កងកម្លាំងរាជអាវុធហត្ថជាង៥០០នាក់បានបើកធ្វើសមយុទ្ធទ្រង់ទ្រាយធំ មួយកាលពីថ្ងៃអាទិត្យ នៅឯសាលាហ្វឹកហ្វឺនកំបូលក្នុងខេត្តកំពង់ស្ពឺ ដើម្បីពង្រឹងសមត្ថភាពកងរក្សាសន្តិសុខក្នុងកិច្ចប្រជុំកំពូលអាស៊ាន ដែលនឹងឈានមកដល់នាប៉ុន្មានថ្ងៃខាងមុខនេះ។ សមយុទ្ធនេះមានគោលដៅ ប្រឆាំងក្រុមភេរវករដែលអាចបង្កនូវបាតុភាពផ្សេងៗនៅថ្ងៃប្រជុំ អាស៊ាន ក៏ដូចជាការតវ៉ារបស់ក្រុមបាតុករនៅពេលពួកគេកើតទុក្ខមិនសុខចិត្ត អំពីអ្វីមួយ។ នេះបើយោងតាមប្រភពព័ត៌មានពីមន្ត្រីកងរាជអាវុធហត្ថដែលបានប្រាប់ ឲ្យដឹងនៅថ្ងៃអាទិត្យ។
កាលពីពេលថ្មីៗនេះស្នងការនគរបាលរាជធានីភ្នំពេញ លោក ទូច អារ៉ុថ បានប្រាប់ឲ្យដឹងថា កម្លាំងប៉ូលិស ៥០០០នាក់ នឹងត្រូវគេដាក់ពង្រាយក្នុងរាជធានីភ្នំពេញ ដើម្បីការពារសន្តិសុខ ២៤ម៉ោងក្នុងអំឡុងពេលនៃកិច្ចប្រជុំកំពូល អាស៊ានដែលកម្ពុជាធ្វើជាម្ចាស់ផ្ទះ។ ប្រតិបត្តិការសមយុទ្ធដើម្បីសន្តិសុខនៅព្រឹកនេះក៏មានផងដែរលំហាត់ បច្ចេកទេសក្នុងការជួយសង្រ្គោះដល់ជនរងគ្រោះដែលជាក្រុមបាតុករ ក៏ដូចជាកម្លាំងសមត្ថកិច្ចដែលរងរបួសនៅពេលមានបញ្ហាអ្វីមួយកើតឡើង។
សមយុទ្ធនេះបានកើតឡើងស្របពេលដែលព្រឹត្តិការណ៍ជាច្រើនត្រូវបាន គេគ្រោងនឹងបង្កើតឡើងនៅក្នុងក្របខណ្ឌនៃកិច្ចប្រជុំអាស៊ាន។ ស្របគ្នាជាមួយនឹងជំនួបកំពូលដែលនឹងផ្តើមឡើងនៅដំណាច់ខែមីនានេះ វេទិកាអង្គការសង្គមស៊ីវិល និងវេទិកាធុរកិច្ចជាច្រើនក៏ត្រូវបានគេប្រកាសឲ្យដឹងផងដែរ។ ជាក់ស្តែង កិច្ចប្រជុំកំពូលស្តីពីអាជីវកម្ម អាស៊ាន-អឺរ៉ុប លើកទី២ ហៅថាកាត់ថា (AEBS) នឹងប្រព្រឹត្តទៅនៅថ្ងៃទី១មេសាខាងមុខនេះ នៅរាជធានីភ្នំពេញ។
នៅក្នុងសេចក្តីថ្លែងការណ៍ កាលពីថ្ងៃទី ២៤មីនា រដ្ឋាភិបាលកម្ពុជាប្រកាសថា ក្រសួងពាណិជ្ជកម្ម និងគណៈប្រតិភូមកពីសហភាពអឺរ៉ុប នឹងរៀបចំកិច្ចប្រជុំនេះជាមួយសហគ្រិន វិនិយោគិនឯកជនមកពីសហភាពអឺរ៉ុប និងអាស៊ាន ដោយផ្តោតទៅលើទំនាក់ទំនងពាណិជ្ជកម្មរវាងអាស៊ាន និងសហភាពអឺរ៉ុប។ វេទិកានេះក៏នឹងបើកឱកាសឲ្យក្រុមប្រទេសក្នុងតំបន់ស្វែងរកឱកាស ធ្វើពាណិជ្ជកម្មជាមួយគ្នាផងដែរ។ រីឯសន្និសីទសង្គមស៊ីវិលអាស៊ាន និងវេទិកាប្រជាជនអាស៊ានឆ្នាំ២០១២ ក៏ត្រូវគេគ្រោងបើកធ្វើនៅចុង ខែមីនានេះដែរ។ សកម្មភាពទាំងនេះបានបង្ហាញថា កម្ពុជាកំពុងស្ថិតក្នុងរបៀបវារៈអាស៊ានយ៉ាងមមាញឹក៕ RFI
0 មតិ:
Post a Comment