនៅឡើយ ខណៈខេត្ដសៀមរាបមានការអះអាងថា មានចំនួន៦ សំណុំរឿងស្មើនឹង១៩នាក់។
ចំណែកលោកច័ន្ទ វុត្ថា អគ្គនាយកក្រសួងធនធានទឹកនិងឧតុនិយម ដែលបានចូលរួមនៅក្នុងកិច្ចប្រជុំនោះដែរ បានមានប្រសាសន៍ថា នៅក្នុងការចុះអនុវត្ដសារាចរលេខ០១ របស់រាជរដ្ឋាភិបាលជំហានពីរនៅទូទាំងបណ្ដាខេត្ដជាប់បឹងទន្លេសាបរួមមានខេត្ដកំពង់ធំ សៀមរាប បន្ទាយមានជ័យ បាត់ដំបង ពោធិ៍សាត់ និងកំពង់ឆ្នាំង កន្លងមកអាជ្ញាធរបឹងទន្លេសាបបានធ្វើការចាប់ខ្លួនប្រជាពលរដ្ឋប្រមាណជាង ១០នាក់រួចមកហើយ ច្រើនជាងគេ គឺខេត្ដសៀមរាបតែម្ដង និងខេត្ដបាត់ដំបងប្រមាណ៣នាក់តែប៉ុណ្ណោះ ។
ស្រដៀងគ្នាដែរ លោកស៊ូ ភិរិន្ទ អភិបាលខេត្ដសៀមរាប បានសម្ដែងនូវការស្វាគមន៍ និងអរគុណសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ចំពោះបទបញ្ជាដ៏ថ្លៃថ្លា ឱ្យមានការដោះលែងប្រជាពលរដ្ឋទាំងអស់ ដែលត្រូវបានចាប់ដាក់គុក ព្រោះតែប្រព្រឹត្តបទល្មើសនេសាទកន្លងមក។
គួរបញ្ជាក់ថា ការចេញបទបញ្ជាឱ្យមានការដោះលែងទណ្ឌិត និងពិរុទ្ធជនទាំងនោះ ដែលជាប់ពាក់ព័ន្ធទៅនឹងការប្រព្រឹត្តបទល្មើសនេសាទឱ្យមានសេរីភាពវិញនោះ ធ្វើឡើងបន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាបានប្រកាសរំលាយឡូត៍នេសាទនៅទូទាំងបឹងទន្លេសាប ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតជ័យលាភីនៃសាកលវិទ្យាល័យបច្ចេកវិទ្យាថ្នាក់វិស្វករ និងថ្នាក់បរិញ្ញាបត្រជាន់ខ្ពស់ និងសម្ពោធដាក់ឱ្យប្រើប្រាស់អគារសាលសហសិក្សា និងអគារសិក្សាថ្មីនៅវិទ្យាស្ថានបច្ចេកវិទ្យាកម្ពុជា រាជធានីភ្នំពេញ កាលពីព្រឹកថ្ងៃទី២៨ កុម្ភៈ ឆ្នាំ២០១២ កន្លងទៅ ៕
0 មតិ:
Post a Comment