ភ្នំពេញ: បើតាមសេចក្តីប្រកាសរួមលទ្ធផលចុងក្រោយនៃជំរឿនសហគ្រាស នៅព្រះរាជាណាចក្រកម្ពុជា ឆ្នាំ២០១១ ផ្តល់នូវស្ថានភាពបច្ចុប្បន្នរបស់សហគ្រាសនៅកម្ពុជា ដែលស្ថិតក្នុងដំណើរងើបឡើងវិញបន្ទាប់ពីមានវិបត្តិសេដ្ឋកិច្ចពិភពលោក នាខែសីហាឆ្នាំ២០០៨។ នោះគឺនៅទូទាំងប្រទេសកម្ពុជា មានជាង ៥០០.០០០ សហគ្រាស។
សេចក្តីប្រកាស ចុះថ្ងៃទី១៣ ខែមីនា ឆ្នាំ២០១២ បង្ហាញថា បើយោងទៅលើលទ្ធផលចុងក្រោយនៃជំរឿនសហគ្រាសនៅព្រះរាជាណាចក្រកម្ពុជា ឆ្នាំ២០១១ នៅកម្ពុជា មានសហគ្រាសទាំងអស់ចំនួន ៥០៥.១៣៤ សហគ្រាស។ ចំនួនអ្នកចូលរួមការងារសរុបនៅក្នុងសហគ្រាសទាំងអស់នោះ មានចំនួន ១.៦៧៦.២៦៣ នាក់ ក្នុងចំណោមនេះ មានប្រុសចំនួន ៦៥០.១៧៩ នាក់ ស្មើនឹង ៣៨,៨% និងស្រីចំនួន ១.០២៦.០៨៤នាក់ ស្មើនឹង ៦១,២%។ ចំនួនអ្នកចូលរួមការងារជាស្រី មានចំនួនច្រើនជាងបុរស។
ជំរឿនសហគ្រាស នៅព្រះរាជាណាចក្រឆ្នាំ២០១១ បានគ្របដណ្តប់គ្រប់តំបន់ទាំងអស់ នៃប្រទេស ដោយគ្មានលើកលែងតំបន់ណាមួយនោះទេ ដោយរាប់យកគ្រប់សហគ្រាសទាំងអស់លើកលែងតែសហគ្រាសទាំងទ្បាយណា ដែលស្ថិតក្នុងវិស័យ ”កសិកម្ម រុក្ខាប្រមាញ់និងនេសាទ” (ក្នុងផ្នែក A) “វិស័យរដ្ឋបាលសាធារណៈ និងការពារ ផែ្នកសន្តិសុខសង្គមចាំបាច់” (ផ្នែក O) ”សកម្មភាពជាម្ចាស់ការនិងសេវាកម្មគ្រួសារសំរាប់ប្រើប្រាស់ខ្លួនឯង” (ផ្នែក T) “សកម្មភាពរបស់អង្គការ ស្ថាប័នក្រៅដែនដី” (ផ្នែក U) ដែលមានចែងក្នុងចំណាត់ថ្នាក់ឧស្សាហកម្មស្តង់ដារអន្តរជាតិ ចេញផ្សាយលើកទី៤ ( ISIC Revision 4 ) និងដោយយោងតាមការប្រើប្រាស់ជាទូទៅរបស់អន្តរជាតិ នៅរាល់ការធ្វើជំរឿនសហគ្រាសទាំងអស់។ បើយោងលើការប្រើប្រាស់ជាទូទៅរបស់អន្តរជាតិ សហគ្រាសចល័ត មិនត្រូវបានរាប់បញ្ចូលនោះទេ នៅក្នុងជំរឿននេះ។
ប្រសិនបើប្រៀបធៀបជាមួយលទ្ធផលចុងក្រោយនៃការធ្វើបញ្ជីសហគ្រាសឆ្នាំ២០០៩ ចំនួនអ្នកចូលរួមការងារបានកើនឡើង ៩,៥% អត្រាកំណើនប្រចាំឆ្នាំប៉ាន់ប្រមាណប្រហែល ៤,៤៧%។ ដោយឡែកកំណើនប្រជាជនប្រចាំឆ្នាំមានប្រមាណ ១,៥៤% ប៉ុណ្ណោះ ដូច្នេះ កំណើនអ្នកចូលរួមការងារមានអត្រាខ្ពស់ជាងអត្រាកំណើនប្រជាជន។
បើមើលទៅតាមវិស័យនីមួយៗវិញ អាចកត់សំគាល់បានថា ចំនួនអ្នកចូលរួមការងារក្នុងវិស័យសេដ្ឋកិច្ចបឋមបានចាប់ផ្តើមផ្លាស់ផ្តូរចូលទៅក្នុងវិស័យសេដ្ឋកិច្ចទី២ និងទី៣។ វិស័យសេដ្ឋកិច្ចបឋមមានន័យថា វិស័យកសិកម្ម រុក្ខាប្រមាញ់ និងនេសាទ ហើយដែលវិស័យសេដ្ឋកិច្ចទី ២និងទី៣ មានន័យក្រៅពីវិស័យសេដ្ឋកិច្ចបឋម។
ចលនានៃបំលាស់ប្តូររបស់នាក់ចូលរួមការងារពីវិស័យសេដ្ឋកិច្ចបឋម ចូលទៅ ក្នងវិស័យសេដ្ឋកិច្ចទី និងទី២ គឺជារឿងធម្មតាដែលត្រូវបានគេមើលឃើញនៅក្នុងតំណើរការនៃការអភិវឌ្ឍប្រទេស។
ចំនួនសហគ្រាស ដែលមានអ្នកចូលរួមការងារ ១ នាក់ មាន ២២២.០០០ សហគ្រាស ស្មើនឹង ៤៤,០% និងសហគ្រាសដែលមានអ្នកចូលរួមការងារ ២នាក់មានចំនួន ១៧៦.០០០ សហគ្រាស ស្មើនឹង ៣៤,៩%។ ដូច្នេះ ទំហំសហគ្រាសដែលមានអ្នកចូលរួមការងារ ១នាក់និង២នាក់មានដល់ទៅ ៨០% ក្នុងចំណោមសហគ្រាសសរុបទាំងអស់។
ចំនួនសហគ្រាស ដែលមានអ្នកចូលរួមការងារពី ៥នាក់ឡើងមានចំនួន ៤០.០០០ សហគ្រាស ស្មើនឹង ៧,៨% ចំនួនអ្នកចូលរួមការងារចាប់ពី ១០នាក់ឡើងមានចំនួន ១៣.០០០ សហគ្រាស ស្មើនឹង ២,៦% ចំនួនអ្នកចូលរួមការងារចាប់ពី ១០០នាក់ឡើងមានចំនួន ៧៨៧សហគ្រាស ស្មើនឹង ០,២% និងសហគ្រាសដែលមានអ្នកចូលរួមការងារចាប់ពី ១.០០០នាក់ឡើងមានចំនួន ១១៩ សហគ្រាស។ ដូចនេះអាចនិយាយបានថា សហគ្រាសខ្នាតធំនៅមានសមាមាត្រទាបណាស់ នៅក្នុងប្រទេសកម្ពុជា។
ម្យ៉ាងវិញទៀតចំនួនអ្នកចូលរួមនៅក្នុងសហគ្រាសដែលមានអ្នកចូលរួមការងារចាប់ពី ៥នាក់ឡើងមាន ៨៧៩.០០០ នាក់ ស្មើនឹង ៥២,៤% សហគ្រាសដែលមានអ្នកចូលរួមការងារចាប់ពី ១០នាក់ឡើងមានចំនួន ៧១៦.០០០ នាក់ ស្មើនឹង ៤២,៧% សគ្រាសដែលមានអ្នកចូលរួមការងារចាប់ពី ១០០នាក់ឡើងមានចំនួន ៤៥៤.០០០ នាក់ ស្មើនឹង ២៧,១% និងសហគ្រាសដែលមានអ្នកចូលរួមការងារចាប់ពី ១.០០០ នាក់ឡើងមានចំនួន ២៥៧.០០០ នាក់ស្មើនឹង ១៥,៣%។ បើទោះបីជា សហគ្រាសខ្នាតធំនៅកម្ពុជា មានចំនួនតិចតួចយ៉ាងណាក៏ដោយ ក៏ចំនួនអ្នកចូលរួមការងារដែលកំពុងធ្វើការនៅក្នុងសហគ្រាសទាំងនេះ មានសមាមាត្រខ្ពស់ជាងគេ។
ចំនួនសហគ្រាសបង្កើតថ្មីមានប្រមាណ ១៨០.០០០ សហគ្រាស ច្រើនជាង ១ ភាគ៣
មានសហគ្រាសបង្កើតថ្មីចំនួន ១៨២.៤៣៩ សហគ្រាស ដែលចាប់ផ្តើមធ្វើអាជីវកម្មក្នុងចន្លោះថ្ងៃទី១ ខែមករា ឆ្នាំ២០០៩ ដល់ថ្ងៃទី ១ ខែមីនា ឆ្នាំ២០១១។
សហគ្រាសបង្កើតថ្មីមានផលធៀបខ្ពស់ស្មើនឹង ៣៦% ក្នុងចំណោមសហគ្រាសសរុបទាំងអស់។ គឺថាចំនួនសហគ្រាសបង្កើតថ្មី បានកើតឡើងក្នុងខែ មករា ឆ្នាំ២០០៩ ឬក្រោយមកទៀត។ មានន័យថា សេដ្ឋកិច្ចកម្ពុជាគឺរីកលូតលាស់យ៉ាងឆាប់រហ័ស ហើយគោលនយោបាយសេដ្ឋកិច្ចដែលរាជរដ្ឋាភិបាលកម្ពុជាកំពុងអនុវត្តដូចជាការលើកកំពស់កំណើនសេដ្ឋកិច្ចតាមរយៈផែនការយុទ្ធសាស្ត្រអភិវឌ្ឍន៍ជាតិឆ្នាំ ២០០៩-២០១៣ គឺទទួលបានជោគជ័យ។
សហគ្រាសបង្កើតថ្មីដែលមានអ្នកចូលរួមការងារពី ១ ឬ ២ នាក់ មានផលធៀបខ្ពស់ជាងគេ ដល់ទៅ ៨២,០% ច្រើនជាង ៤ ភាគ ៥ ក្នុងចំណោមសហគ្រាសបង្កើតថ្មីសរុបទាំងអស់។ មានន័យថា គោលនយោបាយសេដ្ឋកិច្ច ដែលលើកឡើង ដោយរាជរដ្ឋាភិបាលកម្ពុជា ដោយលើកកំពស់ និងគាំទ្រទៅលើសហគ្រាសខ្នាតតូច គឺទទួលបានជោគជ័យ។ ជាពិសេស សហគ្រាស ដែលមានអ្នកចូលរួមការងារ ១នាក់ និងអ្នកតំណាងជាស្ត្រីមានផលធៀបខ្ពស់ដល់ ៣៥,៨% គឺជិត ៤០% ក្នុងចំណោមសហគ្រាសបង្កើតថ្មីសរុប។ មានន័យថាគោលនយោបាយសេដ្ឋកិច្ចរបស់រាជរដ្ឋាភិបាល តាមរយៈការលើកស្ទួយនិងគាំទ្រដល់អាជីវករជាស្ត្រីក៏ទទួលបានជោគជ័យផងដែរ។
អាជីវកម្ម “កម្មសិទ្ធផ្ទាល់ខ្លួន” មានជិត ៧០% “កាន់កាប់ទីកន្លែងធ្វើអាជីវកម្ម”
បើពិនិត្យមើលកម្មសិទ្ធនៃទីកន្លែងធ្វើអាជីវកម្ម ៦៨,៩% ជាការកាន់កាប់ទីកន្លែង ធ្វើអាជីវកម្មដែលជាកម្មសិទ្ធផ្ទាល់ខ្លួនក្នុងចំណោមសហគ្រាសសរុប។ មានន័យថា អត្រាមានកម្មសិទ្ធគឺមានកំរិតខ្ពស់នៅកម្ពុជា។
ស្ថានភាពបែបនេះ គឺមានផលប្រយោជន៍ចំពោះប្រទេសកម្ពុជា ក្នុងការរក្សាបានលំនឹងកំណើនសេដ្ឋកិច្ច បានយូរអង្វែង ដោយសារតែ ៧០% នៃសហគ្រាសទាំងអស់ អាចបន្តប្រតិបត្តិការអាជីវកម្ម បានដោយសារតែមានការចំណាយទាប។
វិស័យ “ព័ត៌មាន និងទំនាក់ទំនង” បង្ហាញអត្រាកំណើនខ្ពស់ ដោយមានជាង ៥០%
បើមើលទៅលើផលធៀបសហគ្រាសបង្កើតថ្មី ទៅតាមផ្នែកចំណាត់ថ្នាក់វិស័យស្តង់ដារអន្តរជាតិ ផ្នែក “ព័ត៌មាន និងទំនាក់ទំនង” (ផ្នែក J) គឺជាផ្នែកមួយខ្ពស់ជាងគេស្មើនឹង ៥២,៤%។ នេះដោយសារតែផ្នែកទូរស័ព្ទចល័ត និងការប្រើប្រាស់អ៊ិនធ័រណេត និងសកម្មភាព សេវាកម្មម៉ាស៊ីនកុំព្យូទ័រមានភាពពេញនិយម។
បន្ទាប់មកផ្នែក “សកម្មភាពអចលនៈ និងចលនៈទ្រព្យ” (ផ្នែក L) មាន ៤៤,៦% “សកម្មភាពសេវាកម្មអាហារនិងការស្នាក់នៅ” (ផ្នែក I) មាន ៤៣,៦% “សិល្បៈ និងការកំសាន្ត” (ផ្នែក R) មាន ៤៣,៥% និង “សកម្មភាពសេវាកម្មផ្សេងទៀត” (ផ្នែក S) មាន ៣៩,០% ជាដើម។
សេដ្ឋកិច្ចកម្ពុជាមានរចនាសម្ពន្ធ័ចំណាយខ្ពស់នៅក្នុងផ្នែកឧស្សាហកម្មទី២ និងទី៣
ពិនិត្យមើលល័ក្ខខ័ណ្ឌអាជីវកម្មនៅកម្ពុជា ចំណូលពីការលក់ប្រចាំឆ្នាំ គឺមានចំនួនសរុប ១២០ កោដិដុល្លារអាមេរិក រីឯការចំណាយប្រចាំឆ្នាំមានចំនួនសរុប ១០១ កោដិដុល្លារអាមេរិក ហើយចំណេញនិងខាតប្រចាំឆ្នាំមាន ១៩កោដិដុល្លារអាមេរិក។ គឺថាការចំណាយប្រចាំឆ្នាំមានមិនតិចជាង ៨៤%នៃចំណូលពីការលក់ប្រចាំឆ្នាំនោះទេ តែការចំណេញ ខាតមានត្រឹមតែ ១៦%ប៉ុណ្ណោះ។ មានន័យថា សេដ្ឋកិច្ចកម្ពុជា មានរចនាសម្ពន្ធ័ចំណាយខ្ពស់នៅក្នុងផ្នែកឧស្សាហកម្មទី២ និងទី៣។ នេះក៏ឆ្លុះបញ្ចាំងពីការពិតថា ប្រទេសកម្ពុជានាំចូលសំភារៈនិងទំនិញច្រើនបំផុត ហើយថា ផលិតផលក្នុងស្រុកគឺនៅមានករិមាណទាបនៅឡើយ។
ការធ្វើអោយផលិតផលក្នុងស្រុកមានការរីកចំរើននិងការធ្វើអោយរចនាសម្ពន្ធ័សេដ្ឋកិច្ចចំណាយទាបគឺជាបញ្ហាសំខាន់ នៅក្នុងពេលអនាគតដើម្បីអោយមានការអភិវឌ្ឍសេដ្ឋកិច្ចសង្គមកិច្ចរបស់ប្រទេសកម្ពុជាកាន់តែរីកចំរើនបន្ថែមទៀត។
លទ្ធផលជំរឿនសហគ្រាសនៅព្រះរាជាណាចក្រកម្ពុជាឆ្នាំ ២០១១ នឹងត្រូវប្រើប្រាស់ សំរាប់កសាងគោលនយោបាយ និងផែនការផ្សេងៗ នៅរដ្ឋបាលថ្នាក់ជាតិ និងថ្នាក់ក្រោមជាតិ សំរាប់អ្នកសិក្សាស្រាវជ្រាវនៃសាកលវិទ្យាល័យ និងនៅស្ថាប័នផ្សេងៗទៀត សំរាប់តាក់តែងយុទ្ធសាស្ត្រគ្រប់គ្រង និងការស្រាវជ្រាវទីផ្សារក្នុងផ្នែកឯកជនជាដើម។
ជំរឿនសហគ្រាសនៅព្រះរាជាណាចក្រកម្ពុជាឆ្នាំ ២០១១ ត្រូវបានអនុវត្តដោយវិទ្យាស្ថានជាតិស្ថិតិ នៃក្រសួងផែនការរួមសហការជាមួយគំរោងកែលំអស្ថិតិផ្លូវការនៅកម្ពុជា ដែលឧបត្ថម្ភគាំទ្រដោយ រដ្ឋាភិបាលជប៉ុន និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដែលគំរោងនេះបានជួយទាំងការធ្វើជំរឿនប្រជារាស្ត្រឆ្នាំ២០០៨និងការធ្វើបញ្ជីសហគ្រាសទូទាំង ប្រទេសឆ្នាំ២០០៩។
លទ្ធផលជំរឿននេះ ត្រូវបានផ្សព្វផ្សាយជាផ្លូវការ នៅទីស្តីការគណៈរដ្ឋមន្ត្រី កាលពីព្រឹកថ្ងៃទី១៣ ខែមីនា ឆ្នាំ២០១២ ក្រោមអធិបតីភាពរបស់លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ៕
0 មតិ:
Post a Comment